Le Mea e Fai Ina ia Alofagia ai Oe

O le ā se mea e mafai ona fai ina ia alofagia ai oe, ae lē tau o le alofa i le va o itupā e lua? Ia tele ni au tupe? Pe ia faamanaia ou foliga vaaia?

O FAASALALAUGA ua ala ai ona faasesēina alii ma tamaʻitaʻi, ia vaai i ia mea e tusa o se auala e maua ai le alofa moni. O le mea moni, o se mea tatau lo tatou naunau ia manaia o tatou foliga vaaia, ae o le aulelei, o se mea e lē tumau, ma e lē avea ma mea e tumau ai le lelei o se faiā. E faapena foʻi ʻoa. O le mea e manaʻomia, o le faaalia lea o le alofa e aunoa ma le manatu faapito. Na aʻoaʻo mai Iesu: “Ia outou foaʻi atu, e foaʻiina mai ai iā te outou.” (Luka 6:38) O lona uiga, a e manaʻo e alolofa tagata iā te oe, ia e alofa atu i isi.

E faapefea ona faia lea tulaga? A o faagaeeina le aposetolo o Paulo e le agaga paia o le Atua, na ia taliina le fesili lea. Na ia faaalia, o le alofa, o se uiga e gaoioi, ma e lē o faalogona e iloa ai, ae o mea ua faia, pe e lē o faia i isi. Ia mātau upu a Paulo: “E onosai le alofa, e agamalu, e lē losilosi le alofa, e lē mitamita vale le alofa, e lē faafefeteina, e lē amio matagā, e lē saʻilia e ia ana lava mea, e lē faaitaitagofie, e lē faitau leaga ua tuuina mai e nisi, e lē fiafia i le amio leaga, a e fiafia i le faamaoni. O le alofa e lavātia mea uma, e leai se mea e gata mai ai lona faatuatua, ma lona faamoemoe ma lona onosai.”—1 Korinito 13:4-7.

O le ā sou lagona pe a agalelei atu se tasi iā te oe ma fiafia iā te oe e ui i au amio ma tala faaonoono? E lē taumatea o le a e fiafia i se tagata o loo naunau mai mo oe, ma e lē maitaita, ae loto faamagalo ma tautala faamaoni, e ui ina e lē faigofie.

O lea, ia e faia faapea i isi. Na fetalai Iesu: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.” (Mataio 7:12) E lē faigofie le faaalia o le alofa i taimi uma, ae e ese le aogā. O se tasi o ona aogā, o le a sili ai ona alofagia oe e lou aiga, o au uō, o lou toʻalua, po o lē ua fuafua e lua te faaipoipo. O le a e maua ai foʻi le fiafia i le faia o le mea e ao ona fai, i le foaʻi o lou taimi ma le malosi mo isi. Ioe, “e sili le manuia [po o le fiafia] o lē na te foaʻi atu, i lo lē na te talia mai.”—Galuega 20:35.

Aʻoaʻoina le Alofa Mai Lē ua Sili Lona Silafia

O Ieova, o le Atua alofa, ma e sili lona silafia o lea uiga. (1 Ioane 4:8) O lona alofa ua uunaʻia ai o ia e aʻoaʻo lea uiga iā i latou uma o ē o loo fia iloaina. Seʻi tatou iloiloina ni mataupu silisili mai le Tusi Paia e aogā ia tatou iloa ai ona alolofa atu, ma ia alofagia ai i tatou.

Ia “faataalise ona faalogologo, ia faagesegese ona tautala.” (Iakopo 1:19) Na iloa mai se suʻesuʻega na fai i ulugalii e 20,000, o tagata e sili ona fiafia, o i latou e faalogologo lelei atu a latou paaga. E tāua tele le fetalanoaaʻi lelei o se ulugalii. Na tusi se polofesa e suʻesuʻe i faiā faaletagata e faapea: “O le a e lagona le tuua toʻatasi pe afai e lē malamalama lau paaga i le tulaga lea o loo e iai. Ae e sili atu ona faigatā pe afai e na te iloa le tulaga o loo e iai, ae e lē o malamalama i ou lagona mafatia.” Na ia fai mai atili, e tusa lava po o iai ni vala e eseese ai se ulugalii, ae “o le a lē afāina lea tulaga pe afai e malamalama lou toʻalua i ou faalogona ma lau vaaiga i le olaga.”

