Tuʻinanau i Faiga Sauā

UA MATUĀ tuʻinanau le lalolagi i aso nei i faiga sauā, ma ua leva ona faaauilumaina i faafiafiaga. Peitaʻi, ua taʻua i le Media Awareness Network, “i tausaga talu ai, ua suia ma ua sili atu ona faateteleina faiga sauā i faasalalauga.” E lē gata ua “matuā matilatila mai gaoioiga sauā, faiga tau feusuaʻiga, ae faapea foʻi amioga e sili ona matagā.” Iloilo manatu o loo mulimuli mai.

Musika: Ua taʻua foʻi i le tusi o loo i luga, “ua tele ina talia i pisinisi faimusika,” ia musika o loo faaauiluma ai upu sauā. O nisi musika ua faaaogā gagana matagā e lagolagoina ai le fasioti tagata, ma le faia o faiga aiga faamalosi i avā ma tinā.

Taaloga Vitiō: Ua taʻua i se mekasini mo taaloga vitiō i Peretania, “ua tele ina faaalia i taaloga vitiō gaoioiga faamasaatoto. O se tagata e fiafia i taaloga vitiō, e fiafia foʻi i faiga sauā.” Mo se faataʻitaʻiga, o se tasi o taaloga vitiō e sili ona fiafia i ai tagata, o le taaloga lea e sasa ai fafine i pate kirikiti seʻia iʻu ina feoti. E manatu nisi pulega, e sili atu ona malolosi taaʻiga leaga e oo i tamaiti mai i taaloga vitiō, nai lo o mea o faaalia i TV.

Ata Tifaga: Ua faaalia i suʻesuʻega e faapea, ua faateteleina faiga sauā, feusuaʻiga lē mamā, ma gagana masoā i ata tifaga, ma ua lē toe maufaatuatuaina i latou o pāsia nei ata. Ua taʻua atili foʻi e toetoe o le ʻafa o faiga sauā o loo faaalia i TV, ata tifaga ma vitiō musika, o loo faia e “tagata e faaautū” i ai ata.

Tala Fou: Ua iloa lelei e i latou e faia tala fou i le TV, e toʻatele tagata e mananaʻo ma fiafia e matamata i tala fou e faaalia ai faiga sauā. O lea la, e faaosofia ai foʻi le ʻaufaipisinisi e faasalalau a latou oloa i le taimi o tala fou, auā o i latou ia e totogiina polokalame a le TV.

Initaneti: Ua faaalia foʻi i le initaneti ata o gaoioiga sauā, le fasi faamoʻamoʻa ma le fasiotia o tagata. E toʻatele tamaiti e matamata i nei tuatusi i le initaneti.

Faiga Sauā i Faasalalauga —Pe Mafai Ona Taaʻina ai Oe?

Pe e taaʻina moni tagata i faiga sauā i le TV, ata tifaga, tusi, musika ma isi faafiafiaga? E masani lava ona finau mai i latou e maua polofiti mai i nei vala e faapea, e lē leaga a latou faasalalauga. Ae manatua foʻi: Ina ia taaʻina mai mafaufau o tagata, ua totogi e le ʻaufaipisinisi le faitau piliona tālā mo a latou faasalalauga faapisinisi, ia e na o le taʻi 30 sekone le umi. Pe e lē sili atu ea la ona taaʻina mafaufau o tamaiti i ata tifaga e taʻi 90 minute le umi, ia e faaalia ai faiga sauā ma lē mamā?

O Ieova o Lē na faia i tatou, e sili atu lona silafia o tulaga o tagata nai lo o i tatou. O le ā ua ia taʻu mai e uiga i le faatasitasi ma tagata sauā, e aofia ai ē o loo faafiafiaina i tatou e ala i a latou faasalalauga? Seʻi manatu i mau faale-Tusi Paia o loo mulimuli mai:

● “E suʻesuʻe e Ieova o lē e amiotonu atoa ma lē e amioleaga, e inosia lava e Ia le tagata e fiafia i le faasauā.”—Salamo 11:5.

● “Aua e te faauō i se tasi e maitaita; aua foʻi e te faifai mea faatasi ma se tagata e ita leaga, neʻi e mulimuli i ona ala ma maileia ai lou ola.”—Faataoto 22:24, 25.

O le mea moni, e lē mafai ona tatou ʻalofia taaʻiga leaga. Ae e mafai ona tatou filifili lelei faafiafiaga ma tagata e tatou te faifaimea faatasi. O lea, ia fesili ifo iā te oe lava: ʻO le ā le ituaiga o tagata ou te manaʻo ia ou iai?’ Ia faatasitasi ma tagata o ē e tutusa o tatou sini ma mea e faatāua.—Faataoto 13:20.

Talu ai e taaʻina o tatou uiga agaʻi i faiga sauā ona o aumea ma faafiafiaga e tatou te filifilia, e ono taaʻina foʻi la i tatou i isi mea. O ā na mea?

[Ata i le itulau 5]

E taaʻina o tatou uiga agaʻi i faiga sauā ona o faafiafiaga e tatou te filifilia