Le Manatu o le Tusi Paia

O le ā le Agaga Paia o le Atua?

“Ua papatisoina le nuu uma, ona papatisoina ai lea o Iesu, ua tatalo o ia, ona faaavanoaina ai lea o le lagi, ona afio ifo lea o le agaga paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, ‘O loʻu atalii pele oe, ua ou fiafia lava ia te oe.’”—Luka 3:21, 22.

I LE lauga atu i se vaega o le au faifilosofia i Eleni anamua, na taʻua ai e le aposetolo o Paulo le Atua o le “Alii o ia o le lagi ma le lalolagi.” O le Atua lenei, na taʻua e Paulo, o Lē “na faia le lalolagi ma mea uma lava o i ai” ma o Lē “o loo foai mai . . . le ola, ma le mānava, ma mea uma lava i le vao mea atoa.” (Galuega 17:24-28) E faapefea ona faataunuu e le Atua nei mea uma? E ala lea i lona agaga paia, po o lona mana galue.

Ua faamatala mai foi e le Tusi Paia e faapea o le Atua e iai “le tele o lona malosi [“o loo gaoioi,” NW] ma lona mana tele.” (Isaia 40:26) Ioe, na foafoaina e le Atua le vateatea aoao, lea e faailoaina mai ai le tele o lona malosi o loo gaoioi ma lona mana.

Le Mana o Loo Gaoioi

O le a lē saʻo atoatoa le faapea atu o le agaga paia o le mana o le Atua. E māfua lenei ona o le mana e mafai ona na ona iai, pe nofo ai ae lē gaoioi, i totonu o se tagata po o se mea, e pei o le mana ua i totonu o se maa uila e lē o faaaogaina. Peitai, o loo faailoa mai e le Tusi Paia le agaga o le Atua i faamatalaga i se tulaga o loo gaoioi, tai pei o ave eletise e sau mai i se maa uila o loo faaaogā. (Kenese 1:2) O lea, o le agaga paia o le Atua o lona malosi ua auina atu, o lona mana galue.

E tautala le Tusi Paia i nisi taimi i le agaga paia e faapea o loo faataunuuina se galuega patino po o le iai i se tulaga ua ese mai le Atua. (Mataio 28:19, 20; Luka 3:21, 22; Galuega 8:39; 13:4; 15:28, 29) O nisi ua faitau i na mau ua manatu o le agaga paia e ese lava ia mai le Atua. Aisea ua faaaogā ai lea fuaitau i le Tusi Paia? Pe o le agaga paia o se peresona po o se mea e ese mai le Atua?

O le Atua e Ona le Malosi Uma Lava e soifua i se tulaga matuā ese lava mai ana foafoaga faitino. O Ia o le agaga, e lē vaaia e la tatou vaai e faatapulaa. (Ioane 4:24) Ua faapea mai le Tusi Paia e afio Ieova le Atua i le lagi ma e silasila mai o ia iina, i tagata. (Salamo 33:13, 14) E faigofie ona malamalama i ai i lenei mea. E tatau ona sili atu Lē na Foafoaina Mea na i lo mea o loo ia galue ai. E na te faatautaia i latou, fesuisuiaia i latou, faia i latou, ma pulea i latou.—Kenese 1:1.

Mai lona afioaga lē vaaia, e mafai e le Atua ona faapogaia mea ia tutupu i so o se taimi ma i so o se mea. O lea, e lē manaomia ai ona iai o ia i le nofoaga o loo faagaoioia ai lona mana galue. E mafai ona ia auina atu lona agaga e faataunuuina se galuega. (Salamo 104:30) E ono faigofie ona malamalama i lenei mea tagata i aso nei o ē o loo faagaoioia meafale alu i le eletise e ala i le faaaogā o le tamai masini faatonutonu e leai ni uaea. I aso nei ua tatou iloa le mana o i malosiaga lē vaaia e pei o le eletise po o ni ave o uila (infrared waves). E faapena foi, ona mafai e le Atua i lona mana paia lē vaaia po o lona agaga, ona faataunuuina po o le ā lava se mea ua ia fuafua e fai, e aunoa ma le tau siitia atu o ia lava mai lea nofoaga i lea nofoaga.—Isaia 55:11.

