E Faapefea i le Faatekinolosi Ona Aafia ai Lau Faaipoipoga?

E ui i lea, ua faataga e isi paaga le faaaogā sesē o le faatekinolosi e . . .

• aveesea ai le taimi lea e tatau ona faatasi ai ma lana paaga.

• latou te faaalu ai le tele o le taimi i galuega e ui e lē o manaʻomia.

• atiaʻe ai le lē maufaatuatuaina ma le lē faamaoni.

MEA E TATAU ONA E ILOA

TAIMI MA LAU PAAGA

Na taʻua e se tane e igoa ia Michael: “Pe a ma iai faatasi ma laʻu avā i nisi taimi, e tai pei ā e lē o iai i inā. E mua ona uaʻi i lana telefoni ma fai mai, ʻo lea faatoʻā maua se avanoa e siaki ai laʻu telefoni.’” Na taʻua e Jonathan nei tulaga, “e mafai ona iai se tane ma se avā i se nofoaga e tasi ae e lē vavalalata le tasi i le isi.”

IA MAFAUFAU I AI: O le ā le tele e te talanoa pe text atu ai i se isi a o lua talanoa ma lau paaga?​—EFESO 5:33.

GALUEGA

O nisi e iai i galuega e manaʻomia ona tali a latou telefoni po o imeli, e tusa po ua latou iai i le fale ona o le tulaga lenā o le galuega. Peitaʻi o isi e lē manaʻomia lenā tulaga, ua latou faaalu le tele o le taimi e faigaluega mai ai i o latou fale. Na taʻutino mai e se tane e igoa iā Lee, “e faigatā le lē siakiina o text po o telefoni e vili mai i mea o le galuega i taimi e ma te faatasi ai ma laʻu avā.” Na taʻua e se avā e igoa iā Joy: “Talu ai ou te faigaluega mai i le fale, e faigatā la ona faapaleni le taimi mo galuega.”

IA MAFAUFAU I AI: Pe e te faalogologo lelei i lau paaga a o ia talanoa mai iā te oe?​—LUKA 8:18.

FAAMAONI

Na taʻua i se tasi o suʻesuʻega o le faaaogāina o le initaneti, o le māfuaaga taatele lea o feeseeseaʻiga i le faaipoipoga. E pe ā ma le sefulu pasene o i latou na faatalanoaina, na taʻutino mai na latou tuuina mea i luga o le initaneti e aunoa ma le iloa e a latou paaga.

E talitonu le toʻatele o le initaneti o se lamatiaga mo tagata faaipoipo, ma e mafai ona iʻu atu ai i le faia o le mulilua. Na taʻua e le toʻatele o lōia e lē o se mea e faateʻia ai le tele o faaipoipoga malepelepe ona o le initaneti.

IA MAFAUFAU I AI: Po o e nanāina mai i lau paaga au fesootaʻiga ma se isi o le isi itupā?​—FAATAOTO 4:23.

MEA E MAFAI ONA E FAIA

FAATULAGA MEA E FAAMUAMUA

O se tasi e faatalalē i ana meaʻai e lē soifua mālōlōina. I se tulaga talitutusa, o se tasi e faatalalē i le taimi e faatasitasi ai ma lana paaga, e faigatā ona ia faatumauina se faaipoipoga fiafia.​—Efeso 5:28, 29.

Ia talanoa ma lau paaga i fautuaga e te lua mananaʻo e faataʻitaʻi pe tusi sa oulua lava auala, e taofia ai le faalavelave o le faatekinolosi i le lua faaipoipoga.

• Taumafai ia iai se ʻaiga o le aso e te lua ʻaai faatasi ai

• Faatulaga se taimi e lē faaaogāina ai masini faaonapōnei

• Faatulaga se taimi e te lua fiafia faatasi ai na o oulua

• Ia tapē masini faaonapōnei pe a momoe i le po

• Ia faataatia ese se 15 minute i aso taʻitasi e te lua talanoa ai e aunoa ma se masini faaonapōnei

• Ia tapē le Initaneti i se taimi patino o aso taʻitasi