2 | Ia Puipuia le Tausiga Faaletino

LE MĀFUAAGA E TĀUA AI

O le toʻatele o tagata e faigatā ona latou maua mea e manaʻomia moni i aso taʻitasi, ma ua atili ai ona faigatā ona o faafitauli o le lalolagi. Aiseā?

• Pe a iai faafitauli i se vaipanoa, o le atili taugatā foʻi na o mea e pei o meaʻai ma fale.

• O mala, e ono faaitiitia ai galuega pe faaitiitia ai foʻi totogi o tagata faigaluega.

• O mala, e ono faaleagaina ai pisinisi, fale, po o meatotino o tagata, ma iʻu ai i le tulaga mativa.

Mea e Tatau Ona E Iloa

• O le lelei o le auala e faasoa ai au tupe, o le a sauniunia ai foʻi oe e feagai ma se mala e ono tulaʻi mai.

• E lē tumau le saogalemu e maua mai i tupe. Ia manatua e ono mou atu le tāua o lou totogi, faaputuga tupe, ma au meatotino.

• E iai mea e lē mafai ona faatauina e tupe, e pei o le fiafia ma le autasi o le aiga.

Mea e Mafai Ona E Faia i le Taimi Nei

Le manatu o le Tusi Paia: “Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.”​—1 Timoteo 6:8.

O le lotomalie e aofia ai le faaitiitia o mea e tatou te mananaʻo ai, ae ia faamalieina pe a maua mea e tatou te manaʻomia moni i aso taʻitasi. E matuā tāua lenei manatu, aemaise pe a utiuti le faasoa.

Ina ia maua le lotomalie, e manaʻomia ona faafaigofie le olaga. Pe afai e fai ma masani le faatau o mea e te lē gafatia, e na o le faateteleina ai o faafitauli tau tupe.