“O outou lava loto ua taofiofi ai outou, . . . ia outou loto mataala,” pe faalautele atu lo outou alofa. (2 Korinito 6:12, 13) Tatou te maua aogā pe a faalautele atu lo tatou alofa i isi. Ua fai mai se tusi mai le Harvard Medical School: “E tele ma tele suʻesuʻega ua faaalia ai, o tagata e lelei a latou faiā ma o latou aiga, o uō, ma tagata i lo latou vaipanoa, e sili atu ona fiafia, e itiiti o latou faafitauli tau soifua mālōlōina, ma e faaumiumi o latou soifua.”

“Ia tatou manatunatu foʻi le tasi i le tasi, ina ia taufaatupu ai le alofa ma galuega lelei.” (Eperu 10:24, 25) E tatou te aafia i a tatou uō. E ala i le faatasitasi ma i latou e faaalia le alofa moni faa-Kerisiano, o le a e iloatino ai lea uiga ma iloa ai le faatinoga i lou lava olaga. E taumafai Molimau a Ieova e fefaaaliaʻi lea uiga, auā ua latou iloa o se uiga lea e iloa ai soo moni o Iesu. (Ioane 13:35) E latou te fiafia e valaaulia oe i a latou sauniga.

Aua e te faanoanoa ma lē fiafia iā te oe lava pe afai o e lagona e lē alofa se tasi iā te oe. Ia manatua, o loo silasila mai Ieova iā te oe. O se faataʻitaʻiga, o loo faamatala mai e le Tusi Paia Lea, o lē na teʻi ua nonofo ma Iakopo, ae na manaʻo Iakopo i lona uso laʻitiiti, lea foʻi na toe faaipoipo mulimuli ane ma Iakopo. E lē taumatea na matuā lagona e Lea le faanoanoa i lona mātauina e sili ona alofa Iakopo i lona uso. Ae na silafia e Ieova lona tulaga, ma foaʻi iā te ia se fanau, o tama e toʻaono ma le teine e toʻatasi, ma o se faamanuiaga tele lea auā i lea vaitaimi, na vaai i fanau o se mea e sili ona tāua! E lē gata i lea, na avea uma le fanau tama a Lea ma augātamā o ituaiga o Isaraelu. (Kenese 29:30-35; 30:16-21) E mautinoa lava, e ala i le alofa o Ieova, na matuā lagona ai e Lea le faamāfanafanaga!

I le lalolagi fou lea o loo folafola mai i le Tusi Paia, o le a lē toe iai se tasi e lagonaina ua lē alofagia o ia. Ae o le a iai i tagata uma le alofa moni. (Isaia 11:9; 1 Ioane 4:7-12) O lea, ia faaalia lo tatou faanaunauga ia iai i lenā taimi, e ala i le ati aʻe o le alofa e tusa ai ma le Tusi Paia, ma le alofa o loo faaalia e Lē ana le Tusia Paia. Ioe, o le olioli moni, e lē gata ina maua ona ua alofagia i tatou, ae e maua foʻi e ala i le faaalia i isi o le alofa e lē manatu faapito.—Mataio 5:46-48; 1 Peteru 1:22.

[Faamatalaga faaopoopo i le itulau 10]

“E sili le manuia [po o le fiafia] o lē na te foaʻi atu, i lo lē na te talia mai.”—Galuega 20:35

[Ata i le itulau 10]

A e manaʻo e alolofa tagata iā te oe, ia e alofa atu i isi