Le Puna Moni o le Taʻitaʻiga ma le Faamoemoe

I LE lē pei o temoni, o Ieova le Atua e ou le atamai ma le malosi uma. O Ieova foʻi o le alofa lava ia. (1 Ioane 4:8) E aogā pea ana fautuaga, e na te aumai e aunoa ma se totogi, ma e naunau i mea e mo lo tatou lelei. E ese mamao mai i fautuaga a ē ua faapea mai e fesootaʻi ma tagata ua maliliu, ma ē e manatu e latou te iloa le lumanaʻi! Ua fetalai mai le Atua: “O outou uma o ē o fia feinu [faaleagaga]! Inā ō mai ia i le vai. O i latou foʻi e leai ni tupe! Inā ō mai ia e faatau ma aai. Ioe, inā ō mai e faatau le uaina ma le susu e tusa lava pe e leai se tupe ma e leai foʻi se tau e faatau ai. Aiseā ua outou totogi atu ai pea tupe i mea e lē o ni meaʻai, ma aiseā foʻi ua outou galulue mamafa ai ae e lē o faamalieina ai outou? Ia faalogo lelei mai iā te aʻu, ma aai i mea lelei, ma ia matuā fiafia o outou loto i mea lololo.”—Isaia 55:1, 2.

Talu ai na faagaeeina le Tusi Paia e Lē e alofa na Faia i tatou, ua tatou maua ai le faamoemoe, puipuiga faaleagaga, fuafuaga i le olaga, ma taʻiala e sili ona aogā e ola ai. Aiseā e lē manatunatu ai i fesili nei, ma mau o le Tusi Paia o loo taʻua ai?

[Pusa i le itulau 17]

● E faapefea ona ou maua le filemu moni? Ua taʻua i le Tusi Paia: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.”​—Isaia 48:17, 18.

● Po o le a iai pea le leaga? “Auā o ē e amio saʻo e latou te mau i le lalolagi, ma o ē e lē ponā e faatotoeina i le lalolagi. Ae e faaumatia o ē e amioleaga mai i le lalolagi, e liaʻieseina foʻi o ē e amio faapiʻopiʻo.” (Faataoto 2:21, 22) Ioe, o le a faaumatia e faavavau tagata ma agelu amioleaga, e pei ua faaumatia i se afi.​—Faaaliga 20:10, 14.

● Po o le a faaiʻuina maʻi ma puapuaga? “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua [faafitauli i aso nei].”​—Faaaliga 21:3, 4.

I le lē pei o temoni, e lē taitai talapepelo le Atua. O le mea moni, “e lē mafai ona tala pepelo” o ia. (Tito 1:2) E lē gata i lea, e pei ona faaalia i le mataupu mulimuli o lenei faasologa o mataupu, o lana upu moni e tuusaʻoloto ai, ma maua ai le ola.​—Ioane 8:32; 17:3.