Toʻatele le Aiga o Iakopo

SEI vaai atu i lena aiga e toatele. O atalii na e toa 12 o Iakopo. Sa i ai foi ni ona afafine. Pe e te iloa se igoa o ia tamaiti? Sei o tatou aʻoaʻoina nisi o ō latou igoa.

Na fanaua e Lea o Reupena, Simeona, Levi ma Iuta. Ina ua leai se fanau a Rasela ona ia avatu lea o lana auauna fafine o Pila i a Iakopo, ma ua fanaua mai ai Tanu ma Nafatali. Ona nonofo foi lea o Iakopo ma Selepa le auauna fafine a Lea, ona fanaua ai lea o Kato ma Asera. Ona toe fanaua foi lea e Lea o Isakara ma Sepulona.

Mulimuli ane, ona fanau ai lea e Rasela o se tama. Sa ia faaigoa i a Iosefa. Mulimuli ane, o le a tatou aʻoaʻoina po o ai Iosefa, auā o ia o se tagata tāua tele. O atalii na e toa 11 na fanaua e Iakopo a o nonofo ma le tamā o Rasela o Lapana.

Sa i ai foi nisi afafine o Iakopo, ae na o le tasi lava le igoa ua aumaia e le Tusi Paia. O lona igoa o Tina.

Na oo ai le taimi e filifili ai Iakopo e tuua Lapana ae toe alu atu i Kanana. Ona ia faapotopoto ai lea o lona aiga e toatele ma ana lafu mamoe ma povi, ma amata le malaga umi.

Ina ua toe nonofo le aiga o Iakopo mo se vaitaimi i Kanana, ona toe fanau ai lea e Rasela se isi tama. Na tupu lenei mea a o latou malaga. Sa faigata tele mo Rasela ma iʻu lea i lona oti, a o fanau. Ae sa le afaina le pepe tama. Sa faaigoa e Iakopo o Peniamina.

Tatou te fia manatua igoa o atalii e 12 o Iakopo auā na tutupu mai ai le nuu o Isaraelu. O ituaiga e 12 o Isaraelu sa faaigoa mai atalii e toa 10 o Iakopo ma atalii e toalua o Iosefa. Sa ola Isaako mo tausaga e tele ina ua mavae le fananau mai o ia tama, ma sa fiafia o ia i le tele o atalii a lona atalii. Ae sei o tatou vaai i le mea na tupu i le afafine a lona atalii o Tina lea.