Faamoemoe—Pe e Iai Moni Sona Aogā?
UA ATOA le tausaga talu ona tauivi Tanielu ma le kanesa, ae o ia o se tamaitiiti e na o le sefulu ona tausaga. Na manatu fomaʻi ua siliga se togafitiga, ma o le lagona foʻi lenā na iai i nisi e māfana la latou faiā ma Tanielu. Ae e leʻi maluelue le faamoemoe o Tanielu. Sa ia lagona o le a sau se taimi e matua ai ma avea o ia ma tagata e suʻesuʻe i maʻi, ma galue ina ia maua se togafiti mo le kanesa. Sa matuā naunau fiafia Tanielu, e faatalitali i le aso e sau ai le asiasiga a se fomaʻi faapitoa o le ituaiga o kanesa lea o loo maua ai o ia. Ae e leʻi taunuu le asiasiga a le fomaʻi i le aso na tuupōina, ona o le faalētonu o le tau. Na matuā faanoanoa ai lava Tanielu i lea tulaga. O le taimi muamua lea na vaaia ai lona lē fiafia. E leʻi umi ae maliu loa o ia.
O le tala e faatatau iā Tanielu, na faamatalaina e se tagata fomaʻi faapitoa e suʻesuʻea aafiaga o le iai po o le leai o se faamoemoe, i le soifua mālōlōina o le tagata. Atonu e iai ni tala faapena ua e faalogo i ai. O se isi faataʻitaʻiga, o se tagata ua matua lava ua pulapula lā goto lona soifua ae o loo faatalitali ma le naunau i se mea faapitoa o le a tupu i se aso o i luma—atonu o le asiasi atu o sē e pele iā te ia po o le faamanatuina o se aso e faapitoa iā te ia. E uma atu loa lenā aso fiafia, ona vave lava lea ona oo le maliu iā te ia. Aiseā ua faapea ai, o le ā se vala ua aafia ai nei tagata? Pe faamata e mafai moni lava ona avea le faamoemoe ma uunaʻiga aogā e pei ona talitonu i ai nisi?
Ua faatupulaʻia tagata suʻesuʻe faafomaʻi ua manatu e faapea o le iai o se lagona mautinoa, le faamoemoe, ma uiga faapena e naunau mo le lelei, e matuā telē so latou aogā i le olaga ma le soifua mālōlōina o le tagata. Peitaʻi e lē ioe uma tagata i lenā manatu. Ua faalēaogāina e nisi tagata suʻesuʻe manatu na e faapea, o ni manatu e leai se faavae faasaienisi. E sili iā i latou le manatu e faapea, e māfua maʻi o le tino ona o faalētonu o le tino.
O le mea moni, e lē o se mea fou lea uiga o le lē talitonu i le tāua o le iai o le faamoemoe. I le faitau afe o tausaga ua tuanaʻi na fesiligia ai le faifilosofia Eleni o Aristotle e faamatala le uiga o le upu faamoemoe, ma o lana tali e faapea: “O se miti lea o loo fai a se tasi ae o loo ala.” Talu ai nei lava, na faia ai e se alii tomai tau polotiki e suafa iā Benjamin Franklin, se faamatalaga e tai faapena foʻi lona manatu i lona faapea mai: “O lē e faalagolago e ola i le faamoemoe, o le a lē aogā lenā faamoemoe iā te ia.”
O le ā la le manatu saʻo e tusa ai o le faamoemoe? Pe ua na o ni moomooga faivavale ea, ua na o se mea e maua ai e tagata sina faamāfanafanaga i ni miti e lē faavaea? Pe faamata o loo iai se māfuaaga tatau e manatu ai e faapea o le iai o se faamoemoe, e sili atu nai lo o se miti, o se mea lea o loo manaʻomia e i tatou uma ina ia tatou soifua mālōlōina ma fiafia ai, ma o se mea e iai moni sona faavae ma ni ona aogā?