4 | Ia Faatumauina le Malosi o Lou Faamoemoe

LE MĀFUAAGA E TĀUA AI

O le popole i faafitauli o le lalolagi, e ono iai se aafiaga i le itu faaletino ma tau faalogona o le tagata. O le toʻatele ua aafia i nei faafitauli, e manatu e lē toe foʻi i se lelei le tulaga o mea. E faapefea la ona latou feagai ma faafitauli i le lalolagi?

• O nisi ua mumusu e mafaufau i mea e tutupu i le lumanaʻi.

• O isi ua faaaogā fualaau faasāina ma le ʻava malosi e faagalo ai o latou faafitauli.

• O isi e manatu e leai se aogā e ola ai ma manatu ai loa e sili ona pule i le ola.

Mea e Tatau Ona E Iloa

• O nisi faafitauli o loo e fesagaʻia e lē tumau ma e ono toe sologa lelei le tulaga o mea.

• E tusa pe lē suia le tulaga o mea ae e iai mea e mafai ona e faia e onosaia ai.

• Ua aumaia e le Tusi Paia se faamoemoe moni lea e foʻia atoatoa ai faafitauli o tagata.

Mea e Mafai Ona E Faia i le Taimi Nei

Le Manatu o le Tusi Paia: “Ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—Mataio 6:34.

Aua le popole i le aso a taeao. Aua le avea le popole i mea e tutupu i le lumanaʻi e taofia ai oe mai le faia o mea e tatau ona fai i le taimi nei.

O le popole e faatatau i mea lē lelei e ono tutupu, e na ona faateteleina ai o lou popole ma faavaivaia ai lou faamoemoe mo se lumanaʻi manuia.

Ua Aumaia e le Tusi Paia se Faamoemoe Moni

Na tatalo atu se faisalamo anamua i le Atua: “O lau afioga o le sulu lea i oʻu vae, ma le malamalama i loʻu ala.” (Salamo 119:105) E faapefea ona faatusaina le Afioga a le Atua i se sulu? Ia mātau auala nei.

I se pō pogisa, e fesoasoani se sulu e iloa ai le mea tatou te savavali ai. I se tulaga talitutusa, o loo i le Tusi Paia fautuaga atamai e mafai ona taʻitaʻia ai i tatou pe a feagai ma se filifiliga faigatā.

O le malamalama e fesoasoani iā i tatou e iloa mamao atu ai le ala. I se tulaga talitutusa, ua faailoa mai i le Tusi Paia e iai se faamoemoe mo se lumanaʻi manuia.