Aperaamo​—O se Uō a le Atua

O LE tasi o nofoaga sa o i ai tagata ma nonofo ai ina ua uma le lolo o Uro. Na oo ina avea ma aai tāua e i ai ni fale mananaia. Ae o tagata sa i ai i ina sa latou tapuai i ni atua sese. O le auala foi lena sa latou faia i Papelu. O tagata o Uro ma Papelu sa le pei i latou o Noa ma lona atalii o Semu, sa faaauau pea ona auauna i laʻua i a Ieova.

E tusa o le 350 tausaga talu ona mavae le lolo, sa maliu loa Noa faamaoni. E na o le lua tausaga mulimuli ane ai ona fanau ai lea o le tamaloa lena e te vaai atu i ai i le ata. O lona igoa o Aperaamo. Sa nonofo ma lona aiga i le aai lena o Uro.

I le tasi aso sa tulei atu ai Ieova i a Aperaamo: ‘Ia e tuua Uro ma lou aiga ma e alu atu i le nuu o le a ou faasino atu iā te oe.’ Pe sa usitai Aperaamo i le Atua ma tuua mea lelei a Uro? Ioe, sa ia faia. Ma ona e usiusitai pea Aperaamo i le Atua na iloa ai o ia o se uo a le Atua.

Sa o faatasi o ia ma isi o lona aiga ina ua ia tuua Uro. Sa alu lona tamā o Tara. Faapena foi Lota le atalii o lona uso ma le avā a Aperaamo o Sara. I sina vaitaimi sa taunuu loa i le nuu e igoa i a Karana, le mea na oti ai Tara. Ua mamao tele mai i latou mai Uro. Ina ua mavae sina taimi na tuua ai e Aperaamo ma lona aiga ia Karana ona latou taunuu ai lea i Kanana. O i ina na tulei atu ai Ieova: ‘O le nuu lenei ou te avatua i lau fanau.’ Sa nofo Aperaamo i fale ie i Kanana.

Sa amata loa ona fesoasoani le Atua i a Aperaamo ma sa tele lana lafu mamoe ma isi mea ola ma le selau o auauna. Ae o ia ma Sara sa leai se la fanau.

Ina ua 99 tausaga o Aperaamo, sa tulei atu Ieova faapea: ‘Ou te tauto atu o le a avea oe ma tamā o se nuu tele o tagata.’ E mafai faapefea lenei mea ae ua matutua tele Aperaamo ma Sara e toe fai se la tama?