Aʻoaʻo Lau Tama e Faatatau i Feusuaʻiga

LE LUʻI

I le faitau sefulu o tausaga ua mavae, sa maua e mātua le avanoa lelei e talanoa atu ai i a latou fanau e faatatau i feusuaʻiga. Sa mafai ona faasolosolo ona faamatala atu e mātua na mea iā i latou e fua i le matua ma manaʻoga o le tamaitiiti.

Ae ua suia le tulaga o mea. Ua taʻua i le tusi The Lolita Effect: “Ua faigofie ona vaai fanau i faamatalaga e faatatau i feusuaʻiga mai lava a o lāiti, ma ua tele ata ma faafiafiaga mo tamaiti ua faaalia ai faiga tau feusuaʻiga.” Po o aogā, po ua faaleagaina ai fanau i nei suiga?

MEA E TATAU ONA E ILOA

Ua vaaia faamatalaga ma ata lē talafeagai i so o se mea. I le tusi Talk to Me First, na taʻua ai e Deborah Roffman o “talanoaga, faasalalauga, ata tifaga, tusi, upu o pese, polokalame o le televise, feʻau tusitusia, taaloga, faailoilo tetele i auala, faapea telefoni ma komepiuta, ua tumu i ata e iai se fesootaʻiga i feusuaʻiga, gagana ma faamatalaga uigalua, lea ua oo ai ina manatu le toʻatele [o talavou ma fanau lāiti], o feusuaʻiga . . . o le mea lea e sili ona tāua.”

E tuuaʻia foʻi faasalalauga. Ua faasalalau ma faatau atu e tagata e faia faasalalauga ma faleoloa ia ofu faatosina mo fanau, ma totō ai iā i latou le manatu e faatāua foliga vaaia. Ua faapea mai le tusi So Sexy so Soon: “E malamalama lelei tagata e faia faasalalauga i mea e fiafia i ai tamaiti, ona latou faaaogāina lea e suʻe ai a latou tupe. O le faanaunauga o tagata e faia faasalalauga, o le uunaʻia o fanau e maua ni mea fou.”

E lē lava le fai atu na o faamatalaga. E pei lava ona eseese le iloaina o le auala e gaoioi ai le taavale ma le avea o se ave taavale maufaatuatuaina, e iai foʻi le eseesega o le iloaina o mea e faatatau i feusuaʻiga ma le faaaogāina o lenā iloa e fai ai filifiliga atamai.

Manatu tāua: Ua sili atu ona manaʻomia i aso nei ona e fesoasoani i lau fanau e toleni o latou “mafaufau,” ina ia latou “iloa le mea saʻo ma le mea sesē.”​—Eperu 5:14.

MEA E MAFAI ONA E FAIA

Ia fai lau vaega. E ui o se mataupu maʻaleʻale le talanoa i fanau e faatatau i feusuaʻiga, ae o lau matafaioi le faia faapea. O se mea e tatau ona fai.​—Mataupu silisili o le Tusi Paia: Faataoto 22:6.

Ia faia ni talanoaga pupuu. Nai lo o le faia o se talanoaga umi e faatatau i feusuaʻiga, ia faaaogā avanoa faasamasamanoa e talatalanoa ai, atonu i le taimi e femalagaaʻi ai i le taavale, po o taimi foʻi e fai ai feʻau. Ina ia fesoasoani i lau tama e sasaa mai ona faalogona, ia fai atu ni fesili faatupu manatu. O se faataʻitaʻiga, nai lo o le faapea atu, “Pe e te fiafia i na ituaiga o faasalalauga?” ae mafai ona e fesili atu, “O le ā sou manatu, aiseā e faaaogā ai e tagata e faia faasalalauga na ituaiga o ata e faalauiloa ai oloa?” Pe a uma ona tali mai lau tama, e mafai ona e fesili atu, “O ā ni ou faalogona e faatatau i lenā mea?”​—Mataupu silisili o le Tusi Paia: Teuteronome 6:6, 7.

Ia fua le talanoaga i le matua o le tamaitiiti. E mafai ona aʻoaʻo i fanau iti vaega o le tino e faaaogā i feusuaʻiga, faapea le auala e puipuia ai mai i ē e faaleagaina i latou. A o tuputupu aʻe le fanau, e mafai ona faamatala atu iā i latou faamatalaga e faatatau i le auala e maua ai fanau. E oo ane i le taimi ua iai suiga i le tino o se talavou, ua tatau ona latou malamalama lelei i aafiaga o feusuaʻiga i le tino ma amioga.

Ia faailoa atu mea e tāua iā te oe. Ia amata ona aʻoaʻoina lau tama mai lava a o laʻitiiti e faatatau i le faamaoni ma le faaaloalo. Pe a oo la ina talanoaina feusuaʻiga, ae ua iai se faavae o le talanoaga. Ia faailoa manino atu foʻi mea e tāua iā te oe. O se faataʻitaʻiga, pe afai e te manatu e lē tatau ona faia feusuaʻiga a o leʻi faaipoipo, ia faailoa manino atu lenā tulaga. Ia faamatala atu foʻi le māfuaaga e sesē ma leaga ai. Ua taʻua i le tusi Beyond the Big Talk: “O talavou e faapea mai e lē taliaina e o latou mātua le faia e talavou o feusuaʻiga, e tele lava ina latou lē faia feusuaʻiga.”

Ia faataatia se faaaʻoaʻoga. Ia e ola e tusa ma mea o loo e aʻoaʻo atu. O se faataʻitaʻiga, pe e te fiafia i tausuaga lē mamā, ofu faatosina, po o le faatafai? O na gaoioiga e mafai ona faaitiitia ai le tāua o tapulaa tau amio o loo e taumafai e aʻoaʻo atu i lau fanau.​—Mataupu silisili o le Tusi Paia: Roma 2:21.

Ia iai le manatu saʻo. O feusuaʻiga o se meaalofa mai i le Atua, ma e mafai ona maua ai le fiafia pe a faatino i le taimi talafeagai, pe a uma ona faaipoipo. (Faataoto 5:18, 19) Ia faailoa atu i lau tama, e iai le taimi e mafai ai ona ia maua le olioli i lenā meaalofa, e aunoa ma tigā ma popolega ona o le faia o feusuaʻiga a o leʻi faaipoipo.​—1 Timoteo 1:18, 19.