Folafola Mai e le Atua o le a Tumau lo Tatou Paneta

O le faaiʻuga lenā na faia e tagata suʻesuʻe mai atunuu eseese, e faatatau i le suiga o le tau. Pe afai e te talitonu e manatu mamafa Lē na foafoaina mea i tagata, atonu la o lenei faaiʻuga faasaienisi, ua faamanatu atu ai iā te oe le tele o auala faalenatura na foafoaina e le Atua, ina ia faaleleia ai e lo tatou paneta o ia lava.

Peitaʻi, ona ua matuā faaleagaina e tagata le lalolagi, ua lē mafai ai e le lalolagi ona faaleleia o ia lava. Aiseā e tatou te mautinoa ai o le a gaoioi le Atua e faaleleia le lalolagi?

Mātau mau o loo lisiina atu i le pusa, lea e faamautinoa mai ai o le a faaleleia ma faatumauina le lalolagi.

• Na foafoaina e le Atua lo tatou paneta. “Na foafoaina e le Atua le lagi ma le lalolagi i le amataga.”—Kenese 1:1

• O le Atua e ana le lalolagi. “O Ieovaa e ana le lalolagi ma mea uma o loo iai.”—Salamo 24:1

• Na foafoaina e le Atua le lalolagi ia tumau. “Ua ia faavaeina le lalolagi i luga o ona faavae; e lē maluelue mai i lona tulaga e faavavau, faavavau lava.”—Salamo 104:5

• Ua folafola mai e le Atua o le a iai le ola i le lalolagi e faavavau. “O Lē na foafoaina le lagi, o le Atua moni, o le Mataisau na faia le lalolagi, . . . Na ia lē foafoaina fua le lalolagi, ae na ia faia ina ia ʻainā.”—Isaia 45:18

• Ua folafola mai e le Atua o le a ola e faavavau tagata i le lalolagi. “E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:29

Na foafoaina e le Atua le lalolagi ina ia ola fiafia ai le tagata e aunoa ma le faaleagaina. Ua valoia mai i le Tusi Paia, o le a faaiʻuina e Ieova le Atua i lana taimi atofaina gaoioiga manatu faapito a tagata, lea ua faaleagaina ai le laueleele.—Faaaliga 11:18

Ua folafola mai i le Tusi Paia, o le a toe faaleleia e le Atua le lalolagi e avea ma Parataiso matagofie, ma faamafola lona aao ina ia “faamalie le manaʻo o meafaiola uma lava.”—Salamo 145:16