Mea o Tutupu i le Lalolagi

Italia

I le tausaga e 2011, e tele atu uila vilivae na faatauina nai lo o taavale. O nisi o māfuaaga ona o le paʻū maulalo o le tamaoaiga, taugatā le penisini, aemaise le tele o tupe e alu i le faaleleia o taavale. Ae o uila vilivae e taugofie ma tausigofie.

Armenia

Na aumaia le iʻuga a le Faamasinoga o Aiā Tatau i Europa e faapea, ua lē amanaʻia e le malo o Armenia aiā tatau a ni alii talavou Molimau a Ieova e toʻa 17, o ē na faafalepuipuiina ona o le tetee e auai i vaegaʻau. Na faatonuina e le faamasinoga le malo o Armenia ina ia totogi mea na faaleagaina, faapea ma le totogiina o le faamasinoga.

Iapani

E mai i tamaiti na faaleagaina, e 63 pasene le aofaʻi o i latou e leʻi maua ni lapataʻiga mai i o latou mātua, e faatatau i lamatiaga o le faaaogāina o le tuatusi i le initaneti e faauō ai ma isi. E mai i le 599 o mataupu na iloiloina e faatatau i tamaiti na faaleagaina, na faapea mai le 74 pasene o i latou na faaleagaina tamaiti, o lo latou sini i le faaaogāina o nei tuatusi, o le faia lea o feusuaʻiga ma tamaiti.

Saina

Ua faatapulaaina le lesitalaina o taavale fou i taulaga tetele, ina ia faaitiitia ai le tele o taavale i luga o auala tetele. O se faataʻitaʻiga, e lē sili atu ma le 240,000 taavale e lesitalaina i le tausaga i Beijing. Iā Aokuso 2012, pe tusa ma le 1,050,000 i latou na ave o latou igoa i le seʻi mo le lesitalaina o taavale, lea e na o le 19,926 i latou e mafai ona maua pepa lesitala. O lona uiga, e 1 mai le 53 i latou e mafai ona faamanuiaina.