Masaga sa Eseese i La‘ua

O TAMA e toalua o loo i inei e eseese i laua. Pe e te iloaina o la igoa? O Esau e tulimanu, ae o le tama na e tausia mamoe o Iakopo.

O Esau ma Iakopo o le masaga a Isaako ma Repeka. Sa fiafia tele le tamā i a Esau auā o ia o sē e tulimanu lelei ma na te mauaina mai mea e fai ai mea ai i le aiga. Ae sa sili le alofa o Repeka iā Iakopo auā e filemu, ma o ia foi o se tama e lē gaoiā.

Sa ola pea le tamā o lo la tamā o Aperaamo, ma e fiafia Iakopo e faalogo iā te ia a o talanoa i a Ieova. Ona oti ai lea o Aperaamo ina ua 175 ona tausaga ae ua taʻi 15 tausaga le matutua o le masaga.

Ina ua 40 tausaga o Esau sa nofo o ia i fafine e toalua mai i Kanana. Sa avea ma mea e faanoanoa ai Isaako ma Repeka, auā o na fafine e lei tapuai atu iā Ieova.

O le mea lenei sa tupu na mafua ai ona ita Esau i lona uso o Iakopo. Ua oo mai le taimi e avatu ai e Isaako le faamanuiaga i lona atalii matua. Ona e matua Esau i a Iakopo, sa faatalitalia ai e Esau o ia e mauaina le faamanuiaga. Peitai ua uma ona faatau atu e Esau le aiā e maua ai le faamanuiaga i a Iakopo. E le gata i lea, ae ina ua fananau mai nei tama e toalua sa taʻu atu e le Atua e maua e Iakopo le faamanuiaga. Sa avatu loa e Isaako le faamanuiaga i lona atalii o Iakopo.

Mulimuli ane, ina ua iloa e Esau lenei mea ona ita ai lea o ia i a Iakopo. Sa ita tele o ia ma faapea ai o le a ia fasiotia Iakopo. Ina ua faalogo i ai Repeka, ona popole ai lea o ia. Ona ia faapea atu lea i a Isaako: ‘O le a leaga tele pe afai e faaipoipo Iakopo i se tasi o nei fafine o i Kanana.’

Ona valaau atu lea o Isaako i a Iakopo ma fai atu i ai: ‘Aua e te faaipoipo i se fafine Kanana. Ae ia e alu i le aiga o le tamā o lou tinā o Petueli i Karana ma e faaipoipo i se tasi o afafine o lona atalii o Lapana.

Sa faalogo Iakopo i lona tamā, ma sa alu loa sana malaga umi i le mea o nonofo ai lona au aiga i Karana.