Ituaiga Fou o Mea‘ai

PE E mafai ona e iloaina mea o loo tufiina e tagata mai le eleele? E pei lava o se sau ua toʻa. E paʻepaʻe, ma e manifinifi toe māmā. Ae e le o se sau ua toʻa, o se mea e aina.

Na o le tasi le masina talu ona tuua e Isaraelu Aikupito. Ua i ai nei i latou i le vaomatua. E itiiti mea ai e ola ai, ona amata lea ona muimui tagata, ma faapea mai: ‘E sili ai pe ana fasioti i matou e Ieova i Aikupito. Ae i lea o loo maua pea mea ai matou te mananao i ai.’

Ona faapea mai lea o Ieova: ‘O le a ou faatotoina ifo mea ai mai le lagi.’ I le isi taeao sa vaai atu Isaraelu ua toulu mai nei mea papaʻe, ona fesili lea o le tasi i le tasi: ‘O le ā ea lenei?’

Ona faapea atu lea o Mose: ‘O le mea ai lenei ua aumaia e Ieova tou te aai ai.’ Ua taʻua e tagata o le MANAI. E pei o ni keke māmā e faia i le meli.

‘Ia outou aoina mea e mafai e le tagata ona ai,’ o le faatonuga lena a Mose i tagata. O le galuega lena i taeao uma. Ae a vevela le la, ona mou atu lea o le manai o i luga o le eleele.

Ona toe faapea atu lea o Mose: ‘Aua neʻi i ai se tasi na te faaputuina ni manai mo le isi aso.’ Peitai sa lei faalogo isi tagata. Pe tou te iloa le mea na tupu? O le isi taeao na sosoo ai sa tumu uma le manai na latou teuina i ilo, ma ua elo!

E tasi lava le aso o le vaiaso, na fetalai ai Ieova i tagata latou te aoina ia faaluaina le tele o manai. O le aso lona ono lea. Ma sa tulei atu Ieova ia teuina ni isi manai mo le isi aso, auā na te lē faatouluina mai ni mea ai i le aso lona fitu. Ina ua latou teuina le manai mo le aso lona fitu, e lei i ai ni ilo pe elo foi! O se tasi lena o vavega!

O tausaga uma lava sa i ai Isaraelu i le vaomatua sa fafagaina latou e Ieova i le manai.