Aiga ma Faauōga
O le toʻatele o tagata e faigatā ona faatumau se faiā lelei ma o latou aiga ma uō. Mātau nisi o mataupu silisili faale-Tusi Paia e mafai ona fesoasoani iā te oe, e faaleleia ai lau faiā ma isi.
IA LĒ MANATU FAAPITO
MATAUPU SILISILI FAALE-TUSI PAIA: “Ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.
LE UIGA: O le a tatou maua ni faiā lelei ma isi pe a tatou taulaʻi atu i mea e mafai ona tatou faia mo i latou, nai lo o mea e mafai ona latou faia mo i tatou. Pe afai e te manatu faapito, o le a faaleagaina lau faiā ma isi. O se faataʻitaʻiga, o le manatu faapito o le isi paaga faaipoipo e ono lē faamaoni ai i lana paaga. E lē gata i lea, e leai se tasi e manaʻo e avea ma ana uō sē e gugutu i taimi uma, ona o le tele o mea ua ia maua po o ona tomai. Ua taʻua e le tusi The Road to Character e faapea, “o tagata e manatu faapito ma lē manatu mamafa mo isi o le a feagai ma le tele o faafitauli.”
MEA E MAFAI ONA E FAIA:
Ia fesoasoani i isi. O se uō māfana e maufaatuatuaina e le tasi le isi ma e nofosauni e fesoasoani atu i taimi uma. Ua faailoa mai e se tasi suʻesuʻega, o le fesoasoani o le tasi i le isi e faaitiitia ai popolega ma faateleina ai lou mautinoa iā te oe lava.
Ia faaalia le tigā alofa. Ua faamatalaina le tigā alofa o le lagonaina lea i o tatou loto o faalogona tigā o le isi tagata. Pe a e faaalia le tigā alofa, o le a e lē faia ai ni tala tausua e tigā ai faalogona o le isi tagata.
O le faaalia o le tigā alofa, o le a e malamalama ai i tulaga o isi. O le a fesoasoani iā te oe e ʻalofia ai faiga faaituʻau ma maua ai ni uō mai aganuu ma talaaga eseese.
Ia faaalu le taimi ma tagata. O le tele o le taimi e faaalu ma isi, o le tele foʻi lenā o lou iloa lelei o i latou. Ina ia maua ni uō lelei, ia talanoa i mea o loo popole ai ma mea o loo tāua iā i latou. O lea, ia faalogologo lelei ma faaalia le naunau moni i lau uō. Ua taʻua e se tasi o suʻesuʻega talu ai nei, “o talanoaga aogā o le a maua ai e tagata le fiafia.”
IA FILIFILI LELEI A TATOU AUMEA
MATAUPU SILISILI FAALE-TUSI PAIA: “O aumea leaga e faaleagaina ai mea lelei ua masani ai tagata.”—1 Korinito 15:33.
LE UIGA: O tagata e tou te faifaimea faatasi, o le a iai se aafiaga iā te oe a lē o le lelei o le leaga. Ua ioe i latou e suʻesuʻeina amioga a tagata, o na aafiaga e aafia ai lou olaga. O se faaaʻoaʻoga, na latou faapea mai o le faifaimea faatasi ma sē e ulaula po o sē o loo fuafua e tatala lana faaipoipoga, o le a taaʻina ai foʻi oe e faia faapea.
MEA E MAFAI ONA E FAIA: Ia faauō i tagata o loo faaalia uiga e te fiafia i ai ma e te manaʻo e faataʻitaʻi i ai. O se faataʻitaʻiga, ia faatasitasi ma tagata e faautauta, faaaloalo, limafoaʻi, ma talimālō.
ISI MATAUPU SILISILI FAALE-TUSI PAIA
Ia matamata i vitiō faale-Tusi Paia ua saunia mo ulugalii faaipoipo, talavou ma fanau ina ia faaleleia ai o latou olaga i le aiga
ʻALOFIA UPU FAATIGĀ.
“O le tagata e tautala lē mafaufau, ua pei o le tutuʻi o le pelu.”—FAATAOTO 12:18.
IA LIMAFOAʻI.
“E faatamaoaigaina le tagata limafoaʻi.”—FAATAOTO 11:25.
IA FEUTAGAʻI MA ISI I LE AUALA E TE MANAʻO E FEUTAGAʻI MAI AI IĀ TE OE.
“O mea uma tou te mananaʻo e faia mai e tagata iā te outou, ia faapea lava ona outou faia iā i latou.”—MATAIO 7:12.