Mataupu 9

Le Malosi o le Faamoemoe i le Toetu

1. O ā faamoemoe ofoofogia ua mafaia ona o le toetu?

A NA lē seanoa le toetu, semanu e leai se faamoemoe mo so o se olaga i le lumanai mo tagata ua maliliu. Peitai ona o le alofa tunoa o Ieova, ua tatalaina ai mo le faitau piliona o ē ua maliliu le avanoa e lē mafaatauina e olioli ai i le ola e faavavau. O le iuga, ua ia i tatou foi le faamoemoe faamafanafana loto o le toe aufaatasia ma ē pele ua momoe i le oti.—Faatusatusa i le Mareko 5:35, 41, 42; Galuega 9:36-41.

2. (a) I ā auala ua tāua ai le toetu i le tauaveina o le fuafuaga a Ieova? (e) O afea e avea patino ai le faamoemoe o le toetu o se puna tāua o le malosi ia i tatou?

² Ona o le toetu ua mafai ai e Ieova, e aunoa ma le faaleagaina e faavavau o ana auauna faamaoni, ona faataga Satani e faia mea uma ina ia taumafai e faamaonia ai lana tuuaiga ogoogo, “O mea uma foi ua i ai i le tagata, e avatua e ia e sui aʻi lona ola.” (Iopu 2:4) Ona sa toe faatuina Iesu nai le oti sa mafai ai ona ia aaoina le tāua o lana taulaga faaletagata i luma o le nofoalii faalelagi o lona Tamā, faatasi ma aogā faasaoola mo i tatou. E ala i le toetu, o i latou o ē suli faatasi ma Keriso o le a tuufaatasia ma ia i le Malo faalelagi. Ma mo i tatou uma lava o ē e faatuatua, ua avea le toetu o se puna o le malosi e i tala atu o le mea e masani ai pe a tatou laasia tofotofoga tatou te fesagai ai ma le oti.

LE POGAI UA AVEA AI O SE MATAUPU FAAVAE I LE FAATUATUAGA KERISIANO

3. (a) I le ā le uiga ua faapea ai o le toetu o se “mataupu muamua”? (e) O le ā le uiga o le toetu i le lalolagi lautele?

³ O le toetu, e pei ona taʻua i le Eperu 6:1, 2, o se “mataupu muamua,” se vaega o le faavae o le faatuatua, a aunoa ma lea e lē mafai ona avea i tatou ma Kerisiano taumatuaina. Ae ua faaesea lea i mafaufauga o le lalolagi lautele. Ona o le matelaina faaleagaga, ua faatoateleina ai pea tagata ua ola mo le sailia o fiafiaga. Ua latou manatu e na o le pau lava lenei o le olaga. (1 Kori. 15:32) O i latou e pipii atu i lotu ua masani ai, i totonu o Kerisinetoma atoa ma fafo, e manatu ua ia i latou se agaga (solu) e lē mafai ona oti, lea ua lē manaomia ai se toetu. So o se tasi e taumafai e faatutusa nei taofi e lua o le a iloaina le matuā fenuminumiai na i lo le faagaeeina i le faamoemoe. E mafai faapefea ona tatou fesoasoani ia i latou o ē loto malilie e faalogo?—Galu. 17:32.

4. (a) A o leʻi mafai ona talisapaia e se tagata le toetu, o le ā atonu e manaomia ona tatou talanoaina ma ia? (e) O ā mau o le a e faaaogā e faamatala ai po o le ā le solu? Le tulaga o ē ua oti? (i) Ae ā pe afai e faaaogā e se tasi se faaliliuga o le Tusi Paia e foliga mai e faanenefu ai upu moni o loo maua i na mau?

⁴ A o leʻi mafai e i latou na ona talisapaia le sauniuniga matagofie o le toetu, e manaomia ona latou malamalama po o le ā le solu ma le tulaga o ē ua oti. E masani ona lava ma totoe na o ni nai mau e faamanino ai nei mataupu i se tagata o loo galala mo le upu moni. (Kene. 2:7; Eseki. 18:4; Sala. 146:3, 4) Peitai ua faanenefu e nisi o faaliliuga faaonaponei ma lomiga faapuupuu o le Tusi Paia ia upu moni. O lea atonu e tatau ai ona iloiloina faaupuga sa faaaogāina i uluai gagana o le Tusi Paia.

