Ua Fesili Mai Talavou

Aiseā e mumusu ai oʻu mātua ou te alu ou te tafao?

O Allison,a o se talavou i Ausetalia, e popole i taeao o Aso Gafua pe a alu i le aʻoga, ona e iloa e ia le mea o le a tupu.

Ua fai mai o ia: “E talanoa tamaiti i a latou mea na fai i le faaiʻuga o le vaiaso. E latou te faamatala tala fiafia, e pei o patī na ō i ai, o tama na latou feakisi, ma a latou tuliga ma leoleo . . . E foliga mai e mālie, ae e mataʻutia! E taunuu i fale ua tā le lima i le vaveao, ma e lē popole lava i ai o latou mātua. Ou te moe ae e leʻi taitai ona amata a latou patī!

“Ae pe a uma ona faamatala mai a latou mea na fai i le faaiʻuga o le vaiaso, ona fesili mai lea o tamaiti o laʻu vasega po o ā aʻu mea na fai. Ma o ā aʻu mea na fai? Na ou alu i sauniga faa-Kerisiano ma talaʻi. Ua ou lagona sa ou misia se avanoa e fiafia ai. Ona ou fai atu lea e leai ni aʻu mea na faia. Ona fesili mai lea pe aiseā na ou lē alu atu ai e matou te ō.

“E tuanaʻi loa le Aso Gafua, ua e mafaufau e lē toe talanoa tamaiti i na mea. Ae e leai. E oo ane i le Aso Lua, ua talanoa i mea o le a fai i le faaiʻuga o lea foʻi vaiaso! E na o loʻu nofonofo ma faalogologo i a latou tala. Ua ou lagona o loo oʻu misia nei mea e fiafia ai!”

PE E faapena ou lagona i le taeao o lou Aso Gafua i le aʻoga? Atonu e te lagona o loo tele mea faafiafia i fafo atu o lou fale, ae ua loka mau e ou mātua le faitotoʻa; pe faapea foʻi o loo e iai i se paka o loo fai ai ni taaloga, ae e faasā ona e taalo ai. E lē faapea e te manaʻo e fai mea uma lava o loo fai e au uō. Ae e na o lou manaʻo lava e te fiafia mo sina taimi! O se faaaʻoaʻoga, o lē fea faafiafiaga e sili ona e fiafia e te auai ai, i le faaiʻuga o lenei vaiaso?

◯ siva

◯ koneseti a tagata pepese

◯ tifaga

◯ patī

◯ isi mea ․․․․․

E te manaʻomia faafiafiaga. (Failauga 3:1, 4) O le mea moni, e finagalo Lē na faia oe ia e olioli i lou talavou. (Failauga 11:9) E mananaʻo foʻi ou mātua ia e fiafia, e ui atonu e te lē ioe i ai i nisi taimi. Peitaʻi, e lua mea tāua e manatu mamafa i ai ou mātua: (1) o ā au mea o le a fai, ma (2) o ai o le a tou faatasi ai.

E faapefea la pe afai ua valaaulia oe e au uō e tou te ō e tafafao, ae e te lē iloa po o le ā le tali a ou mātua? Pe a fesagaʻi ma se filifiliga, o loo faalaeiau e le Tusi Paia oe ia iloilo ou manatu, le lelei ma le leaga, ma fuafua iʻuga e iʻu i ai. (Teuteronome 32:29; Faataoto 7:6-23) E tusa ai ma le valaaulia a au uō e tou te ō e tafafao, o ā filifiliga e te faia?

FILIFILIGA 1: AUA E TE FAI I OU MĀTUA​—TAU LAVA INA ALU.

Pogai e tatau ai ona e iloilo lenei filifiliga: E te fia faaalialia atu i au uō, e te pule lava oe iā te oe. Ua e manatu e sili atu lou iloa i lo o ou mātua, pe e te lē faaaloalo foʻi i lo la tulaga pule.​—Faataoto 15:5.

Iʻuga: O le a iloa e au uō se mea e uiga iā te oe—e te pepelo. Pe afai na e pepelo i ou mātua, e te ono pepelo foʻi la i au uō. Pe a iloa e ou mātua, o le a tigā o la faalogona ma faapea ua ʻolegia i laʻua, ma atili ai ona mumusu e tuu oe e te alu i mea e te fia alu i ai! O se mea valea lou lē usiusitaʻi i ou mātua, ma alu e aunoa ma lou fai i ai.—Faataoto 12:15.

