Pe a Faauma se Faigāuō

LE LUʻI

“Na ou faapea ua ou maua le tagata e fetaui lelei mo aʻu. Na ou manatu ʻo le a ma nonofo i le olaga atoa.’ Ae i le mavae ai o le lua masina talu ona ma feoaʻi, na tatau loa ona faauma. Ou te lē talitonu ona sa lelei le ma faigāuō, ae o lea ua vave ona faauma!”​—Ana.a

“Na foliga mai e tele mea e ma te tutusa ai. Sa ou matuā mautinoa o le a ma faaipoipo. Peitaʻi, a o faagasolo taimi, na ou iloa ai e matuā eseese lava i maʻua. Ina ua ou iloa e sesē laʻu filifiliga, na ou faauma loa le ma faigāuō.”​—Elaine.

Pe na oo se tulaga faapea iā te oe? Pe afai ioe, o le a fesoasoani lenei mataupu iā te oe e feagai ai ma lenā tulaga.

MEA E TATAU ONA E ILOA

E tigā pe a faauma se faigāuō, e tusa lava po o oe na faaumaina. E ono masina talu ona feoaʻi Sara ma lana uō, ae faauma loa le la faigāuō. Na faapea mai Sara: “Sa matuā ootia oʻu faalogona! Sa māfana ma agaʻi i luma le ma faigāuō, ae o lea ua faauma. Pe a ou faalogo i pese sa ma fiafia uma i ai, ou te toe manatua ai taimi na ma fiafia faatasi ai. Ou te alu i nofoaga e pele iā i maʻua, ma ou te lagona le mafatia ona ua lē toe iai o ia. O lagona uma nei na oo iā te aʻu e ui o aʻu na faaumaina le ma faigāuō!”

E ui e tigā le faauma o se faigāuō, ae o se mea lelei. Ua faapea mai Elaine, “E te lē manaʻo e faatigā i le isi tagata. Peitaʻi ua e iloa, pe a faaauau pea le lua faigāuō ae e lē o sologa lelei, o le a lua tigā uma.” E ioe Sara i lenā manatu. Na faapea mai o ia, “Ou te iloa a e lē fiafia i lau uō, atonu o le a e lē fiafia foʻi pe a e faaipoipo i ai. O lea, e sili ai la le faauma.”

Pe a faauma le lua faigāuō, e lē faapea ai ua e lē taulau. O se faigāuō e taulau e iʻu i le faia o se faaiʻuga, ae e lē faapea e na o se faaipoipoga. Pe afai e te lua lē o mautonu uma, o le faaiʻuga saʻo la o le faauma. Pe afai e tupu lenā tulaga, e lē faapea ai ua e lē taulau. E mafai lava ona e agaʻi i luma! E faapefea?

MEA E MAFAI ONA E FAIA

Amanaʻia faalogona tigā. Na taʻutino mai Elaine lea na taʻua i le amataga: “Ua lē toe iai laʻu uō ma ua leai laʻu uō mamae.” Pe a faauma le lua faigāuō ma se tasi na e māfana i ai, o se mea masani le tigā o ou faalogona mo sina taimi. Na faapea mai Atamu, “Ua uma le faigāuō, ma e mautinoa e iai faalogona tigā, e tusa pe e te iloa o le mea tonu lea e tatau ona fai.” E ono tutusa ou faalogona ma le tupu o Tavita lea e taʻua i le Tusi Paia. Na tusi o ia a o mafatia: ʻUa lofia loʻu moega i le pō atoa i oʻu loimata.’ (Salamo 6:6) O nisi taimi o le auala sili e foʻia ai faalogona tigā, o le fesagaʻia lea o na tigā, nai lo o le taumafai e sola mai ai. O lou amanaʻia o ou faalogona tigā, o se laasaga muamua lea e fesoasoani e toe faaleleia ai ou faalogona.​—Mataupu silisili o le Tusi Paia: Salamo 4:4.

Faatasitasi ma i latou e alolofa iā te oe. O le mea moni e lē faigofie ona faia faapea. Ua faapea mai Ana lea na taʻua muamua, “Ou te leʻi toe fia vaai i se tagata. Sa ou manaʻomia se taimi e toe faaleleia ai oʻu faalogona, ma toe mafaufau ai i le mea ua tupu.” A o faagasolo taimi, na iloa ai e Ana le atamai o le faatasitasi ma ana uō mamae, o ē e faalaeiauina o ia. Na faapea mai o ia: “Ua toe lelei oʻu mafaufauga, ma ua lē o toe mamafa le mea na tupu e pei o le taimi na faatoʻā tupu ai.”​—Mataupu silisili o le Tusi Paia: Faataoto 17:17.

Aʻoaʻo se lesona mai i le mea na tupu. Ia fesili ifo iā te oe lava: ʻPo ua faaalia mai ai i le mea na tupu, e iai ni vala e manaʻomia ona ou faaleleia? Pe e iai se isi auala ou te faia i se isi aʻu faigāuō?’ Ua faapea mai se tamaʻitaʻi e igoa iā Mati, “A o faagasolo taimi, sa mafai ona ou toe iloilo le mea na tupu. Na umi se taimi faatoʻā lelei oʻu faalogona ma toe sagatonu ai oʻu mafaufauga.” E faapena foʻi manatu o Atamu lea na taʻua i luga. Na ia taʻua: “E tausaga atoa faatoʻā teʻa mai i loʻu mafaufau laʻu faigāuō ua uma. Na umi se taimi faatoʻā ou aʻoaʻoina ni lesona mai i le mea na tupu. E tele ni lesona ua ou aʻoaʻoina mai ai e faatatau iā te aʻu, o le isi itupā, ma faigāuō. Ua faasolo ina mou atu le tigā o oʻu faalogona.”

Ia tatalo e faatatau i ou popolega. Ua taʻua i le Salamo 147:3, e ʻfaamālōlō e le Atua ē ua loto momomo, ma fusifusia o latou manuʻa tigā.’ E ui e na te lē filifilia se paaga mo i tatou, e lē tuuaʻia foʻi o ia pe a faauma se faigāuō, ae e naunau mai le Atua mo lo tatou lelei. Ia sasaa atu ou faalogona iā te ia e ala i le tatalo.​—Mataupu silisili o le Tusi Paia: 1 Peteru 5:7.