I taimi o le Tusi Paia, o lenei manatu sa ono faafaigata ona manino i ai. O le faamatalaina o le agaga paia o se mana e ese mai, na mautinoa le fesoasoani i le au faitau e manino ai i le auala o loo faagaoioia ai le mana o le Atua e ui lava ina lē iai totino o ia i le nofoaga o loo faagaoioia ai lea mana. Pe a faasino le Tusi Paia i le agaga paia ua faia lea mea ma lea mea, o lona uiga o loo faapea mai ua auina atu pe faaaogā e le Atua lava ia lona mana i tagata po o mea ina ia faataunuuina lona finagalo.

Faagaoioiga Eseese o le Agaga Paia

Na faaaogā e Ieova le agaga paia i le foafoaina o mea uma e iai ola ma mea e leai ni ola. (Salamo 33:6) Na faaaogaina foi e le Atua e faaumatia ai se tupulaga o tagata sauā ma le lē salamō e ala i se lolo. (Kenese 6:1-22) O le mana galue lava lea na faaaogā e le Atua e faaliliuina mai le ola tautele o lona Alo i le manava o le taupou Iutaia o Maria.—Luka 1:35.

E iai taimi e faamalosia ai e le agaga tagata ina ia tāutatala atu ma le lototele ma le faamalosi i le upu moni i luma o fili, e masani lava i se tulaga e lamatia ai o latou ola. (Mika 3:8) Ma e tele faataitaiga i le Tusi Paia ae maise lava e aofia ai valoaga, na avatua ai i tamaloloa ma fafine se poto po o se malamalamaga faapitoa e ala atu i lenei mana. Talu ai e leai se tagata e mafai ona valoiaina ma le saʻo le lumanai, o se faagaoioiga maoae la lea o le agaga.—2 Peteru 1:20, 21.

E mafai foi e le agaga ona avatu i tagata taitoatasi ni mana faavavega. Mo se faaaoaoga, e ala atu i lea mana, na mafai ai e Iesu ona pulea matagi, faamalolo maʻi, ma e oo lava i le faatutū o ē oti. (Luka 4:18-21; 8:22-26, 49-56; 9:11) Na faaaogaina le agaga i le faamaopoopoina ma le avatuina o le malosi i uluai Kerisiano ina ia avea ai ma molimau a le Atua i le lalolagi uma.—Galuega 1:8; 2:1-47; Roma 15:18, 19; 1 Korinito 12:4-11.

E Faamalosi Mai le Mana o le Atua mo i Tatou

Pe e mafai ea e auauna faaletagata a le Atua i aso nei ona mauaina mai lenei puna lē gata mai o le malosi? Ioe! E foai atu e le Atua se vaega o le agaga paia i ona tagata e fesoasoani ia i latou e malamalama ma faataunuu lona finagalo. Na foai atu lona agaga ia i latou o ē talosaga atu i ai ma le faamaoni e ala i le tatalo, o ē o loo iai le uunaiga saʻo o le loto, ma ē o loo usiusitai atu i ana tapulaa. (1 Korinito 2:10-16) E mafai e lena agaga ona faaauupegaina tagata lē lelei atoatoa i le “matuā tele o le mana,” ma mafai ai ona latou auauna ma le faamaoni i le Atua e ui i toatuga. E mautinoa lava la, o lea le faanaunauga o tagata uma e matatau i le Atua o le mauaina ma le faatumauina lea ia i latou le agaga o le Atua.—2 Korinito 4:7; Luka 11:13; Galuega 15:8; Efeso 4:30.

E lē o toe mamao ona faaaogā lea e le Atua lenei mana o loo gaoioi e faaiu ai le lē faamasinotonu ma puapuaga i lenei lalolagi amioleaga, ma faapea ona faapaiaina ai lona suafa sili ma le paia. O le a faaaafia mo le lelei e le agaga paia le lalolagi atoa, ma o ona fua o le a manino le vaai i ai o tagata uma, e viia ai Lē e Pogai mai ai.—Kalatia 5:22, 23; Faaaliga 21:3, 4.