E Mataʻina o Tatou Loimata
E TATOU te fetagisi mai lava i le taimi tatou te fananau mai ai. Ua faamatalaina e se tasi tagata atamai, o le tagi a le pepe e taʻu atu ai i lona tinā ona faalogona ma manaʻoga. Peitaʻi, aiseā tatou te fetagisi ai pea a o faasolo ina matutua, ae o loo iai isi auala e faailoa atu ai o tatou faalogona ma manaʻoga?
E tele māfuaaga e tatou te fetagisi ai. E māfua ona o le lotomafatia, lē fiafia po o se mea foʻi e tigā o le tino po o le mafaufau. Peitaʻi e iai foʻi loimata o le fiafia, aemaise pe a tatou olioli, maua se mapusaga, pe ausia foʻi ni sini i le olaga. E mafai ona aafia isi pe a tatou fetagisi. Na faapea mai Maria: “E lē mafai ona taofia oʻu loimata pe a ou vaai atu o tagi se tasi, e tusa lava po o le ā le māfuaaga e tagi ai.” Atonu foʻi tatou te fetagisi pe a tatou matamata i se ata, pe faitau foʻi i se tala o loo i se tusi.
Po o le ā lava le māfuaaga, ae o le tagi o se auala malosi lea e faaleo atu ai ou lagona e aunoa ma se upu. Ua faamatalaina e le tusi o le Adult Crying: “E iai nisi auala e mafai ona faaleo atu ai ou lagona e aunoa ma le fai atu o se upu.” O loimata e uunaʻia ai nisi e faia se gaoioiga. O se faataʻitaʻiga, o loimata o le faanoanoa e taʻu mai ai o loo mafatia se tasi, ma e uunaʻia ai tatou e avatu se fesoasoani ma se faamāfanafanaga i lē o loo tagi.
E talitonu le toʻatele o tagata atamamai o le tagi e faaleleia ai faalogona, ma e afāina le soifua mālōlōina pe a fai ma masani le taofiofi o loimata. Peitaʻi, e teena e isi lenā manatu, ma e faapea mai e lē o lagolagoina e le faasaienisi. E ui i lea, na lipotia mai e nisi o suʻesuʻega, o le 85 pasene o fafine ma le 73 pasene o tamāloloa na faapea mai, e lelei o latou faalogona pe a uma ona fetagisi. Ua faapea mai Noemí: “O nisi taimi ou te iloa lava e tatau ona ou tagi. Pe a uma ona ou tagi, ona lelei lea o oʻu faalogona ma toe maua nisi manatu lelei.”
Na lipotia mai e nisi o suʻesuʻega, o le 85 pasene o fafine ma le 73 pasene o tamāloloa na faapea mai, e lelei o latou faalogona pe a uma ona fetagisi
Peitaʻi, e lē o taimi uma e tatou te fetagisi ai e mapu ai o tatou faalogona. E faalagolago foʻi i le auala e tali mai ai isi. O se faataʻitaʻiga, e tatou te lagona le toʻafilemu pe a fesoasoani pe faamāfanafana mai nisi pe a tatou fetagisi. Ae e tatou te māsiasi pe a lē amanaʻia o tatou loimata.
E manino mai, e iai lava nisi mea tatou te lē o malamalama ai e uiga i loimata. Ae pau le mea ua tatou iloa, o le tagi o se auala mataʻina mai iā Ieova e faailoa atu ai o tatou faalogona.