Ua Fesoasoani se Teine i se Tamāloa Malosi

PE E te iloaina o le ā le tala a lenei teine itiiti o loo fai? O loo fai sana tala e uiga i le perofeta a Ieova o Elisaia, ma mea mananaia na fesoasoani ai Ieova iā te ia e fai. E le iloa e lenei tamaitai Ieova auā e le o se Isaraelu. Aiseā ua i ai i ina lenei teine itiiti i le aiga o lena tamaitai?

O lena tamaitai o se tagata Suria. O lana tane o Naamanu, o le taʻitaʻi au a Suria. Na pueina e Suria lenei teine itiiti Isaraelu, ma auina atu i le avā a Naamanu e fai ma ana auauna.

Sa i a Naamanu se maʻi o le lepela. O lenei maʻi e mafai ona pauu ese ni aano mai le tino o le tagata. O le tala lenei a le teine o loo fai atu i le avā a Naamanu: ‘Maimau pe ana alu loʻu alii i le perofeta a Ieova i Isaraelu. E mafai e ia ona faamalolo lona lepela.’ Sa taʻuina le faamatalaga a le teine itiiti i le tane a lea tamaitai mulimuli ane ai.

Na manao tele Naamanu e faamalolo lona maʻi; ona ia alu lea i Isaraelu. Sa alu o ia i le fale o Elisaia. Sa fai atu Elisaia i lana auauna e alu e fai i a Naamanu e alu e taele faafitu i le Vaitafe o Ioritana. Na ita tele Naamanu i lenei mea, ma faapea mai: ‘E sili atu ona lelei vai i tuā i lou aiga i lo vai o Isaraelu!’ Ina ua uma lana tala, ona alu loa lea o Naamanu.

Ae sa fai atu le tasi o ana auauna i ai: ‘Alii e, ana fai atu Elisaia iā te oe e fai se mea faigata, e te faia lava. Ae ai se ā e te le alu ai e taele, e pei ona ia fai mai ai?’ Na faalogo Naamanu i lana auauna ma alu atu loa ma tofu faafitu i le Vaitafe o Ioritana. Ona toe lelei ai lea ma malosi lona tino!

Ua fiafia tele Naamanu. Ua toe foi atu i a Elisaia ma fai i ai: ‘Ua ou iloa nei o le Atua o Isaraelu ua na o ia lava o le Atua moni o le lalolagi uma. O lea, faamolemole ia talia lenei mea alofa mai i a te au.’ Ae na tali atu Elisaia: ‘E leai, ou te le talia.’ Na iloa e Elisaia e sese pe a ave e ia le mea alofa, auā o Ieova na faamaloloina Naamanu. Ae na manao tele le auauna a Elisaia o Kiasi i le mea alofa mo ia.

O le mea lenei na fai e Kiasi. Ina ua alu Naamanu, na momoe atu Kiasi e tuliloa iā te ia. ‘Na auina mai au e Elisaia e taʻu atu iā te oe ua manao nei o ia i ni isi o au mea alofa mo ana uo faatoa o mai nei lava,’ o le tala lea a Kiasi. O lenei mea o se pepelo. Ae e lei iloa e Naamanu; o lea na ia tuuina atu ai i a Kiasi ni isi o mea.

Ina ua foi mai Kiasi, ua iloa e Elisaia le mea ua ia faia. Na taʻuina atu i ai e Ieova. Ona ia fai atu lea: ‘Talu ai ua e faia lenei mea leaga, o le a oo atu le lepela o Naamanu iā te oe.’ Ma na oo lava i ai i lena taimi!

O le ā ua tatou aʻoaʻoina mai lenei mea atoa? Muamua, ia pei i tatou o le teine itiiti ma tautala e uiga i a Ieova. E i ai sona aoga tele. Lua, aua le faamaualuluga e pei o Naamanu, ae ia usiusitai i auauna a le Atua. Ma lona tolu, aua tatou te pepelo e pei o Kiasi. Pe e le tele ea ni mea ua tatou aʻoaʻoina mai le faitauina o le Tusi Paia?