Ia Maua Faamatalaga Saʻo

Le Faafitauli

O le faailoga tagata e māfua ona o faamatalaga sesē. Ia iloilo faaaʻoaʻoga o loo mulimuli mai:

E talitonu nisi i le manatu sesē, e lē mafai e fafine ona faia galuega e manaʻomia ai le tele o le tomai, malosi, ma le atamai.
I Europa anamua, na tuuaʻia sesē tagata Iutaia i le faaoonaina o vaieli ma faapipisi faamaʻi. I taimi o pulega a le ʻau Nasi, na taʻuleagaina ai foʻi i latou. Peitaʻi, i le taimi lea ua latou tuuaʻia i latou i le paʻū ai o le tamaoaiga i Siamani. O nei tuuaʻiga na māfua ona matuā aafia ai tagata Iutaia i faiga faailoga tagata ma o nisi o faamaoniga o loo iai lava i le taimi nei.
E toʻatele tagata e iai le manatu sesē o so o se tasi e iai sona maʻi tumau, e matuā faanoanoa lava.

O tagata e talitonu i nei manatu, e ono faasino atu i ni faaaʻoaʻoga e taʻutonuina ai lo latou faailoga tagata. E latou te manatu foʻi, o so o se tasi lava e lē ioe i ai, e lē iloa se mea.

Mataupu Silisili Faale-Tusi Paia

“E lē lelei foʻi le tagata e aunoa ma le poto.”—FAATAOTO 19:2.

O le ā le uiga? Pe afai tatou te lē iloa faamatalaga saʻo, o le a tatou faia ni faaiʻuga sesē. Pe afai e tatou te talitonu i mea e lē moni, o le a tatou faamasinosino i isi.

Le Tāua o le Iloa o Faamatalaga Saʻo

Pe afai e tatou te iloa faamatalaga saʻo e faatatau i tagata, o le a tatou lē talitonu ai i faamatalaga sesē e faatatau iā i latou. Pe a tatou iloa foʻi e lē moni faamatalaga na tatou faalogo ai e faatatau i se vaega o tagata, o le a lē vave ona tatou talitonu i na faamatalaga.

Se Mea Moni na Tupu: Jovica (Europa)

A o ola aʻe Jovica lea na taʻua muamua, na ia faalogo i ona tagata nuu, tala fou ma polokalame o le televise i lipoti lē lelei e faatatau i se vaega o tagata. Na ia faapea mai, “Na tumu aʻu i le faailoga tagata ma na oo lava ina ou ʻinoʻino i ai. Na ou faapea foʻi e saʻo oʻu manatu.”

“Peitaʻi, a o oʻu iai i le vaegaʻau, e leʻi mafai ona ou ʻalofia le nonofo ma galulue faatasi ma i latou mai i lena vaega o tagata. A o faagasolo taimi, e tele mea na ou aʻoaʻoina e faatatau iā i latou. Na amata ona ou aʻoaʻoina le latou gagana ma faalogologo i a latou pese. Na ou fiafia foʻi e faatasitasi ma i latou ma na suia ai oʻu manatu. Peitaʻi, e mafai lava ona toe aliaʻe le faailoga tagata. O lea, ou te ʻalofia ni lipoti leaga e faatatau i na vaega o tagata. Ou te lē matamata foʻi i ni ata e ulagia ai i latou. Ou te iloa o le faailoga tagata e mafai ona iʻu atu ai i le ita ma le ʻinoʻino i isi.”

Mea e Mafai Ona E Faia

Ia manatua o manatu lautele e faatatau i se vaega o tagata, e lē o tagata uma o lenā vaega e aofia ai.
Ia manatua e te lē iloa faamatalaga uma e faatatau i se vaega o tagata.
Taumafai ia maua faamatalaga saʻo ma maufaatuatuaina.