O le ā e Tatou te Aʻoaʻoina Mai i le Tusi Paia?

Pe e iai se amataga o le vateatea?

Ua faapea mai le Kenese 1:1: “Na foafoaina e le Atua le lagi ma le lalolagi i le amataga.”

A o leʻi oo i le tausaga 1950, e toʻatele saienitisi lauiloa na talitonu e leai se amataga o le vateatea. Ae i suʻesuʻega talu ai nei, e toʻatele saienitisi ua amanaʻia le mea moni, e iai le amataga o le vateatea.

O ā foliga o le lalolagi i le amataga?

I le Kenese 1:2, 9 o loo faamatalaina ai le lalolagi, “na gaogao ma soona nunumi” ma na ufitia i vai.

E ioe saienitisi i lenā faamatalaga. Na faamatalaina e se saienitisi e igoa iā Patrick Shih, e leʻi iai se okesene ma na ese foliga o le laueleele ina ua foafoaina le lalolagi. Na taʻua foʻi i le mekasini o le Astronomy: “Ua iloa mai i suʻesuʻega fou, na ufitia le lalolagi i vai ma na toetoe leai se laueleele mātūtū.”

Na faapefea ona suia le ʻea a o faagasolo taimi?

O loo faailoa mai i le Kenese 1:3–5, na mafiafia le ʻea i le taimi muamua ma e leʻi oo mai le malamalama i le lalolagi. Na faatoʻā iloa atu le lā ma le masina mai i le lalolagi i se taimi mulimuli ane.—Kenese 1:14-18.

Ua faamatalaina e le Smithsonian Environmental Research Center, ona o le māfiafia o le ʻea, e na o sina malamalama na oo mai i le lalolagi. Na ufitia le ʻea i le kasa o le methane ma na puaoa ai le lalolagi atoa. Mulimuli ane, ina ua mou ese lenei kasa, ona lanu moana loa lea o le lagi.

O le ā le faasologa na foafoaina ai meafaiola i le lalolagi?

Ua taʻua i le Kenese 1:20-27, na foafoaina iʻa, manulele, manu o le laueleele, ona faatoʻā foafoaina ai lea o le tagata. E talitonu saienitisi na muamua foafoaina iʻa a o leʻi taitai foafoaina manu, ma i se taimi umi mulimuli ane, ona faatoʻā foafoaina lea o le tagata.

O ā Mea e Lē o Taʻua i le Tusi Paia?

Ua faapea mai nisi e lē ōgatusa manatu o le Tusi Paia ma suʻesuʻega faasaienisi i aso nei. Peitaʻi, o na manatu e faavae mai i le lē malamalama i mea moni o loo taʻua i le Tusi Paia.

E lē o faapea mai le Tusi Paia na foafoaina le vateatea ma le lalolagi i le 6,000 tausaga ua mavae. Nai lo o lea, o loo taʻua ai na foafoaina le lalolagi ma le vateatea “i le amataga.” (Kenese 1:1) E lē o taʻua i le Tusi Paia se taimi patino na foafoaina ai le lalolagi ma le vateatea.

E lē o faapea mai le Tusi Paia o meafaiola uma o loo iai i le lalolagi na foafoaina i aso e ono e taʻi 24 itula. Peitaʻi o loo faaaogā le upu “aso,” lea e faasino atu i ni vaitaimi. O se faataʻitaʻiga, o loo taʻua ai na faia le tatou paneta ma meafaiola uma o loo iai i le vaitaimi lea e taʻua “le aso na faia ai e Ieovaa le Atua le lalolagi ma le lagi.” (Kenese 2:4) E aofia foʻi i lenei vaitaimi aso e ono o loo taʻua i le Kenese mataupu 1. O lea la, o aso taʻitasi o nei aso e ono o le foafoaga, lea na foafoaina ai e le Atua le lalolagi ma le ola, e mafai ona faasino atu i ni vaitaimi e matuā umi lava.

E lē o faapea mai le Tusi Paia e lē mafai ona suia foliga o se meafaiola a o faagasolo taimi. O loo taʻua i le Kenese, na foafoaina manu “e tusa ma o latou ituaiga.” (Kenese 1:24, 25) Pe a faaaogā le upu “ituaiga” i le Tusi Paia, e faasino atu i ituaiga eseese o se meafaiola. O lea, e mafai ona eseese ituaiga o se meafaiola e tasi. O le uiga o lenei manatu, e ono iai suiga i le tele ma le eseese o ituaiga o se meafaiola e tasi a o faagasolo taimi.

O le ā sou manatu?

I lenei mataupu ua faamatala ma le manino e le Tusi Paia le amataga o le vateatea, le foliga o le lalolagi na iai, ma le amataga o le ola. Pe afai o lea, pe e lē o faamatalaina ma le saʻo foʻi la e le Tusi Paia Lē na foafoaina mea? Ua faamatalaina e le Encyclopædia Britannica, o le manatu e iai sē e sili atu na foafoaina le ola, e ōgatusa ma suʻesuʻega faasaienisi i aso nei.b