Kitiona ma Ana Tamāloloa e 300

PE E te iloaina le mea o loo tupu i inei? O tagata tau na a Isaraelu. O loo faō i latou e feinu. O le Faamasino o Kitiona lena e tu latalata atu i a i latou. O loo vaavaai atu o ia i a i latou pe faapefea ona latou feinu.

Sei vaavaai lelei atu i auala eseese o loo feinu ai tamaloloa. O isi o loo matuai fufui atoa ma o latou mata i le vai. A o le isi o loo asuasu ifo vai i luga i lona lima, ma ia mafai ona vaavaai solo o ia a o inu. Sa tulei atu Ieova i a Kitiona ia filifili mai na o e o loo vaavaai solo a o feinu i latou. Ae o le isi toatele, sa toe aauina atu i o latou aiga. Sei o tatou iloa le mafuaaga.

Ua toe i ai nei foi Isaraelu i le tele o faafitauli. O le mafuaaga, ua le usiusitai i latou i a Ieova. O tagata Mitiana ua pule ma ua faatiga foi i a i latou. O lea sa alalaga atu ai Isaraelu i a Ieova mo se fesoasoani, ma sa faalogo Ieova i lo latou tagi.

Ona fai atu lea o Ieova i a Kitiona e fai sana vaega au, ona ia faapotopoto lea o tagata e 32,000. Ae o le vaega tau faasaga i a Isaraelu e 135,000 tagata. Sa faapea atu Ieova i a Kitiona: ‘Ua toatele tele lau vaega au.’ Aiseā na faapea atu ai Ieova?

Talu ai, afai e manumalo Isaraelu, ona latou manatu lea ua ala ona malo ona o i latou lava. Atonu e manatu i latou sa le manaomia le fesoasoani a Ieova ia manumalo ai. O lea na faapea atu ai Ieova i a Kitiona: ‘Ia fai atu i tagata uma lava o fefefe e toe foi atu i o latou aiga.’ E toa 22,000 tagata tau na toe foi. Na totoe ai na o tagata e 10,000 e tau faasaga i le 135,000 o fitafita.

Peitai, faalogo! Sa faapea atu Ieova: ‘O loo toatele pea ou tagata.’ O lea sa faapea atu Ieova i a Kitiona e ave tagata i le vai e faafeinu, ma ia toe faafoi i latou uma lava o e inu ma faō i le vai. ‘Ou te avatua iā te oe le manumalo i le na o le 300 tagata o e o loo feinu ma vaavaai solo,’ o le tautinoga lea a Ieova.

Ua oo mai nei le taimi e fai ai le taua. Sa tuuina atu e Kitiona ana tamaloloa e 300 i vaega e tolu. E tofu le tagata ma le pu, ma le kate. A latalata loa i le tulua o le po, ona latou faapotopoto atu lea i tafatafa o le mea o ai le fili. Ma o le taimi tonu lava lena o le a ili ai a latou pu ma taei ai a latou kate ma valaau: ‘O le pelu a Ieova ma Kitiona!’ Ina ua feala mai le fili, ua le iloa e i latou se mea a fai ma ua fefefe. Ua amata loa ona sosola, ma sa malo ai Isaraelu i le taua.