Faleʻie mo le Tapuaʻiga

PE E te iloa o le ā lenei fale? O se fale ie faapito e tapuai ai i a Ieova. E taʻua o le fale fetafai. Sa maea ona faia e tagata ina ua mavae le tausaga talu ona latou tuua Aikupito. Pe o le manatu o ai na ala ai ona fausiaina?

O le manatu o Ieova. A o i ai Mose i le mauga o Sinai, sa taʻu atu e Ieova iā te ia pe faapefea ona fai le fale ie. Sa faia ina ia faigofie ona toe tuu eseeseina. I lena auala o le a mafai ai ona feaveai ona vaega i se isi nofoaga, ona toe faapipii foi lea. O lea ao femalagai Isaraelu i le vaomatua, sa latou tauaveina lava le fale ie.

Afai e te vaai i totonu o le tamai potu o i le pito o le fale ie, o le a e iloa ai se pusa. E taʻua o le atolaau o le feagaiga. O loo i ai ni agelu se toalua po o kerupi na faia i auro, e taitasi i le itu. Sa toe tusia e Ieova Tulafono e Sefulu i papa maa e lua, ona ua taei e Mose maa muamua. Sa tuuina maa i totonu o le atolaau o le feagaiga. Faapena foi ma se fagu manai. Pe e te manatua o le a foi le manai?

O le uso o Mose o Arona sa tofia e Ieova e fai ma ositaulaga sili. Na ia taʻitaʻiina tagata e tapuai i a Ieova. O ona atalii foi o ni ositaulaga.

Sei vaai atu nei i le potu lapoa o le fale ie. E faaluaina lona tele na i lo le tamai potu. Pe o e iloa atu le pusa o loo alu aʻe ai le asu? O le fata faitaulaga lena e faamu ai e ositaulaga mea manogi. E i ai ma le tuugalamepa o i ai lamepa e fitu. Ma o le laulau le mea lona tolu o i le potu. O loo tuu ai ni papa falaoa e 12.

I le lotoa o le fale fetafai o loo i ai se tanoa telē, e tumu i vai. E faaaoga e fulufulu ai ositaulaga. O loo i ai foi le fata faitaulaga lapoa e susunu ai manu mamate mo taulaga i a Ieova. O le fale ie e tu tonu lava i le ogatotonu o le toagalauapi, ma e siosiomia i fale ie o tagata Isaraelu.