I Luga o le Ala i Tamaseko

PE E te iloaina o ai lena e taoto mai i le palapala? O Saulo. Manatua o ia lea na leoleoina ofu o tamaloloa na fasiotia Setefano. Vaai atu i lena malamalama! O le a le mea o loo tupu?

Ina ua mavae le fasiotia o Setefano, ona taʻimua lea o Saulo e sue soo o Iesu e faatiga i a i latou. E alu o ia i lea fale ma lea fale ma tatoso mai i latou ma lafo i le fale puipui. O le toatele o le au soo ua sosola i isi aai ma folafola ai le “tala lelei” i ina. Ae e alu atu foi Saulo i isi aai e sue ai soo o Iesu. O loo alu nei o ia i lona ala i Tamaseko. Ae i le ala, o le mea ofoofogia lenei na tupu:

Na faafuasei ona susulu mai se malamalama ma siomia ai Saulo. Ona paū lea o ia i lalo, e pei ona e vaai atu i ai. Ona faapea mai lea o se leo: ‘Saulo, Saulo e! Aiseā ua e faatiga mai ai i a te au?’ Na iloa e tamaloloa na o ma Saulo le malamalama ma faalogo i le leo, ae latou te le malamalama i tala o loo fai mai.

‘O ai ea oe, le Alii e? o le fesili lea a Saulo. ‘O au o Iesu o le o loo e faatiga i ai,’ o upu ia a le leo. Ua faia e Iesu nei upu auā a faatiga Saulo i soo o Iesu, ua tusa lava o ia lea ua faia i ai.

Ua fesili atu nei Saulo: ‘O le ā saʻu mea a fai, le Alii e?’

‘Tu i luga ma alu i Tamaseko,’ o le tala lea a Iesu. ‘O i ina o le a taʻuina atu ai le mea e te faia.’ Ina ua tu i luga Saulo ma pupula ua le toe mafai ona iloa se mea. Ua tauaso o ia! Ona taʻitaʻiina lea o ia e tamaloloa i Tamaseko.

Ona tautala atu lea o Iesu i le tasi o ona soo i Tamaseko, ma faapea atu: ‘Anania e, tu ia i luga. Alu atu i le ala e taʻua o Saʻo. Ma i le fale o Iuta fesili i ai mo le tagata e igoa i a, Saulo. Ua ou filifilia o ia e fai ma auauna faapitoa mo au.’

Na usiusitai Anania. Ina ua la fetaui ma Saulo, ona ia faaee atu lea o ona lima i ona luga ma faapea atu: ‘Ua auina mai au e le Alii ina ia e toe pupula ma faatumulia oe i le agaga paia.’ Ona pauu ese mai ai lea o ni mea e pei ni una mai mata o Saulo, ma ua toe vaai nei o ia.

Ua faaaogaina Saulo i se auala malosi e talaʻi atu ai i tagata o nuu e tele. Ua iloa o ia o le aposetolo o Paulo, o lē o le a tatou aʻoaʻoina mulimuli ane ai. Ae sei o tatou vaai po o le a na auina atu i ai e le Atua Peteru e fai.