Folafola e Le Atua se Parataiso

O le ata lenei o se parataiso e pei o lena atonu na faaali e le Atua i a Isaia. Na ola Isaia a o lei mamao ona mavae atu Iona.

O le parataiso o lona uiga o se “togalaau” po o se “paka.” Pe e faamanatu mai ai ea iā te oe se mea na tatou vaai i ai i lenei tusi? E pei lava o le faatoaga manaia lea na fai e Ieova le Atua mo Atamu ma Eva a ea? Ae pe o le a avea ea le lalolagi atoa ma parataiso?

Na taʻuina e Ieova i lana perofeta o Isaia e tusi e uiga i se parataiso fou mo ona tagata. Na ia fetalai: ‘O luko ma mamoe o le a nonofo fifilemu faatasi. O tamai povi ma tamai leona o le a aai faatasi, ma e tausia foi i latou e tamaiti laiti. E oo foi i le pepe o le a le afaina o ia pe a taalo i tafatafa o se gata oona.’

‘E le mafai ona tupu lenei mea,’ o upu ia a le toatele o tagata. ‘O loo i ai pea faalavelave i le lalolagi.’ Ae mafaufau: O le ā le ituaiga o aiga na tuuina e le Atua i a Atamu ma Eva?

Na tuuina e le Atua Atamu ma Eva i se parataiso. Na le iloa lo la aiga manaia ina ua la le usiusitai i le Atua, ola matutua ai ma feoti. Ua folafola mai e le Atua o le a ia tuuina i tagata o e alolofa iā te ia mea na le iloa i a Atamu ma Eva.

I le parataiso o loo sau o le a leai se mea e toe faatiga. O le a filemu lelei atoatoa, malolosi ma fiafia uma tagata. O le a pei lava o le mea na manao i ai le Atua i le amataga. Ae o le a tatou aʻoaʻoina mulimuli ane pe faapefea ona aumaia e le Atua.