FILIFILIGA 2: AUA LE FAI I AI​—AUA LE ALU.

Pogai e tatau ai ona e iloilo lenei filifiliga: Ua e mafaufau i le valaaulia, ma iloa ai e lē talafeagai lea mea ma mataupu silisili ua e aʻoaʻoina, pe manatu foʻi, o nisi o loo valaaulia e lē o ni aumea lelei. (1 Korinito 15:33; Filipi 4:8) Ae i le isi itu, e te fia alu, ae e lē mafai ona e fai i ou mātua.

Iʻuga: Pe afai ua e lē alu ona e te iloa e lē o se mea lelei, o le a atili ai ona e mautinoa le tali e fai atu i au uō. Ae afai e te lē alu ona e lē mafai ona e fai i ou mātua, atonu o le a e nofonofo i le fale ma mafaufau pea i le valaaulia, ma manatu e na o oe lava lea e lē o fiafia.

FILIFILIGA 3: FAI I AI​—MA FAATALI.

Pogai e tatau ai ona e iloilo lenei filifiliga: E te iloa e pule ou mātua iā te oe, ma e te faaaloalo i lo la tulaga pule. (Kolose 3:20) E te alofa i ou mātua ma e te lē fia faatigā iā i laʻua, e ala i le sola e ō ma au uō. (Faataoto 10:1) Ua e maua ai foʻi le avanoa e faamatala atu ai le mea lea e te manaʻo i ai.

Iʻuga: Ua iloa e ou mātua e te alofa ma faaaloalo iā i laʻua. Ma afai e la te iloa e talafeagai le mea o loo e manaʻo ai, atonu o le a la fai atu e te alu.

Le Pogai e Ono Mumusu ai Mātua

Ae faapefea pe a fai atu ou mātua, e leai? E te ono lē fiafia. Peitaʻi, o le malamalama i lo la manatu, e fesoasoani iā te oe e feagai ai ma lea tulaga. O se faaaʻoaʻoga, e la te ono fai atu e leai, ona o nisi o māfuaaga nei.

E sili atu lo la iloa ma le poto masani. Pe afai ua faataga oe, e foliga mai o le a e filifili e taʻele i se matafaga o loo iai ni tagata e vaavaaia le saogalemu o tagata tāʻeʻele. Aiseā? Auā a o e taʻele fiafia i le vai, e te lē o iloa e iai ni mea e lamatia ai. A o ē e vaavaaia le saogalemu, e latou te iloa lelei vaega o le sami e lamatia.

E faapena foʻi ou mātua, ona e sili atu lo la iloa ma le poto masani, e la te iloa lelei la mea e lamatia ai, ia e te lē o iloaina. I le pei o ē e vaavaaia le saogalemu i le matafaga, o le sini o ou mātua, e lē ina ia e lē fiafia, ae ia fesoasoani iā te oe e ʻalofia mea e lamatia ai, ma e lē fiafia ai i le olaga.

E alolofa iā te oe. O le faanaunauga sili o ou mātua, ia puipuia oe. O le alofa, e uunaʻia ai i laʻua e fai atu ioe pe a mafai, ae leai pe afai e lē tatau. Pe a e faanoi i ou mātua i se mea e te manaʻo e fai, e la te fesili ifo iā i laʻua lava pe mafai ona la faataga oe, ma e tuuaʻia i laʻua i ni mea e tutupu mulimuli mai. Pe afai ua mautinoa e ou mātua e leai se mea e afāina ai oe, ona la ioe loa lea ma faataga oe.

E lē lava faamatalaga o loo avatu iā i laʻua. O mātua alolofa, e taumafai lava e lagolago le itu e saogalemu ai. Pe afai e la te lē malamalama i le mea o loo e manaʻo ai, pe la te lagona foʻi e te lē o faamatalaina atu mea tāua, o avanoa la na o le a la fai mai ai, e leai.

Auala e Mafai ai Ona Faataga Oe e Ou Mātua

E fā auala.

