Miti a Farao

E LUA tausaga na mavae a o i ai pea Iosefa i le fale puipui. E lei manatua lava e le tautu uaina o ia. I le tasi po na fai ai e Farao ni miti faapitoa se lua, ma sa ia taumatea po o ā ona uiga. Pe o e vaai atu i ai o loo moe o ia i ina? O le isi taeao sa valaau ai e Farao tagata popoto uma ma taʻu atu i ai ana miti. Ae sa latou le mafai ona faamatalaina uiga o miti.

Ona toe manatua mulimuli ane ai lea e le tautu uaina Iosefa. Ua ia fai atu i a Farao: ‘A o ou i ai i le fale puipui, sa i ai se tagata na te mafai ona ia faamatala miti.’ Ona aumai faavave ai lea e Farao o Iosefa.

Ona faamatala lea e Farao o ana miti i a Iosefa: ‘Na ou iloa ni povi pepeti e fitu. Ona ou toe iloa ai lea o povi paeee e fitu. Ona ʻaina uma lea e povi paeee o povi pepeti.’

‘I laʻu miti lona lua sa ou iloa ai, o ʻau saito e fitu ua tutupu mai i le ʻau e tasi, ua matutua. Ona ou iloa ai lea o ʻau saito e fitu e tino leaga ua mamago. Ua ʻaina foi e ʻau saito tino leaga o ʻau saito e fitu matutua.’

Ona fai atu lea o Iosefa i a Farao: ‘E tutusa lava uiga o na miti e lua. O povi pepeti e fitu ma ʻau saito matutua e fitu o tausaga ia e fitu, ae o povi tino leaga ma le paeee e fitu ma ʻau saito tino leaga e fitu o isi na o tausaga ua toe faaopoopo atili i ai. E fitu tausaga o le a tele ai mea ai i Aikupito. Ona sosoo ai lea ma le isi fitu o tausaga e oge ai.’

Ona fai atu lea o Iosefa i a Farao: ‘Filifili se tagata poto e pule i le aoaoina mai o mea ai i tausaga lelei e fitu. Ona le fia aai ai lea o tagata i le isi fitu o tausaga leaga e laiti mea ai e ola ai.’

Sa fiafia i ai Farao i lea manatu. Ma sa ia filifilia ai Iosefa ina ia aoaoina mai mea ai ma faaputu. Na avea Iosefa ma se tagata tāua e pito atu i a Farao i Aikupito.

Valu tausaga mulimuli ane ai, i le taimi o le oge, sa vaai atu Iosefa ua o mai ni tamaloloa. Pe e te iloa o ai i latou? O ona uso matutua e toa 10! Sa auina atu i latou e lo latou tamā o Iakopo e o i Aikupito talu ai ua leai ni a latou mea ai i lo latou aiga i Kanana. Sa iloa lelei e Iosefa ona uso ae latou te lei iloaina o ia. Pe e te iloaina ai se ā? Talu ai ona ua tupu ma ua matua Iosefa, ma ua ofu foi o ia i ni ofu ese.

Ua manatua e Iosefa a o laitiiti sa fai lana miti e o mai ona uso ma ifo atu iā te ia. Pe e te manatua sa e faitauina lena mea? Ua mafai nei e Iosefa ona iloa sa auina atu o ia e le Atua i Aikupito, ona o se mafuaaga lelei. O le ā e te manatu na fai e Iosefa? Sei o tatou vaai.