MEA O TUTUPU I LE LALOLAGI

Iunaite Setete o Amerika

I le aai o Los Angeles, i Kalifonia, ua toeitiiti oo atu i le 4,500 molī faailoilo o le auala ua mumū i le taimi e tasi, ma ua faasopolia ai le pe tusa ma le 469 maila faatafafā (1,215 kilomita) o le vaipanoa. E tusa ai ma faamatalaga a le nusipepa The New York Times, “o le aai o Los Angeles o le vaega muamua lea o le lalolagi ua faatino ai lea faiga.”

Le Lalolagi

Ua faaalia mai i se suʻesuʻega a le soifua mālōlōina i le lalolagi aoao, e 82 pasene ua faateleina ai i latou ua aafia i le tino puta talu mai le 1990 seʻia oo mai i le 2010. O le tino puta ua maliliu ai le toʻatele, ma i se fua faatatau e tusa e faatoluina taimi e sili atu ai nai i lo o i latou e maliliu i le lē lava o meaʻai, e ui e lē o lava pea meaʻai i le tele o atunuu. Na taʻua e Majid Ezzati o sē na taʻitaʻia se suʻesuʻega e faapea “talu mai le 20 tausaga ua mavae sa tau lē lava meaʻai, a o le taimi lenei ua tele meaʻai ae ua lē lelei mo le soifua mālōlōina, e oo lava i atunuu e utiuti le tamaoaiga, ma o le pogai lea ua tatou mamaʻi ai.”

Midway Island

O le “manulele pito i matua i le lalolagi,” o le Laysan albatross na taʻua ua toe fofoa nei. O le ā le matua o lenei manulele? I le 1956 na maua ma faailoga ai lenei manu i le pe tusa ma le lima tausaga o lona matua, ae ua silia ma le 60 tausaga lona matua i le taimi lenei. Talu ona ola lenei manulele ua lua i le tolu miliona maila (3 i le 4 miliona kilomita) le mamao ua lele ai, lea e tutusa ma le fā pe ono malaga e alu ma toe foʻi mai i le masina.

Aferika i Saute

Ua faapea mai se tasi o suʻesuʻega i Aferika i Saute, o le tasi vae tolu o tamaʻitaʻi i Aferika e latou te faaaogāina se kulimi ma se fasimoli, e iai se vailaau faapitoa e faapaepae ai o latou pau. O na mea, e telē se lamatiaga, ma ua tele atunuu ua faasā ai. O nei kulimi ma fasimoli, e tele ona aafiaga e aofia ai le kanesa o le paʻu, faaleagaina o fatugaʻo, lotomafatia faaumiumi, popole, pata ma le mailaila ai o le tino.