1. Pe e Tuuaʻia le Atua i o Tatou Mafatiaga?
Le Māfuaaga e Tāua ai
E toʻatele tagata ua latou teena le Atua ona ua latou tuuaʻia o ia i o latou mafatiaga.
Ia Mafaufau i ai
O le toʻatele o taʻitaʻi lotu e latou te aʻoaʻoina, a lē i se auala tuusaʻo pe iloagatā e faapea, o le Atua le pogai o o tatou mafatiaga. Mo se faataʻitaʻiga, ua faapea mai nisi:
O mala faalenatura o se faasalaga mai le Atua.
Ua maliliu tamaiti ona e manaʻomia e le Atua nisi agelu i le lagi.
E faaituʻau le Atua i taimi o taua, ma o le māfuaaga lenā o le tele o mafatiaga.
Ae pe e mafai ona sesē manatu o loo aʻoaʻoina e taʻitaʻi lotu e faatatau i le Atua? Ae a pe afai ua teena e le Atua i latou?
IA AʻOAʻO ATILI
Maimoa i le vitiō Aiseā e Suʻesuʻe ai le Tusi Paia? i le jw.org.
Manatu o le Tusi Paia
E lē o le Atua le pogai o o tatou mafatiaga.
Pe afai o le Atua e māfua ai, e matuā eseese lava la ma ona uiga o loo taʻua i le Tusi Paia. Mo se faataʻitaʻiga:
“E tonu ona [Atua] ala uma. . . . E amiotonu ma amio saʻo o ia.”—TEUTERONOME 32:4.
“E mamao lava i le Atua moni ona faia o se mea leaga, Ma Lē e ona le malosi uma lava ona faia o se mea e lē tonu!”—IOPU 34:10.
“E lē faapiʻoina foʻi e Lē e ona le malosi uma lava le faamasinoga.”—IOPU 34:12.
E teena e le Atua lotu o loo aʻoaʻoina manatu sesē e faatatau iā te ia.
E aofia ai lotu o loo aʻoaʻoina o le Atua le pogai o o tatou mafatiaga ma i latou o loo aafia i faigātaua ma faiga sauā.
“Ua vavalo perofeta i mea pepelo i loʻu [Atua] igoa. Ou te leʻi aauina atu i latou, ou te leʻi poloaʻi atu iā i latou pe tautala atu foʻi iā i latou. A ua latou tautatala faavaloaga atu iā te outou i le faaaliga pepelo . . . ma le faaʻoleʻole o o latou loto.”—IEREMIA 14:14.
Na taʻusalaina e Iesu lotu faagutugutulua.
“E lē ulu atu i le malo o le lagi i latou uma o ē fai mai iā te aʻu, ʻLe Alii e, le Alii e,’ ae e na o lē na te faia le finagalo o loʻu Tamā o i le lagi. E toʻatele e fai mai iā te aʻu i lea aso, ʻLe Alii e, le Alii e, pe matou te leʻi faia ea ni valoaga ma tutuli temoni, ma faia le tele o galuega mamana i lou suafa?’ Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.”—MATAIO 7:21-23.