Ia Lotomalie

LE MĀFUAAGA E TĀUA AI

Ua faapea mai Jessica Koehler o se fomaʻi o le mafaufau, o tagata e lotomalilie e saʻo la latou vaai i mea, ma e lē manaʻonaʻo i mea e maua e isi. O lea, e sili atu lo latou fiafia ma e lē popolevale. O le mea moni, o nisi o tagata e sili ona fiafia ae e lē tele ni a latou tupe. Aiseā? Talu ai e latou te faatāua mea e lē mafai ona faatau i tupe, e pei o le fiafia e maua mai i le faatasitasi ma aiga ma uō.

MEA E MAFAI ONA E FAIA

Aua le faatusatusaina oe i isi. O le a lē faamalieina oe ma e lagona le matauʻa, pe a e faatusatusa lou olaga i olaga o ē e foliga mai e mauʻoa. Ae e lē talafeagai le faia o lenā faatusatusaga, auā o le mea moni o nisi tagata mauʻoa e tele a latou aitalafu. Ua faapea mai Nicole e nofo i Senegal: “E tusa pe e lē tele ni aʻu tupe ae ou te maua pea le fiafia. O le lotomalie, ou te lagona ai le fiafia e tusa pe e tele atu mea e maua e isi.”

Ia faataʻitaʻi: ʻAlofia le matamata i faalauiloaga po o ata e tuu e tagata i le social media lea e faamatilatila ai le tele o a latou meafaitino po o olaga mauʻoa.

Ia lotofaafetai i mea ua e maua. O tagata e lotofaafetai e lotomalilie foʻi i mea ua maua, ma e lē manatu e tatau ona latou mauaina nisi mea e sili atu. Ua faapea mai Roberton e nofo i Haiti: “O le tele o taimi, ou te mafaufau ai i le agalelei o isi iā te aʻu ma loʻu aiga. Ona ou faailoa atu lea iā i latou o loʻu matuā talisapaia o lo latou agalelei. Ou te aʻoaʻoina foʻi loʻu atalii e valu tausaga ina ia faafetai atu i tagata e avatu mea mo ia.”

Ia faataʻitaʻi: Ia tusi i lalo se mea e te lotofaafetai ai i aso taʻitasi. Atonu o le lelei o lou soifua mālōlōina, o le fealofani o lou aiga, o le iai o ni uō moni, po o se lā goto matagofie.

E lē faigofie i nisi taimi le lotomalie i mea ua maua, ae e tele faamanuiaga o le faaalia pea o le lotomalie. O le lotomalie e maua ai foʻi le fiafia, o se mea e lē mafai ona faatauina i tupe.