5. O le a faapefea ona e fesoasoani i sea tagata e malamalama po o le ā le solu?

⁵ E tāua faapitoa lava le Tusi Paia faa-Peretania o le New World Translation i le faia o lenei mea, auā ua ia taʻua ai i taimi uma le upu Eperu ne΄phesh ma le upu Eleni talafeagai psy·khe΄ o le “soul (solu),” ma i lona faaopoopoga, ua lisiina ai le tele o mau o loo maua ai nei upu. I isi faaliliuga faaonaponei ua taʻua ai uluai upu lava ia e lē gata o le “solu” ae faapea foi le “meafaiola,” “se mea,” “tagata” ma le “ola”; o “loʻu ne΄phesh” e mafai ona taʻua o “aʻu,” ma “lou ne΄phesh” o “oe.” O se faatusatusaga o nei Tusi Paia ma nisi o faaliliuga tuai pe ma le New World Translation o le a fesoasoani i se tagata suesue faamaoni e talisapaia faapea o na upu ua faaliliuina i le “solu” i le uluai gagana, e faasino i (1) tagata, (2) manu ma (3) le olaga lea e pei ona latou olioli ai o ni tagata po o manu. Peitai sa lē taitai ona latou aumaia ai se manatu faapea o le solu o se mea e lē vaaia, se mea e lē mailoa e mafai ona mou ese mai le tino pe a oti ma faaauau ai ona ola i se isi mea.

6. (a) Aisea ua tuua ai e nisi faaliliuga le au faitau i le fenuminumiai e tusa i le uiga o Seoli, Hades ma Kena? (e) O le a faapefea ona e faamatalaina mai le Tusi Paia le tulaga o tagata i Seoli, po o Hades? I Kena?

⁶ Ua faapena foi, ona faaaogā i taimi uma e le New World Translation, Sheol (Seoli) e suitulaga i le upu Eperu sh^eōl΄ ma i lona faaaogāina o Hades mo le upu Eleni ha΄des ma Gehenna (Kēna) mo ge΄en·na. Ae ua faafenumiai e nisi faaliliuga faaonaponei ma lomiga faapuupuu o le Tusi Paia le tagata faitau i le faaliliuina o UPU e LUA o le ha΄des ma ge΄en·na o “hell” (seoli), e faaopoopo i le faaaogāina o “le tuugamau” ma “le lalolagi o ē ua oti” o nisi faaliliuga o sh^eōl΄ ma ha΄des. E ala i le faatusatusaga o faaliliuga, pe a manaomia, e mafai ona faaalia ai faapea o Sheol (Seoli po o le tuugamau) e tutusa pau ma Hades (Seoli po o le tuugamau). (Sala. 16:10; Galu. 2:27) Ua faamaninoina e le Tusi Paia faapea o Seoli o le tuugamau taatele o tagata, e fesootai ma le oti, ae lē o le ola. (Sala. 89:48; Faaa. 20:13) Ua ia faasino foi i le faamoemoe o le toe foi mai i inā e ala i le toetu. (Iopu 14:13; Galu. 2:31) I le tuufaafeagai, e leai se faamoemoe mo se olaga i le lumanai ua saunia mo i latou e ō i Kena, ma o le mea moni, e lē o tautala lava e uiga i le ola pea o le agaga i inā.—Mata. 18:9; 10:28.

7. E mafai faapefea i le toetu ona afaina ai uiga ma gaoioiga a se tagata pe a malamalama lelei i ai?

⁷ Ona o le faamaninoina o na mataupu, ua uigā moni ai le maliu ma le toetu o Keriso. Ua mafai nei ona fesoasoani i se tagata e malamalama po o le ā le uiga o le toetu ia te ia ma amata ai ona talisapaia le alofa o Ieova i le faia o sea sauniuniga ofoofogia. O lagona faavauvau o i latou ua maliliu ē pele i a i latou ua mafai nei ona suia i le olioli e faatalitali ai le toe tuufaatasia i le Faiga Fou a le Atua. Sa silafia e Kerisiano o le uluai senituri faapea o le toetu o Iesu Keriso o se maa tulimanu o le faatuatuaga Kerisiano. I le maelega na latou molimau atu ai i isi e faatatau i lea mea atoa ma le faamoemoe ua faamautinoaina ai. O lea foi, o i latou e talisapaia lea mea i aso nei ua naunau e fetufaai lenei upu moni tautele ma isi.—Galu. 5:30-32; 10:40-43; 13:32-39; 17:31.

