SE LALOLAGI UA TUMU I FAAFITAULI

3 | Ia Puipuia Lau Faiā ma Ē Pele iā te Oe

LE MĀFUAAGA E TĀUA AI

A o faateteleina popolega ona o faafitauli o le lalolagi, e toʻatele tagata ua lē vavalalata i ē pele iā i latou e aunoa ma le iloaina.

Ua faaesea e tagata i latou lava mai i a latou uō.
Ua faateteleina i ulugalii le leai o se faaaloalo o le tasi i le isi.
Ua lē ano mātua i popolega o a latou fanau.

Mea e Tatau Ona E Iloa

E tāua faauōga i lou soifua mālōlōina i le tino ma tau faalogona, aemaise pe a feagai ma tulaga faigatā.
O popolega ona o faafitauli i le lalolagi, e ono tutupu ai faafitauli e leʻi faatalitalia i lou aiga.
O lipoti mataʻutia i tala fou, e ono matuā popole ai le fanau nai lo o le mea na e mafaufauina.

Mea e Mafai Ona E Faia i le Taimi Nei

Le manatu o le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

E mafai ona fesoasoani mai a tatou uō ma aumai fautuaga aogā. O le tau ina iloa e iai se tasi e manatu mamafa mai, e mafai ona maua ai le malosi e onosaia ai faafitauli.

LE AUALA E FEAGAI AI—Fautuaga Aogā

Pe a feagai ma faafitauli, ia puipuia lau faiā ma ē pele iā te oe i auala nei

FAAMALOSIA LAU FAAIPOIPOGA

Faamalosia lau faaipoipoga

Le manatu o le Tusi Paia: “E sili ona lelei o le toʻalua nai lo o le toʻatasi, . . . auā afai e paʻū le tasi, e toe faatūina o ia e lē la te toʻalua.” (Failauga 4:9, 10) E tatau ona galulue faatasi le ulugalii e pei o se pailate ma lana soa pailate, ae e lē pei o ni vaalele tau se lua o loo fetauaʻi.

Ia maumauaʻi e feutagaʻi pea ma le faaaloalo ma lau paaga e ui i faafitauli. Ia taumafai e onosaʻi.
Ia iai se taimi o le vaiaso e talanoa ai ma lau paaga i faafitauli e tatau ona foʻia. Ia manatua, ia uaʻi i le foʻiaina o le faafitauli, ae lē o le vaai po o ai e saʻo a o ai e sesē.
Ia faaalu faatasi se taimi e faia ai mea e te lua fiafia i ai.
Ia mafaufau i taimi na lua fiafia faatasi ai, e pei o le matamata i ata o le lua faaipoipoga ma isi taimi fiafia.

“E lē o mea uma e ioe i ai se ulugalii, ae e lē faapea ai e lē mafai ona la galulue faatasi. E mafai e se ulugalii ona faia se filifiliga, ma galulue faatasi e faataunuu lenā filifiliga.”—David.

FAATUMAUINA FAAUŌGA

Faatumauina faauōga

E lē gata o le mauaina o le fesoasoani mai i uō, ae ia mafaufau foʻi i auala e avatu ai le fesoasoani. Pe a e faamalosiau i isi o le faamalosia foʻi lenā o oe.
Ia faafesootaʻi nisi o au uō i aso taʻitasi po o ā mai i latou.
Ia fesili i au uō i le auala na feagai ai ma faafitauli, ia e taitutusa ma faafitauli o loo e fesagaʻia.

“Pe a e fesagaʻia faafitauli e tai pei o se afā, e fesoasoani uō iā te oe e faia filifiliga lelei, e tusa pe latou te toe faamanatu mai mea ua e iloaina. E manatu mamafa mai au uō iā te oe, ma e latou te iloa e te manatu mamafa foʻi iā i latou.”—Nicole.

IA AVEA O SE MATUA E LAGOLAGOSUA

Ia avea o se matua e lagolagosua

Le manatu o le Tusi Paia: “Ia faalogologo lelei . . . ae aua le vave ona tautala.” (Iakopo 1:19) I le amataga, atonu e faatalatū le fanau e faailoa mai o latou faalogona, ae pe a e faalogologo ma le onosaʻi e fesoasoani lenā e faailoa mai ai o latou faalogona.

Ia avea oe o sē e faigofie ona faailoa atu i ai e le fanau o latou faalogona. O nisi tamaiti e fiafia e talanoa pe a ō i le taavale pe savavali foʻi, nai lo o le nonofo lelei i lalo ma talanoa faafesagaʻi.
Ia faamautinoa e lē o soona matamata ma faalogologo le fanau i lipoti mataʻutia i tala fou.
Ia faailoa i le fanau mea ua e faia e puipuia ai lou aiga.
Ia faataatia se fuafuaga mo faalavelave faafuaseʻi ma ia faataʻitaʻi ma lau fanau.

“Ia talanoa i lau fanau ma faataga i latou e faailoa mai o latou faalogona. Atonu e latou te mumusu e faailoa mai o latou faalogona fefe, popole po o le ita. Ia taʻu i ai e oo foʻi iā te oe na faalogona, ma faamatala i ai le auala e te feagai ai ma na faalogona.”—Bethany.