Pe o le a Faatagaina ea se Saʻolotoga e Sili Atu e Faavae i Talitonuga i Mekisikō?

MAI SE SUI O LE ALA MAI! I MEKISIKŌ

UA FAAMAUTINOA e le tulafono i Mekisikō le saʻolotoga o lotu. E ui i lea, ae o loo iai pea i le tulafono nisi o faasāsāga i le saʻolotoga e tapuaʻi ai. Mo se faaaʻoaʻoga, o le manatu i le tetee i le auaunaga i le vaegāʻau e faavae i talitonuga e lē iloa tele i lenei atunuu. O le māfuaaga lena na fuafua ai le Ofisa o Suʻesuʻega i Tulafono a le National Autonomous University of Mexico (UNAM), ina ia faia se felafolafoaʻiga faava-o-malo e talanoaina ai le matua “Le Tetee e Faavae i Talitonuga i Mekisikō ma le Lalolagi.” E tali atu le Ofisa o Suʻesuʻega i Tulafono a le UNAM i le malo, ae o lona fuafuaga o le iloilo lea o tulafono ua faatūina ma lo latou faatatauina. Na valaaulia Molimau a Ieova i Mekisikō ina ia auina atu sona sui e taulimaina se lauga i le mataupu “Molimau a Ieova ma le Tetee e Faavae i Talitonuga.”

Faailoa Atu e Tagata Atamamai

O le mataupu “Le Tetee e Faavae i Talitonuga i Tulafono Faava-o-malo,” na taulimaina e Dr. Javier Martínez Torrón, o se tagata poto faapitoa i le Granada University of Law, i Sepania, na faamanino atu ai faapea o le saʻolotoga o le lotofuatiaifo ma le aiā e tetee atu ai i le faatatauina o nisi o tulafono po o ni tiute fai ona o le lotofuatiaifo ua leva ona aloaʻia faava-o-malo. Na ia taʻua le tulaga o Molimau a Ieova i Sepania ma le faamasinoga o Kokkinakis i Eleni.a

Na lauga ia Dr. José Luis Soberanes Fernández, o se tagata poto faapitoa i le Ofisa o Suʻesuʻega i Tulafono a le UNAM i le mataupu, “Mea ua Tutupu i Mekisikō e Tusa ai ma le Mataupu.” Na ia faapea mai: “E ao ona tatou faailoa atu faapea o loo toeitiiti lava faasāina e le Tulafono mo Faalapotopotoga Faalotu ma Tapuaʻiga i le Lautele i Mekisikō le tetee e faavae i talitonuga,” ma e tusa ai o le Uluaʻi Vaega o lenei tulafono, lea o loo faapea mai: “E leai lava ma se avanoa e tuusaunoa ai se tasi mai le tausia o tulafono a lenei atunuu ona o ni talitonuga maumauaʻi faaletapuaʻiga. E leai ma se tasi na te mafaia ona faalālā mai māfuaaga faalelotu ina ia alofia ai tiute tauave o loo faailoa atu e tulafono.” I le faaiʻuga, na faapea atu ai Dr. Soberanes: “Matou te talitonu ua ao ona faavave ona fai ni fetuutuunaʻiga faaletulafono i le mataupu e uiga i le tetee e faavae i talitonuga i Mekisikō.”

Na ia faasino atu i le mea moni faapea i tausaga taʻitasi e faitau selau fanau a Molimau i Mekisikō e fesagaʻi ma faafitauli e fesootaʻi atu i a latou aʻoaʻoga ona o lo latou tetee e faavae i le Tusi Paia ina ia fāʻalo i le fuʻa. O nisi o fanau Molimau ua oo lava ina lē faatagaina ona lesitalaina i se aʻoga. Peitaʻi, ona o talosaga e ala atu i le Komisi o Aiā Tatau Faaletagata, o le toʻatele lava o i latou ua toe maua lo latou aiā tatau e aʻoʻoga ai. O nisi o pulega o aʻoga ua latou faia nisi o laasaga ina ia puipuia mai ai fanau mai le tuliesea mai le aʻoga, ae o loo lē amanaʻia e nisi o faiaʻoga na taumafaiga. Sa faapalepale pea le malo i le tulaga o Molimau, ae e leʻi iai lava se tuutuuga e mafai e aʻoga i Mekisikō ona mulimuli ai.

