Auala e Feagai ai ma Faalogona Faavauvau​—Mea e Mafai Ona E Faia i le Taimi Nei

Pe a e saʻili mo fautuaga i le auala e feagai ai ma faalogona faavauvau o le a e maua ai le tele o auala, o nisi e aogā ae o isi foʻi e lē aogā. O le māfuaaga e pei ona taʻua muamua, e eseese auala e faavauvau ai tagata. O le mea e aogā i le isi tagata atonu e lē aogā i le isi.

E ui i lea, e iai nisi taʻiala ua faamaonia le aogā mo le toʻatele. O nei taʻiala e tele ina sii mai e tagata faufautua mo ē faavauvau, ma e faailoa mai ai mataupu silisili maufaatuatuaina lea e maua i se tusi mai anamuā o loo iai fautuaga atamai, o le Tusi Paia.

1: TALIA LE FESOASOANI MAI AIGA MA UŌ

• 

  E manatu nisi tagata atamamai o le auala pito sili lea ona tāua e feagai ai ma le faavauvau. Peitaʻi, e iai taimi e te manaʻo ai e tuua na o oe. Atonu e te lagona ua matuā faalavelave mai tagata ia o loo taumafai e fesoasoani iā te oe. O se faalogona masani lenā.

• Aua e te manatu e tatau ona e faatasitasi i taimi uma ma isi, ae aua foʻi le teena i latou. Auā o le mea moni, e te ono manaʻomia lo latou fesoasoani i le lumanaʻi. Ia faailoa ma le agalelei i isi mea o loo e manaʻomia i lenā taimi ma mea e te lē o manaʻomia.

• E tusa ai ma ou manaʻoga, ia paleni le taimi e iai faatasi ma isi tagata ma le taimi e iai na o oe.

MATAUPU SILISILI: “E sili ona lelei o le toʻalua nai lo o le toʻatasi . . . Auā afai e paʻū le tasi, e mafai e le isi ona fesoasoani e toe faatūina o ia.”—Failauga 4:9, 10.

2: FAAETEETE I AU MEATAUMAFA MA FAAALU SE TAIMI E FAAMALOSITINO AI

• O le taumafa i meaʻai paleni o le a fesoasoani e faaitiitia ai le popole, lea e māfua mai ona o le faavauvau. Ia taumafai e taumafa i ituaiga eseese o fualaau ʻaina, fualaau faisua, ma aano o manufasi e lē lololo.

• Ia toʻaga e inu le vai ma isi vai inu e lelei mo le soifua mālōlōina.

• Pe afai e te lagona le lē fia ʻai, ia taumafai e ʻai sina meaʻai i le tele o taimi. E mafai foʻi ona e fesili atu i lau fomaʻi i fualaau mo vaitamini.a

• O le savali faatopetope ma isi ituaiga faamalositino, e mafai ona faaitiitia ai faalogona lē lelei. O le faamalositino e maua ai le taimi e toe mafaufau ai i suiga o lou olaga, pe faagalo foʻi faalogona faavauvau.

MATAUPU SILISILI: “E leai lava se tasi e ita i lona lava tino; a e peitaʻi na te fafaga ma tausi atu i ai.”—Efeso 5:29, Tusi Paia Samoa—Lomiga 1969.

3: IA LAVA LE MOE

• 

  E tāua le lava o le moe, aemaise lava i latou o loo faavauvau, ona o le faavauvau e atili ai ona vaivai le tino.

• Ia faaeteete i le soona inuina o vaiinu e iai le vailaau o le caffeine ma le ʻava malosi, ona e mafai ona lē lava ai le moe.

MATAUPU SILISILI: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”—Failauga 4:6.

4: IA FETUUTUUNAʻI

• 

  Ia iloa e eseese auala e faavauvau ai tagata. O lea, ia taumafai e iloa le auala e sili ona aogā e te feagai ai ma le faavauvau.

• E toʻatele e manatu, e fesoasoani le faamatala atu o latou faalogona faavauvau i isi, ae o nisi e manatu e lē tatau ona faia faapea. E eseese manatu o tagata atamamai e faatatau i aogā e maua i le faamatala atu i isi o faalogona o se tasi. Pe afai e manaʻomia ona e talanoa atu i se tasi e faatatau i ou faalogona ae e te faatalatū e faia faapea, atonu e sili atu ona faigofie le faamatala faasolosolo o ou faalogona i sau uō vavalalata.

• O nisi tagata e fesoasoani le tagi iā i latou e feagai ai ma faalogona faavauvau, a o nisi e mafai ona latou feagai ma na faalogona e aunoa ma le soona tagi.

MATAUPU SILISILI: “Ua iloa e le loto lona lava tigā.”—Faataoto 14:10.

5: ʻALOFIA MASANIGA E FAALEAGAINA AI

• 

  E taumafai nisi tagata faavauvau e faaitiitia o latou faalogona tigā, e ala i le faaaogā o fualaau faasāina ma le ʻava malosi. O le faaaogāina o na auala e faaleagaina ai. E lē tumau so o se faalogona toʻafilemu e maua mai ai ma e oo ai i ni iʻuga leaga. Ia taumafai e fai se isi auala e lē faaleagaina ai ina ia maua ai le toʻafilemu.

MATAUPU SILISILI: ʻSeʻi o tatou faamamā iā i tatou mai i mea uma e faaleagaina ai.’—2 Korinito 7:1.

