MEA O TUTUPU I LE LALOLAGI

Fagaloa o Mekisikō

Iā Aperila 2010, na pā ai le suāuu i le mea e vili ai le suāuu i le sami. E telē se aofaʻi o le suāuu ma le kasa na vave ona salalau atu i le sami, i le toetoe tolu masina. Ina ua mavae le lua ma le ʻafa masina talu lenei faalavelave, na maua i suʻesuʻega ua mou atu nisi o meaola na aafia. Na latou manatu ua faatamaʻia uma ona o le siama (bacteria) mai i le kasa e taʻu o le methane e i totonu o le suāuu. Ae e lē ioe i ai nisi o tagata suʻesuʻe atamamai. E latou te talitonu o le tele o le suāuu ua goto ma toʻa i le alititai.

Rusia

Na lipotia mai i le nusipepa o le Rossiiskaya Gazeta, o le 59 pasene o tagata Rusia mai le 18 i le 35 tausaga, e talitonu e faapea “ina ia taulau manuia i le olaga, e tatau ona fai i nisi taimi le mea e te loto i ai, nai lo o le tausisi i au tulafono ma tapulaa tau amio.”

Peru

O nisi o saga aupito i leva ia ua toe maua, (e pei ona faaalia i luga), ua iloa mai ai, sa faaaogā e tagata Peru i mātū nei saga e fai ai popcorn ma falaoamata, i le toetoe 3,000 tausaga ua mavae.

Italia

E talitonu le epikopō Katoliko o Lucio Soravito De Franceschi mai i Adria-Rovigo, e ao ona “faaoo tuusaʻo atu i tagata taʻitoʻatasi” le feʻau faalotu i mea o loo nonofo ai. Na ia taʻua, “o la tatou galuega faafaifeʻau, e ao ona ō e oomi logo o faitotoʻa o fale o tagata, ae lē o le tātā o le logo ma faatalitali tagata.”

Aferika i Saute

E $65,000 (Amerika) i le kalama (2.2 pauna), ua siitia ai le tau e faatau faasolitulafono ai seu o le rhinoceros e faaaogā mo togafitiga faafomaʻi. I le 2011 i Aferika i Saute, na faamauina ai le tusa ma le 448 o rhinos na fasimate e tagata gāoi ma ave faasolitulafono manu. Na osofaʻia e ni kegi na saʻilia seu o nei manu, falemataʻaga ma potu e fai ai faatautuʻi i Europa. E oo lava foʻi i pā manu (zoo) i nisi atunuu i Europa, ua lē o toe malupuipuia ai nei manu.