Tuuina Atu e Ieova Ana Tulafono

E TUSA ma le lua masina ua mavae talu ona latou o ese mai Aikupito, ona taunuu atu ai lea o Isaraelu i le Mauga o Sinai, po o Horepa. O i ina foi sa fetalai mai ai Ieova i a Mose mai le laau mumū. Sa nonofo ai loa tagata i ina mo sina vaitaimi.

A o faatalitali tagata i lalo, sa alu atu Mose i luga o le mauga. O i ina na fetalai ai Ieova i a Mose e manao ia usiusitai atu Isaraelu iā te ia ma fai i latou ma ona tagata faapitoa. Ina ua sau Mose i lalo, sa ia taʻu atu i a Isaraelu mea na tulei mai ai Ieova. Sa fia usiusitai tagata, auā sa fia avea i latou ma tagata o Ieova.

Sa faia e Ieova se asu i le tumutumu o le mauga, ma faapā se faititili leo tele. Sa ia fetalai atu foi i tagata: ‘O aʻu o Ieova lou Atua o le na aumaia outou mai Aikupito.’ Ona ia poloai mai lea: ‘Aua tou te tapuai atu i se isi lava atua tau lava o aʻu.’

Ona toe avatu lea e le Atua isi tulafono e iva, i a Isaraelu. Sa fefefe tele tagata, ma fai atu i a Mose: ‘Ia e tautala mai, auā matou te fefefe pe a fetalai mai le Atua neʻi matou oti.’

Mulimuli ane sa toe tulei Ieova i a Mose: ‘Ia e sau i a te au i luga o lenei mauga. Ou te avatu iā te oe ni papa maa se lua ua ou tusia ai ni tulafono ou te manao e tausia e tagata.’ E 40 ao ma po sa i ai Mose i le mauga.

E tele ni tulafono a le Atua mo ona tagata. Sa avatu e le Atua papa maa e lua i a Mose. Sa tusia lava e le Atua ia tulafono e 10 sa ia tulei atu ai i tagata. Ua faaigoaina o Tulafono e Sefulu.

O Tulafono e Sefulu o ni tulafono tāua. Faapena foi ma isi tulafono e tele. O le tasi o ia tulafono e faapea: ‘Ia e alofa atu i a Ieova lou Atua ma lou loto atoa, lou manatu atoa, lou agaga atoa ma lou malosi atoa.’ Ma o le isi: ‘Ia e alofa atu i lou tuaoi e pei lava o oe iā te oe.’ O Iesu Keriso, sa ia faapea mai o tulafono sili na e lua sa tuuina atu e Ieova i ona tagata o Isaraelu. O le a tatou aʻoaʻoina ni mea se tele e uiga i le Alo o le Atua ma ana aʻoaʻoga mulimuli ane ai.