6: IA PALENI I LE AUALA E FAAAOGĀ AI LOU TAIMI

• E fesoasoani i le toʻatele le fai o sina suiga nai lo o le faavauvau, e pei o isi gaoioiga e mafai ona faagalo ai le tigā o na faalogona.

• Atonu e te maua se mapusaga i le atiaʻe po o le faamalosia o faauōga, aʻoaʻo se tomai fou, po o le faia foʻi o sina tafaoga.

• A o faagasolo taimi, o le a suia lou tulaga. Atonu e te mātauina ua tele le taimi e faaalu i isi mea, ma o se vala masani lenā e foʻia ai faalogona faavauvau.

MATAUPU SILISILI: “E iai le taimi e atofaina mo mea uma, . . . o le taimi e tagi ai ma le taimi e ʻataʻata ai; o le taimi e tagituʻi ai ma le taimi e siva ai.”—Failauga 3:1, 4.

7: IA FAI SAU FAASOLOGA MA PIPII I AI

• 

  I le vave e mafai ai, ia toe amata se faasologa e masani ai.

• Pe afai e te pipii i lau faasologa o le mālōlō, faigaluega, ma faia isi gaoioiga o le a e iloa ai ua amata ona e toe foʻi i lau faasologa masani.

• O le faaauau pea ona faia o gaoioiga lelei, e mafai ona fesoasoani e faaitiitia ai faalogona tigā.

MATAUPU SILISILI: “E seāseā ona ia mātauina le gasologa o aso o lona olaga, auā ua faatumuina pea e le Atua moni lona loto i le olioli.”—Failauga 5:20.

8: ʻALOFIA LE VAVE FAIA O NI FILIFILIGA TETELE I LE OLAGA

• E toʻatele i latou e salamō mulimuli ane ona o le faia o filifiliga tetele i le olaga, pe a faatoʻā mavae le maliu o sē e pele iā i latou.

• Pe afai e mafai, ia faatali mo sina taimi a o leʻi faia se filifiliga e pei o le siitia atu i se isi nofoaga, suia le galuega po o le aveesea foʻi o meatotino a lē e pele ua maliu.

MATAUPU SILISILI: “O fuafuaga a le tagata toʻaga e manuia ai lava o ia, a o i latou uma e vave gaoioi ae lē mafaufau muamua, e iʻu ai i le mativa.”—Faataoto 21:5.

9: IA MANATUA LĒ E PELE UA MALIU

• 

  E aogā i le toʻatele o tagata faavauvau le faia o ni mea e manatua ai ē e pele ua maliliu.

• Atonu e te maua le faamāfanafanaga i le tuufaatasia o ata po o ni meatotino a lē e pele ua maliu, pe tusi foʻi i se api tala ma mea na tutupu e te manatua ai mea lelei na ia faia.

• Ia teu lelei meatotino e manatua ai taimi fiafia ma lē e pele ua maliu.

MATAUPU SILISILI: “Ia manatua aso ua mavae.”—Teuteronome 32:7.

10: IA FAI SINA TAFAOGA

• Atonu e te mafaufau e fai sina tafao.

• Pe afai e lē mafai ona fai se tafaoga umi, e mafai ona e faia se mea e te fiafia ai, e pei o le aʻe i le mauga, alu i le matafaga, pe alu foʻi se tiʻetiʻega.

• E oo lava i le faia o se mea e ese mai i mea e masani ai, e mafai ona fesoasoani iā te oe e feagai ai ma faalogona faavauvau.

MATAUPU SILISILI: “Seʻi o tatou ō na o i tatou i se mea tuufua ma fai ai sina mālōlōga.”—Mareko 6:31.

11: IA FESOASOANI I ISI

• 

  Ia manatua o so o se taimi e te faaalu e fesoasoani ai i isi, e mafai foʻi ona fesoasoani iā te oe e faaleleia ai ou faalogona.

• E te ono fesoasoani muamua i isi o loo aafia foʻi i le maliu o lē e pele iā te oe, e pei o se uō po o se tauaiga o loo feagai foʻi ma faalogona faavauvau.

• O le fesoasoani ma faamāfanafana i isi, e mafai ona toe faafouina ai lou fiafia ma toe maua ai se fuafuaga i lou olaga.

MATAUPU SILISILI: “E sili le fiafia e maua i le foaʻi atu i lo o le talia mai.”—Galuega 20:35.

12: TOE ILOILO MEA O LOO E FAATĀUAINA

• O le faavauvau e mafai ona fesoasoani iā te oe e malamalama ai i le mea e sili ona tāua.

• Ia faaaogā lelei le avanoa e iloilo ai le auala o loo e ola ai.

• Pe a manaʻomia, ia fai ni fetuunaʻiga i mea o loo e faatāuaina.

MATAUPU SILISILI: “E sili le alu i le fale o iai le faavauvau nai lo o le alu i le fale o fai ai le faigaʻai, auā o le iʻuga lea o tagata uma, ma e ao ona manatunatu i ai loto o ē o loo ola.”—Failauga 7:2.

O le mea moni, e leai se mea e mafai ona aveesea atoatoa ou faalogona tigā. Peitaʻi, e toʻatele tagata ua maliliu ē e pele iā i latou, e faamaonia o le uia o laasaga lelei, e pei ona taʻua i lenei mataupu, ua fesoasoani iā i latou e maua ai le faamāfanafanaga. E moni e lē o lisiina mai i inei auala uma e faaitiitia ai le faavauvau. Ae pe a e taumafai e faataʻitaʻi nisi o nei auala o le a e maua ai se mapusaga.