Na talanoaina foʻi i le felafolafoaʻiga le tetee e faavae i talitonuga na faia e isi tapuaʻiga, e pei o le faamalosia ona galulue i aso latou te manatu e paia, o le manaʻomia ona latou faia ni laʻei i a latou galuega i se auala e solia ai o latou talitonuga faalelotu, ma isi lava mea faapena. O le tetee i le auaunaga i vaegāʻau ma nisi lava o togafitiga faafomaʻi sa talanoaina foʻi.

Molimau a Ieova ma Kaisara

Na tuuina atu e se sui o le ofisa o le lālā o Molimau a Ieova i Mekisikō se aotelega o o latou talitonuga faavae. Na ia faamatalaina lo latou pipii atu i mataupu silisili faale-Tusi Paia e pei o lea o loo faamatala mai i le Luka 20:25, lea o loo taʻu atu ai i Kerisiano ina ia ‘avatu mea a Kaisara ia Kaisara.’ Na ia faasino foʻi i le Roma 13:1, lea o loo faapea mai e tatau i Kerisiano ona faaaloalo i pule faalemalo. Na ia faamamafa faapea o Molimau a Ieova e pei lava o isi, o ni tagatānuu tausi i tulafono o ē taumafai e totogi a latou lafoga, e ola i ni olaga e pulea lelei, e tausisi ia mamā o latou fale, ma e ave a latou fanau i aʻoga.

Ona ia faamatilatila loa lea o se faavae faale-Tusi Paia mo le teena e Molimau o le fāʻalo i le fuʻa, lea e mafai ona maua i Tulafono e Sefulu, o loo i le Esoto 20:3-5: “Aua neʻi e fai mo oe ni atua ese i oʻu luma. Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua; aua e te ifo i ai, aua foi e te auauna i ai.”

E tapuaʻi Molimau a Ieova tau lava o le Atua, ma e leai lava se avanoa latou te tapuaʻi ai i se faatusa. Peitaʻi, latou te lē taitai lava faia se gaoioiga lē faaaloalo faasaga i se faailoga faaleatunuu pe tautatala foʻi ma le lē faaaloalo i ai.

Ina ia faamamafa le vaaiga a Molimau a Ieova i lenei fesili, na faailoa atu ai loa le ata vitiō o le Purple Triangles. O loo faaalia i lenei vitiō le tutū mausalī o Molimau a Ieova a o pule le ʻau Nasi i Siamani (1933-1945). O loo aumaia ai le tala i le ʻau Kusserow, o se aiga na tutū mausalī i lo latou talitonuga i le taimi o pulega a Nasi.b

Ona tuuina atu loa lea o le faavae faale-Tusi Paia o le tetee o Molimau a Ieova i le faaaogāina o tuiga toto. (Kenese 9:3, 4; Galuega 15:28, 29) Na faamatala atu le fuafuaga mo Komiti o Fesootaʻiga Faafomaʻi i le lalolagi aoao. E faaopoopo atu i ai, na faamatilatila foʻi le taulau manuia o ni fomaʻi e lagolagosua i le faia o taʻotoga mo Molimau a Ieova e lē faaaogāina ai le toto.

I aso taʻitasi e tusa ma le selau tagata na auai e faalogologo i le felafolafoaʻiga, o le toʻatele lava o lōia. Sa auai foʻi sui o le Ofisa o Mataupu Faalelotu i Mekisikō. O i latou uma na auai na mafai ona latou faafofoga i manatu o ē popoto faapitoa e tusa ai o le amanaʻia o le tetee e faavae i talitonuga. O se manatu fou lenei i le ʻaufaitulafono i Mekisikō, e ui lava o loo taliaina i le tele o atunuu faatemokalasi, e pei o le Iunaite Setete, Falani, Potukali, ma Sepania e faapena foʻi i nisi o atunuu sa avea muamua ma malo faa-Komunisi, e pei o Czechia ma Slovakia.

[Faaopoopoga i lalo]

[Ata i le itulau 31]

E tautele i Molimau a Ieova i Mekisikō lo latou saʻolotoga e talaʻi ai