Ua Maua le Avā Lelei a Isaako

PE E te iloaina le fafine lena o i le ata? O Repeka. Ae o le tamaloa o loo ia alu atu e feiloai i ai o Isaako. O le a avea o ia ma ana avā. Na faapefea ona tupu lenei mea?

Sa manao Aperaamo ia maua se avā lelei ma lona atalii. Sa lē manao o ia e faaipoipo atu Isaako i se fafine o Kanana, auā o na tagata e tapuai i atua sese. Ona valaau lea e Aperaamo o lana auauna ma fai atu: ‘Ou te manao e te alu i loʻu aiga i Karana e aumai ai se avā mo loʻu atalii o Isaako.’

Sa ave loa e le auauna a Aperaamo kamela e sefulu ma o mo se malaga umi. Ina ua oo atu e latalata i le mea e nonofo ai aiga o Aperaamo, sa latou faatali ai i ina i le vaieli. Ua latalata i le afiafi, o le taimi e o mai ai fafine o le aai e asu vai i le vaieli. Ona fai ai lea e le auauna a Aperaamo se tatalo i a Ieova: ‘Ia avea le fafine na te aumaia ni vai mo aʻu ma aʻu kamela ma lē e te filifilia e avea ma avā a Isaako.

E lei umi lava ae sau loa Repeka e asu vai. Ina ua fai atu i ai le auauna mo sina vai, sa ia aumaia i ai. Ona alu atu loa lea o ia ma aumai ni vai mo kamela ua fia feinu. Sa faigata tele auā o kamela e feinu tetele.

Ina ua uma, sa fesili atu loa i ai le auauna po o ai lona tamā. Sa ia fai atu foi i ai pe e mafai ona nofo i le po atoa i lo latou fale. Sa tali mai o ia: ‘O loʻu tamā o Petueli, ma e maua le avanoa e te nofo ai ma i matou.’ Sa iloa lelei e le auauna a Aperaamo o Petueli o le atalii o le uso o Aperaamo o Nakori. Ona tootuli ai lea o ia i lalo ma faafetai i a Ieova i le taʻitaʻiina o ia i aiga o Aperaamo.

I le po lava lena na taʻu atu ai e le auauna a Aperaamo i a Petueli ma le tuagane o Repeka o Lapana le mafuaaga sa sau ai o ia. Sa latou malilie uma o le a alu Repeka e faaipoipo ma Isaako. Sa ioe foi i ai Repeka e alu. O le isi loa aso na sosoo ai sa tietie ai loa i laʻua i kamela ma amata le malaga umi e toe foi i Kanana.

Ina ua la taunuu atu, ua oo i le afiafi. Sa iloa atu e Repeka se tamaloa o savali mai i le fanua. O Isaako. Sa fiafia tele o ia ina ua vaai i a Repeka. O lona tinā o Sara ua oti o ia mo tausaga e tolu, ma o loo ia faanoanoa ai pea. Ae ua alofa tele Isaako i a Repeka, ma ua toe fiafia nei o ia.