Ia Alofa

Le Faafitauli

E lē vave ona mou atu le faailoga tagata. E pei ona umi se taimi ma tele galuega e faia ina ia foʻia ai se faamaʻi, e faapena foʻi ona umi le taimi ma tele galuega e faia e aveese ai le faailoga tagata. O le ā e mafai ona e faia e aveesea ai le faailoga tagata mai iā te oe?

Mataupu Silisili Faale-Tusi Paia

Tuufaatasiga o ata: 1. O se tamāloa Asia o loo tatalaina le faitotoʻa mo se tamāloa uli o loo faatau ana kofe. 2. O le tamāloa uli lava lea e tasi o loo faasoa atu ana kofe i tagata latou te faigaluega faatasi, e aofia ai ma le fafine Initia na faaalia muamua.

“Ia oofu outou i le alofa, auā o le fusi lea e atoatoa ona autasi ai.”—KOLOSE 3:14.

O le ā le uiga? O le faia o mea lelei i isi e maua ai le autasi. O le tele o lou alofa i isi, o le a faaitiitia ai lou faailoga tagata. O le tele o le alofa i lou loto, o le a leai ai se avanoa mo le ita ma le ʻinoʻino.

Mea e Mafai Ona E Faia

Tuufaatasiga o ata: 1. O se loomatua paʻepaʻe o loo fesoasoani i ai se fafine Initia e uu lana faatau. 2. O loo avatu e le loomatua paʻepaʻe ni keke i le tamāloa Asia lea na faaalia muamua.

Ia mafaufau i ni auala patino e mafai ai ona e faaalia le alofa i se vaega o tagata na e ono manatu faatauvaa i ai. E lē manaʻomia ona soona sasalu naʻuā nei gaoioiga. Ia taumafai e faataʻitaʻi nisi o mea o loo mulimuli mai:

O gaoioiga lāiti o le alofa, o le a faaitiitia ai lou faailoga tagata

Ia faaalia amioga lelei i sui o lenā vaega, e ala i le ofo i ai o lou nofoa pe a tumu le pasi po o le nofoaafi.
Ia taumafai e talanoa i ai e tusa pe e lē lelei le latou tautatala i lau gagana.
Ia onosaʻi pe afai latou te gaoioi i se auala e te lē malamalama ai.
Ia tigā alofa pe afai latou te talanoa atu i o latou faafitauli.