Vala Tāua Lona 6: Faamagalo

“Ia faaauau ona onosai le tasi i le isi, ma ia fefaamagaloaʻi ma le lotoatoa.”—Kolose 3:13.

Le Uiga. O ulugalii e taulau manuia, e aʻoaʻo mai mea ua tuanaʻi; ae e lē toe faitauina ma toe faamanatu e faapea, “Ua fai ma au masani le tuai mai” po o, “E lē taitai e faalogo.” E talitonu uma le tane ma le avā, “e matagofie le . . . lē manatua o le agaleaga.”—Faataoto 19:11.

Le Tāua. O le Atua, e “nofosauni e faamagalo,” ae e lē faapena tagata. (Salamo 86:5) O mea sesē ua tuanaʻi e leʻi foʻia, e tupu ai pea le ita ma faigatā ona faamagaloina. E lē fia talanoa le ulugalii i o la faalogona ma ua lē manatunatu ai i faalogona o le isi. O le a leai se fealofani i le la ulugalii.

Faataʻitaʻi mea nei. Toe matamata i lua ata tuai i le taimi na lua feoaʻi ai po o le amataga o la oulua faaipoipoga. Taumafai ia toe faaolaola le fealofani na iai a o leʻi aliaʻe faafitauli ma suia lou mafaufau i lou toʻalua. Mafaufau i uiga na e tosina ai i lou toʻalua i le amataga.

◼ O ā uiga o lou toʻalua e sili ona e fiafia i ai i le taimi nei?

◼ Ia mafaufau i ni aafiaga lelei i le lua fanau pe afai e lua te fefaamagaloaʻi.

Fai sau faaiʻuga mautū. Pe a lua feeseeseaʻi, mafaufau i auala e aua ai le toe taʻua mea sesē ua tuanaʻi a lou toʻalua.

E manaia pe a faamālō i lou toʻalua i ona uiga lelei.—Faataoto 31:28, 29.

Mafaufau i auala e iloa ai e lau fanau lou loto faamagalo.

E manaia ae talanoa ma lau fanau e faatatau i le loto faamagalo ma le aogā o lea uiga i tagata uma o le aiga.

[Ata i le itulau 8]

Pe a e faamagalo se agasala, ua pei ua e soloia se aitalafu. Aua le toe faamanatuina