PO O LE A TOE FAALELEIA LO TATOU PANETA?

SUĀVAI MAMĀ

E LĒ mafai ona ola se mea i lo tatou lalolagi paneta pe a aunoa ma le vai, aemaise lava vai mamā. O le mea moni, o le vai o le vaega aupito i telē lava lea e iai i meafaiola uma lava. E maua vai a tagata ma manu mai i vaituloto, vaitafe, nofoaga faataufusi, ma vai o loo i le manava o le eleele. E mafai foʻi e na vai ona faasūsū ai a tatou mea totō.

Māfuaaga ua Utiuti ai le Suāvai Mamā

O le tele o lo tatou lalolagi paneta, o loo ufitia i le vai. Peitaʻi, ua taʻua e le Faalapotopotoga o le Vāaitau a le Lalolagi, “e na o le 0.5% o le vai o loo iai i le lalolagi, o loo faaaogāina ma maua mai ai vai taumafa.” E ui o lenei aofaʻiga itiiti o le vai e lava ma totoe mo meafaiola i le lalolagi, ae o le tele o lenei vai ua faaleagaina pe lē mafai foʻi ona maua e isi ona o suiga i le tau, ma le telē o le manaʻoga o loo iai mo le vai. Ua valoia e tagata atamamai, e oo atu i le isi 30 tausaga, ua lē lava vai mamā e maua e le lima piliona o tagata.

Foafoaina le Lalolagi ia Tumau

O loo iai i le lalolagi paneta ni faataamilosaga faalenatura e fesoasoani e faasaoina ai le vai. E fesoasoani foʻi le palapala, o meaola i le sami ma le vai, faapea le malamalama o le lā ina ia faamamāina ai le vai. Mātau nisi o faamaoniga e iloa ai na foafoaina lo tatou lalolagi paneta ina ia tumau.

E mafai e le palapala ona aveesea le tele o mea e faaleagaina ai le vai. I nofoaga faataufusi, e iai ni laau patino e masani ona latou faamamāina ese mai i le vai, mea oona e maua mai i le kasa o le naitorosene, phosphorus, ma le vailaau e tapē ai manu ninii.
Ua iloa e saienitisi le auala o loo faamamāina ai le vai e ala i mea o le natura. E mafai ona fesoasoani le tafe malosi o le vai ma meaola matuā ninii, i le faamamāina o vai ua faaleagaina.
E iai figota fai atigi e ola i le vai, e mafai ona faamamāina ese mea oona mai i le vai i ni nai aso. E foliga mai e sili atu le auala o loo faamamā ai e nei figota le vai, nai lo o masini tetele o loo faaaogā e nisi.
Ua mafai e lo tatou lalolagi paneta ona faasaoina le vai, e ala i le faataamilosaga o le vai. O lenei faataamilosaga ma isi faataamilosaga faalenatura, ua taofia ai le vai mai i le alu ese atu mai i le ʻea o loo siʻomia ai lo tatou lalolagi.

E TE SILAFIA?

Palapala—Se Faamamā Faalenatura

E mafai e le palapala ona faamamā ese uʻamea, o vailaau oona, o otaota, ma isi mea e faaleagaina ai le vai o loo mitiia e le eleele. O le taimi lava e oo atu ai lenā vai i le manava o le eleele, ua saogalemu mo le taumafaina.

Maamaa ma le Palapala

E mafai ona avea mea e pei o le oneone ma maa e pei o se faamamā, e aveese ai nisi o mea e faaleagaina ai le vai.

Meaola Matuā Ninii

E mafai e meaola matuā ninii o loo i le palapala ona aveesea ni mea oona mai i le vai, lea e ono aafia ai tagata. E oo lava i suāuu oona, e mafai e nisi o na meaola ona faataapeina, ma suia e avea ma vai po o le kasa o le kaponi.

Se Malosiaga o Loo Iai i le Palapala

Pe afai e tuufaafeagai le malosiaga o loo i le palapala, ma le malosiaga o loo i se vailaau oona o loo iai i le vai, e mafai la e le malosiaga o loo i le palapala ona aveesea le vailaau oona mai i le vai. O se faataʻitaʻiga, pe afai e iai le vailaau o le ammonium i le vai, e mafai e le malosiaga o loo iai i le ʻele (o se ituaiga palapala) ona aveesea lenā vailaau.

Taumafaiga a Tagata

Tuufaatasiga o ata: 1. O loo faaleleia e se tamāloa se vaega o lana taavale o loo mama mai ai le suāuu. O loo ia faaaogā se ʻapa e faaalu i ai le suāuu. 2. O loo faafoʻi atu e se tamāloa ni vailaau oona i se nofoaga e mafai ona lafoaʻi ai vailaau i se auala talafeagai. — Pe a faaleleia vaega o taavale o loo mama mai ai le suāuu, ma saʻo le auala e lafoaʻia ai vailaau, o le a fesoasoani e mamā ai pea a tatou suāvai taumafa

Ua fautuaina e tagata atamamai le faaaogā tatau o le vai. Ina ia faaitiitia le faaleagaina o vai, ua latou fautua mai foʻi ina ia faaleleia vaega o taavale lea e mama mai ai le suāuu, ʻalofia le faaalu i le vai o le faleese o ni vailaau faafomaʻi, pe sasaa foʻi ni mea oona i alāvai.

Ua maua e tagata atamamai nisi auala fou e aveese ai le oona mai i le suāsami, ma le faamoemoe ina ia maua e tagata le tele o vai e mafai ona taumafa.

Peitaʻi, o lenei faiga e matuā taugatā ma e manaʻomia ai le matuā tele o le malosiaga. I se lipoti i le 2021 e faatatau i le faasaoina o vai taumafa, na taʻua ai e se sui o Malo Aufaatasi e faapea: “Ua manaʻomia ona faateleina taumafaiga i le faasaoina o le vai i le lalolagi aoao, nai lo o taumafaiga o loo iai.”

O le ā ua Folafola Mai i le Tusi Paia?

“Ua ia [Atua] ave aʻe matāua o vai; ua avea ma timu ma puao; ua māʻuluʻulu mai ao, ua totō mai i luga o tagata.”—Iopu 36:26-28.

Na foafoaina e le Atua faataamilosaga faalenatura ina ia faasaoina ai vai o loo iai i le lalolagi.—Failauga 1:7.

Ia mātau: Talu ai na faia e Lē na foafoaina mea lo tatou lalolagi ina ia faatumauina le mamā o vai, e mafai la ona faapea atu, o loo iā te ia le faanaunauga ma le mana e foʻia ai faafitauli ua faapogaia e tagata. Tagaʻi i le mataupu “Folafola Mai e le Atua o le a Tumau lo Tatou Paneta,” i le itulau 15.