Vae o le Solofanua

E MAFAI ona tamoʻe saoasaoa se solofanua e oo atu i le 30 maila i le itula (50 km). E ui lava o lenei gaoioiga e manaʻomia ai ni taumafaiga matuā malolosi, peitaʻi e itiiti le malosi e alu ai. E faapefea ona tupu lenei tulaga? O vae o le solofanua.

Seʻi iloilo le mea e tupu pe a tamoʻe saoasaoa se solofanua. E taofi e uaua o le sooga ia e memeʻi, le malosiaga pe a paʻi vae o le solofanua i le eleele. I le pei o se sipuligi, e toe faamatuu atu e uaua o le sooga lenā malosi ma uunaʻi ai i luma le solofanua.

E lē gata i lea, pe a tamoʻe se solofanua, e matuā tetete ona vae ma e mafai ona afāina ai uaua i sooga. Peitaʻi, e taofiofi e maso o loo i vae le tetete. Ua taʻua e tagata suʻesuʻe “e matuā mataʻina le fausaga o le uaua o le sooga,” lea e maua ai le malosi ma vave gaoioi ai vae o le solofanua.

Ua taumafai inisinia e faataʻitaʻi i le fausaga o vae o le solofanua, e ala i le faia o ni masini e fā vae. Ae ua taʻua i le Biomimetic Robotics Laboratory a le Aʻoga o Matātā Eseese i Massachusetts, ona o le lavelave o lenei fausaga, ua faigatā ai i mea o loo iai i aso nei ma le tomai faainisinia ona faataʻitaʻi i lenei fausaga.

O le ā sou manatu? Pe na teʻi lava ua iai lenei fausaga i vae o le solofanua? Pe na foafoaina?