Faamaoni: Muamua, ia fesili ifo ma le faamaoni iā te oe lava: ʻAiseā ou te fia alu ai? Pe ona ou te fiafia i le mea lea e fai, po ou te manaʻo ia fiafia mai aʻu uō iā te aʻu? Pe ona o le a iai i inā se tasi ou te fiafia i ai?’ Ia tautala saʻo i ou mātua. Sa talavou foʻi i laʻua, ma e la te iloa lelei oe. E la te iloa lelei foʻi māfuaaga moni e te faia ai mea. E la te talisapaia lou faamaoni, ma o le a e maua aogā mai i lo la atamai. (Faataoto 7:1, 2) I le isi itu, afai e te lē faamaoni, ua lē maufaatuatuaina oe, ma e lē maua ai se faatagaga mai i ou mātua.

Taimi: Aua e te tauanauina ou mātua i mea e te manaʻo i ai, pe afai o lea faatoʻā la taunuu mai i le galuega, po o uaʻi atu i isi mataupu. Talanoa atu iā i laʻua pe afai ua mālōlō. Ae aua e te faatali seʻi oo i le taimi mulimuli, ona e taumafai lea e tauanau i laʻua ia tali mai. E lē mananaʻo ou mātua e faia se faaiʻuga faatopetope. Ia vave fai i ai, ma o le a la talisapaia lou magafagafa.

Faamatala saʻo atu mea uma: Faamatala atu mea uma e tatau ona iloa e ou mātua. Faamatala atu le mea tonu o loo e manaʻo e fai. E lē fiafia mātua pe a e tali atu, “Ou te lē iloa,” aemaise pe a la fesili mai: “O ai o le a iai i inā?” “Po o le a iai se tagata matua maufaatuatuaina?” ma “O le ā le taimi e uma ai?”

Uiga: Aua e te manatu i ou mātua, o ni fili. Ia manatu i ai o nisi e tou te ʻau, auā o i laʻua e iloiloina mea uma. Pe afai e te manatu i ou mātua o se ʻau, e te lē faatautee atu la i ai, ma o le a outou galulue felagolagomaʻi. Afai e la te fai mai e leai, ia fesili atu i ai ma le faaaloalo pe aiseā. O se faaaʻoaʻoga, afai e fai mai e te lē alu i le koneseti, taumafai e iloa le māfuaaga e mumusu ai. Pe e lē fiafia i le tagata pese, le nofoaga e fai ai, tagata o le a tou iai faatasi, po o le totogi e ulu ai i le koneseti? ʻAlofia faaupuga e pei o le, “E te lua lē talitonuina aʻu,” “O la foʻi e ō isi tamaiti,” pe “O la e faataga e mātua o aʻu uō i latou e ō!” Ia faailoa atu i ou mātua ua lava lou matua e talia ai ma amanaʻia la la faaiʻuga. Pe a e faia faapea, o le a la faaaloalo atu iā te oe. Ma i se isi taimi, o le a la lē faatalatū e ioe atu e te alu.

E maua isi mataupu faa-Peretania o le faasologa, “Ua Fesili Mai Talavou” i le Initaneti i le www.watchtower.org/ype

[Faaopoopoga i lalo]

[Ata i le itulau 11]

“E faatuatuaina tele aʻu e oʻu mātua, auā ou te iloa lelei lava le mea e fai. Ou te talanoa lava iā i laʻua e uiga i aʻu uō. Ou te lē fefe foʻi ou te alu ese mai se faatasitasiga, pe a ou lē fiafia i mea o loo faia ai.”

[Ata]

Kimberly

[Ata i le itulau 12]

AISEĀ E LĒ FESILI AI I OU MĀTUA?

Pe e te fia iloa le manatu o ou mātua e tusa ma manatu ua lāgā i lenei mataupu? E pau le auala e te iloa ai, o le fesili atu iā i laʻua! Pe a talafeagai le taimi, talanoa i ai e uiga i ni o la manatu e tusa ai ma le alu e tafao. Mafaufau i se fesili e te fia fesili atu ai iā i laʻua, ona tusi lea i le pito i lalo.

․․․․․

[Ata i le itulau 12]

I le pei o ē e vaavaaia le saogalemu i le matafaga, e iloa lelei e ou mātua lamatiaga e ao ona lapataʻia ai oe