Le Iʻa o le Fuga​—Po o se Masini Fai Oneone?

O FEA e maua mai ai le oneone? E tele auala e maua mai ai. Ae e ono faateʻia oe i le auala o loo taʻua i inei. O le iʻa o le fuga e na te ʻaina le ʻamu ma maua mai ai le oneone!

E maua le iʻa o le fuga i ogāsami e māfanafana. E folo e le fuga fasi ʻamu, ona ia faaaogā lea o meaʻai ninii o loo pipii i ʻamu, a o isi mea e na te aumaia i fafo i ona otaotavale ua avea ma oneone. Ua mafai ona faia faapea e le fuga, e ala i le faaaogā o lona auvae ma ona nifo malolosi e pito i tua. O nisi ituaiga o fuga e oo atu i le 20 tausaga o ola pea, ma e lelei pea o latou nifo.

I isi ogāsami, e tele ʻamu pepē e ʻaina e fuga, ma e tele atu le oneone e maua mai i le fuga nai i lo o se isi lava auala e maua ai le oneone. I se fua faatatau, ua faapea mai tagata suʻesuʻe, e faitau selau pauna (kg) o le oneone e maua mai i se fuga i tausaga taʻitasi.

E iai se isi vala tāua e faia e le fuga. A o ʻaina e le fuga ia limu ma isi mea o loo sosolo i ʻamu, ua ia faamamāina ʻamu ma faatumauina ai le tulaga lelei o aʻau. Pe a leai ni fuga po o isi meaola o le sami e ʻaina limu, e vave lava ona pepē ʻamu ona o le mafiafia o le limu. Na taʻua i le tusi Reef Life, “Ua faapea mai nisi, pe ana leai meaola i le sami e ʻaina limu, semanū e lē iai ni aʻau lelei o loo iai i aso nei.”

E alu le tele o le malosi o le fuga i le ʻaina o ʻamu, ma e manaʻomia ai ona mālōlō lelei i le pō. E uiga ese foʻi le fuga i lea itu. E tele iʻa feʻai e feoaʻi i le aʻau i le pō, ma e ui e masani ona moe le fuga i lalo o papa, ae e lamatia lava i malie feʻai.

Ina ia puipuia atili i latou, e taataʻai e nisi fuga o latou tino i le pō i se vavale e sau mai i o latou gutu. O lenei vavale e ati ai le vaai, ma e talitonu saienitisi o le manogi leaga o lenei vavale, e māfua ai ona lē ʻaina e se iʻa feʻai le fuga.

O le fuga o se tasi o iʻa e aupito i aulelei i iʻa o le aʻau. E tele lanu o le fuga, ma e suisui a o faasolo ina matutua. E lalata fuga i ogāsami e tau lē fagotaina ai. O lea, e faigofie ai i tagata ona faalatalata i fuga ma mātau a latou gaoioiga.

E lē mafai ona galo i tagata maulu i aʻau, le vaaiga a o latou matamata ma faalogo atu o ʻatiʻati e le fuga ia ʻamu. E lē gata e aulelei fuga, ae e latou te faamamāina foʻi lo latou siʻomaga auā isi meaola o le aʻau, ma maua ai e tagata aogā.