Ua Ō Atu le Aiga i Aikupito

UA LE mafai nei ona toe pulea e Iosefa ona faalogona. Ona ia faatonu lea o ana auauna uma ia o ese ma le potu. Ina ua na o i latou ma ona uso, ona amata lea ona tagi o ia. Tatou mafaufau i le tetei o ona uso, auā latou te le iloa pe ai se ā ua tagi ai o ia. Mulimuli ane ona ia fai atu lea: ‘O aʻu o Iosefa. Pe o ola pea loʻu tamā?’

Ua tetei uma ona uso, ua le mafai ona toe tautatala ma ua fefefe. Ae ua fai atu Iosefa: ‘Sōsō mai tele faamolemole.’ Ona ia fai atu lea: ‘O aʻu o lo outou uso o Iosefa sa outou faatauina i Aikupito.’

Sa tautala i ai Iosefa i ni upu agalelei: ‘Aua tou te tuuaia outou ina ua outou faatauina aʻu. O le Atua moni lava na aumaia aʻu i Aikupito ina ia faaolaina tagata. Ua tofia aʻu e Farao e fai ma pule i le atunuu atoa. Ia outou o vave nei ma taʻu atu i loʻu tamā nei mea. Ma fai atu i ai ia o mai ma nonofo i inei.’

Ona fusi lea e Iosefa ona uso ma sogi atu i a i latou uma. Ina ua faalogo Farao ua o mai uso o Iosefa, ona ia fai atu lea i a Iosefa: ‘Ia tuu atu i a i latou ni taavale solofanua ia latou o ai ma aumai lo latou tamā ma o latou aiga. Ou te avatua i a i latou fanua aupito lelei i Aikupito.’

Sa latou faia faapea. O loo e vaai atu nei i a Iosefa o loo feiloai ma lona tamā ina ua o mai uma ma lana aiga i Aikupito

Ua faatoateleina pea le aiga o Iakopo. Sa 70 lo latou aofai ina ua o mai i Aikupito, e aofia ai ma Iakopo ma lana fanau ma fanau a lana fanau. O a latou avā, atonu foi ma le tele o ni auauna. Sa latou nonofo uma i Aikupito. Na faaigoa i latou o Isaraelu, talu ai ua suia e le Atua le igoa o Iakopo i a Isaraelu. Ua avea Isaraelu ma ni tagata faapitoa i le Atua, e pei o le a tatou iloa mulimuli ane ai.