Pe a Maʻi Sē e Pele iā te Oe

O le vaai o le fomaʻi ma le taofia i le falemaʻi, e ono lagona ai e se tasi le popole. Ae e pei o le tulaga na tupu iā Maribel, e tāua tele le mauaina o le fesoasoani mai i se uō po o se tauaiga, ma e ono faasaoina ai le ola o se tasi. E faapefea ona e fesoasoani i sē e pele iā te oe?

A o leʻi ō e vaai le fomaʻi. Ia fesoasoani i lē o loo maʻi e tusi i lalo ni āuga o lona maʻi, faapea vai ma fualaau o loo ia inuina. Ia tusi foʻi i lalo ni fesili e tatau ona fesili ai i le fomaʻi. Fesoasoani i lau uō ia manatua so o se faamatalaga i lona maʻi, po o ni faamatalaga i nisi o lona aiga na maua i lea maʻi. Aua neʻi manatu ua iloa e le fomaʻi na faamatalaga, pe faatali foʻi seʻiloga ua fesili mai le fomaʻi.

A o siaki e le fomaʻi. Ia faamautinoa o loo oulua malamalama uma ma lē o loo maʻi i faamatalaga a le fomaʻi. Ia fai atu ni fesili ae aua le faia ni faamatalaga e lē faavaea. Ia tuu le avanoa i lē o loo maʻi e talanoa ma fesili atu ai i le fomaʻi. Ia faalogologo lelei ma fai ni faamaumauga. Ia fesili e faatatau i ni togafitiga eseese e aogā. I nisi tulaga, atonu e lelei pe a fesili i lē o loo maʻi pe e manaʻo e vaai se isi fomaʻi mo sona manatu.

Pe a uma ona siaki e le fomaʻi. Ia toe iloilo ma lē o loo maʻi mea na outou talanoa ai ma le fomaʻi. Ia faamautinoa e saʻo vai ma fualaau e aumai. Ia faalaeiau lē o loo maʻi ia saʻo vai ma le aofaʻiga o fualaau e na te inuina i le taimi saʻo o loo faatonu mai, ma ia vave ona toe vaai le fomaʻi pe afai e iai ni aafiaga lē lelei o na fualaau. Ia fesoasoani i lē o loo maʻi ia saʻo pea lana vaai, ma faalaeiau o ia e usitaʻia so o se faatonuga faaopoopo, e pei o le toe foʻi e fai ana siaki. Ia fesoasoani iā te ia ina ia malamalama atili i le tulaga o lona maʻi.

I le Falemaʻi

Ia toʻa ma ia mataalia. Atonu e lagona e lē o loo maʻi le popole ma le lē mafesoasoania pe a alu i le falemaʻi. Peitaʻi, o le faaalia o le toʻa ma le faalogologo lelei, o le a e fesoasoani ai i tagata uma ina ia toʻa ma ʻalofia ai le faia o se mea sesē. Ia faamautinoa ua saʻo ona faatumu pepa faataga e taofia ai i le falemaʻi. Ia amanaʻia le aiā a lē o loo maʻi e faia ai lana faaiʻuga i le itu tau togafitiga. Pe afai e lē mafai ona ia faia faapea ona ua maʻi tele, e tatau la ona e amanaʻia le faaiʻuga a le tagata ua filifilia e lē ua maʻi e faia lana faaiʻuga.a

Ia tausolomua. Aua le matamuli pe fefe e talanoa atu. Pe a lelei ou foliga vaaia ma faaaloalo ou uiga, o le a uunaʻia ai fomaʻi e faaalia le manatu mamafa i lē o loo maʻi ma tausia faalelei o ia. I le tele o falemaʻi, e fesuisuiaʻi fomaʻi e vaaia tagata mamaʻi. O lea, e mafai ona e fesoasoani e ala i le faailoa atu i isi fomaʻi o manatu na taʻua e isi fomaʻi. Talu ai e te malamalama lelei i lē o loo maʻi, ia faailoa atu la i fomaʻi ni suiga e te mātauina i le tino po o le mafaufau o lē o loo maʻi.

Ia faaalia le faaaloalo ma lotofaafetai. E masani ona feagai i latou o loo galulue i le falemaʻi ma le tele o tulaga e faapopoleina ai. Ia feutagaʻi ma i latou i se auala e te manaʻo i isi e feutagaʻi ai ma oe. (Mataio 7:12) Ia amanaʻia lo latou iloa ma le poto masani, ia maufaatuatuaina o latou tomai, ma ia faaalia le lotofaafetai mo a latou taumafaiga. O le faaalia o le lototalisapaia o le a faalaeiau ai i latou e fai le mea sili e latou te mafaia.

E leai se tasi e mafai ona ʻalofia maʻi. Peitaʻi, o le fuafua mamao ma le avatu o se fesoasoani talafeagai, o le a mafai ai ona e fesoasoani i sau uō po o sou tauaiga ina ia fai le mea sili e na te mafai, e ui i lona tulaga maʻi.​—Faataoto 17:17.