AUALA E FEAGAI AI MA LE TAUGATĀ O LE SOIFUAGA

Ia Limafoaʻi

E te ono manatu e faigatā ona e faaalia le limafoaʻi ona o le taugatā o le soifuaga. Ae o le limafoaʻi e fesoasoani iā te oe e feagai ai ma faafitauli tau tamaoaiga. E mafai ona sefe au tupe, ae i le taimi e tasi e te faaalia le limafoaʻi.

LE MĀFUAAGA E TĀUA AI

E tatou te fiafia ma lelei o tatou faalogona pe a limafoaʻi, e tusa lava pe itiiti mea e mafai ona tatou foaʻi atu i isi. E tusa ai ma suʻesuʻega a fomaʻi, e tele aafiaga lelei i o tatou tino ma mafaufau pe a faaalia le limafoaʻi. O se faaaʻoaʻoga, e mafai ona faaitiitia ai le popole, atuatuvale, toto maualuga, e oo lava i tigā o le tino. E lē gata i lea, e lelei ai foʻi le moe.

“E sili le fiafia e maua i le foaʻi atu i lo o le talia mai.”—Galuega 20:35.

Pe a tatou limafoaʻi i le itu tautupe po o isi auala, o le a faigofie ona tatou talia le fesoasoani a isi i le taimi e manaʻomia ai. Ua faapea mai Howard e nofo i Egelani: “E ma te mataala ma laʻu avā i auala e fesoasoani ai i isi. Pe a oo i taimi e ma te manaʻomia ai le fesoasoani, e ma te lē matamumuli e talia le fesoasoani.” O le mea moni, o tagata e foaʻi ma o latou lotoatoa e lē faatalitalia e toe tauia i latou. Ae o le a latou maua ni uō moni e fesoasoani iā i latou i taimi e manaʻomia ai.

“Ia outou foaʻi atu pea, ona foaʻi mai lea o tagata iā te outou.”—Luka 6:38.

MEA E MAFAI ONA E FAIA

Tufa atu i isi mea ua iā te oe. E tusa pe e te lē tagolima, ae e mafai lava ona e foaʻi atu mea i isi e pei o le faia o se kuka faigofie. E nonofo Duncan ma lona aiga i Uganda. E ui ina lima vaivai ae e latou te faaalia pea le limafoaʻi. Ua faapea mai Duncan: “E ma te valaaulia ma laʻu avā nisi e matou te aai i le fale i Aso Sa. E ese le ma fiafia e faifaimea faatasi ma isi.”

E tāua foʻi le magafagafa a o tufa atu mea ua iā te oe. E lē o se gaoioiga atamai le soona tufa atu o mea i isi, ae e lē lava mea e tausia ai lou aiga.—Iopu 17:5.

Ia faataʻitaʻi: Ia valaaulia se tasi mo se taumafataga faigofie po o se vai taumafa. Pe afai e iai ni mea e te lē o toe manaʻomia, e lelei foʻi le tufa atu i au uō po o tuaoi o ē e mafai ona latou faaaogāina.

Isi auala e foaʻi atu ai. O nisi meaalofa e sili ona lelei e lē alu ai ni tupe. E mafai ona faaalu lo tatou taimi i isi o loo manaʻomia le fesoasoani. E tāua foʻi a tatou upu agalelei. O lea, ia faailoa atu i isi e tatou te talisapaia ma alolofa iā i latou.

Ia faataʻitaʻi: Ia fesoasoani i isi i le faia o feʻau po o le lipea o mea e manaʻomia i le fale. Ia tusi se card faalaeiau pe lafo se text i sau uō, e tusa po o se text puupuu e faailoa i ai o loo e mafaufau atu iā te ia.

E matuā tauia oe pe afai e te mataalia i auala e faaalia ai le limafoaʻi.

“Aua neʻi galo le faia o mea lelei, ma le tufa atu o mea i isi.”—Eperu 13:16.

O se ulugalii o loo fesoasoani i se fafine matua e faamamā lona fanua. O loo avatu e le fafine matua ni ipu ti vevela mo i laʻua, a o la saluina le lapisi.