Aiseā ua Tatou Mafatia ai, Ola Matutua ma Feoti?

Ua Tatou Mafatia Ona o o Tatou Uluaʻi Mātua

“E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala ona oo mai lea o le oti i tagata uma lava.”​—ROMA 5:12.

Na lelei atoatoa mafaufau ma tino o tatou uluaʻi mātua o Atamu ma Eva, ina ua foafoaina e le Atua. Na ia tuuina foʻi i laʻua i se parataiso i le lalolagi e nonofo ai, e taʻua o le faatoʻaga o Etena. Na ia fetalai atu iā i laʻua e mafai ona la ʻaai i laau uma o le faatoʻaga, ae tasi le laau e lē mafai ona la ʻaai ai. Peitaʻi, na filifili Atamu ma Eva e ʻai le fua o lenā laau ma agasala ai. (Kenese 2:15-17; 3:1-19) O lo la lē usiusitaʻi, na tuliesea ai e le Atua i laʻua mai le faatoʻaga ma ola ai i se olaga faigatā. Mulimuli ane, na maua se la fanau ma e leʻi faigofie foʻi le olaga mo i latou. Na latou ola matutua foʻi ma feoti. (Kenese 3:23; 5:5) Ua tatou mamaʻi, ola matutua ma feoti ona o o tatou uluaʻi mātua.

Ua Tatou Mafatia Foʻi Ona o Agelu Fouvale

“O le lalolagi atoa o loo nofo toʻilalo i le pule a lē o loo leaga.”​—1 IOANE 5:19.

O “lē o loo leaga” o Satani. O ia o le foafoaga agaga na fouvale i le Atua. (Ioane 8:44; Faaaliga 12:9) Mulimuli ane, na auai atu isi foafoaga agaga iā Satani. Na taʻua i latou o temoni. Na faaaogā e nei agaga leaga o latou mana e faasesēina tagata ina ia lē usiusitaʻi i Lē na foafoaina mea. E latou te uunaʻia foʻi le toʻatele o tagata e faia mea leaga. (Salamo 106:35-38; 1 Timoteo 4:1) E faapogaia e Satani ma temoni tigā ma mafatiaga o tagata.

O Nisi Taimi e Tatou te Mafatia Ona o i Tatou Lava

“O le mea e lūlūina e le tagata, o le mea lava lea e na te seleseleina mai.”​—KALATIA 6:7.

Ua tatou mafatia uma ona o le agasala tuufaasolo ma aafiaga o le lalolagi a Satani o loo siʻomia ai i tatou. Ae o nisi taimi, e mafatia tagata ona o i latou lava. E faapefea? Pe a latou faia mea leaga pe faia filifiliga lē lelei, o le a latou selesele foʻi iʻuga leaga. Ae i le isi itu, pe a latou faia mea lelei o le a latou selesele foʻi iʻuga lelei. Mo se faataʻitaʻiga, o se tane po o se tamā e faamaoni, galue mamafa ma alofa i lona aiga, o le a selesele i le tele o mea lelei ma maua ai e lona aiga le fiafia. Peitaʻi, o se tasi e taalo i taaloga faitupe, inutele pe paiē, o le a leai ni ana tupe ma mativa lona aiga. O lea, o se mea atamai lo tatou faalogo i Lē na foafoaina i tatou. E finagalo o ia e tatou te selesele i le tele o mea lelei, e aofia ai le ʻtele o le filemu.’​—Salamo 119:165.

Ua Tatou Ola i “Aso e Gata ai”

“O aso e gata ai . . . , e avea tagata ma ē alolofa iā i latou lava, o ē mananaʻo tele i tupe, . . . o ē lē usiusitaʻi i matua, . . . o ē lē amio pulea, o ē e sauā, o ē e lē fiafia i mea lelei.”​—2 TIMOTEO 3:1-5.

I aso nei, o le toʻatele o tagata o loo faaalia uiga e pei ona valoia i le mau. O a latou amioga ua faamaonia ai ua tatou ola i “aso e gata ai.” Ua valoia mai foʻi e le Tusi Paia o faailoga o aso e gata ai o le a iai taua, oge, mafuiʻe ma faamaʻi. (Mataio 24:3, 7, 8; Luka 21:10, 11) O nei mea ua faapogaia ai le tele o mafatiaga ma le oti.