FAAAOGĀINA LE “KI O SEOLI”

8. O le ā e uiga i ai le faaaogāina e Iesu o “ki o seoli ma le oti” mo ona soʻo faauuagagaina?

⁸ O i latou uma e auaumea faatasi ma Keriso i lona Malo faalelagi e tatau ona oo i ai le oti. Peitai ua latou silafia lelei le faamautinoaga na ia avatu ina ua ia fetalai i le aposetolo o Ioane: “Sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.” (Faaa. 1:18) O le ā na ia faauigaina i ai? Sa ia tatai atu manatu i le mea na tupu ia te ia lava. Na maliu foi o ia. Ae sa leʻi tuua ai o ia e le Atua i seoli. I le aso lona tolu na siitia ai o ia e Ieova lava ia i le olaga faaleagaga ma tauia ai o ia e lē toe mafai ona oti. E lē gata i lena, ae na aaoina atu e le Atua ia te ia “ki o seoli ma le oti” e faaaogā i le tatalaina o isi mai le tuugamau taatele o tagata ma mai āuga o le agasala a Atamu. Ona o le avea ma pule o na ki, ua mafai ai e Iesu ona toe faatutuina ona soʻo faamaoni mai le oti. Pe a ia faia faapea, ona ia avatu lea i sui faauuagagaina o lana faapotopotoga, le meaalofa tautele o le ola faalelagi e lē mafai ona oti, e faapei ona sa faia e lona Tamā mo ia.—Roma 6:5; Fili. 3:20, 21.

9. O le ā le taimi e faatino ai le toetutu o Kerisiano faamaoni faauuina?

⁹ O afea o le a oo ai i Kerisiano faauuina faamaoni lena toetu? Ua uma ona amata. Ua faamatala mai e le aposetolo o Paulo faapea o le a faatutuina i latou ‘i le faatasi mai o Keriso,’ o lena faatasi mai na amata i le 1914 T.A. (1 Kori. 15:23, NW) I le taimi nei, pe a maeʻa le olaga faalelalolagi o i latou ia, latou te lē tau faatali ai i le oti mo le toe afio mai o lo latou Alii. O le taimi lava latou te feoti ai e faatutuina ai i latou i le agaga, e ‘liua, e faafuasei lava, o le emo o le mata.’ Maeu se fiafiaga o le a fai mo i latou, ona “o a latou galuega foi e mulimuli ia te i latou”!—1 Kori. 15:51, 52; Faaa. 14:13.

10. O le ā le isi toetu o le a iai, ma o afea o le a amata ai?

¹⁰ Peitai e lē na o i latou se toetutu. O le mea moni, i le taʻuaina o le “uluai toetu” e faaalia ai e tatau ona mulimuli mai se isi. (Faaa. 20:6) O i latou e maua aogā mai lenei toetu mulimuli o le a aeaeina le faamoemoe fiafia o le ola e faavavau i se lalolagi Parataiso. O afea e taunuu ai lena mea? Ua faaalia e le tusi o Faaaliga faapea o le a oo mai pe a mavae le tafiesea o “le lalolagi ma le lagi” o le faiga amioleaga o mea o loo iai. O lena iuga o le faiga tuai o mea ua latalata tele mai. Mulimuli ane, i le taimi atofaina a le Atua, ona amata lea o le toetu faalelalolagi.—Faaa. 20:11, 12.

11. O ai o le a aofia i ē faamaoni e faatutuina i le ola i le lalolagi, ma aisea e avea ai lena o se faamoemoe faamaniti tino?

¹¹ O ai o le a aofia ai? O auauna faamaoni a Ieova mai taimi anamua. E aofia ai i a i latou, o tane o ē, ona o lo latou faatuatua malosi i le toetu, ‘ua lē talia ai e i latou le olataga i se isi togiola’—po o sina faagutugutulua o lo latou faamaoni i le Atua e sosola ese ai i se oti faataugaina. (Epe. 11:35) Maeu se olioli o le a iai i le iloa totino o i latou na, ma faalogologo atu a o latou talatala mai, i auiliiliga e faatatau i mea tutupu ua na ona lipotia puupuu i le Tusi Paia! E aofia i isi, o le a iai Apelu, le uluai molimau faamaoni a Ieova. O Enoka ma Noa, o ē na folafola ma le lē fefefe le feau lapatai a le Atua a o lumanai le Lolo. O Aperaamo, o lē na talileleia agelu. O Mose, na ala mai ai le Tulafono na aaoina i le Mauga o Sinai. O perofeta lototetele e pei o Ieremia, o lē na maimoaina le faatafunaga o Ierusalema i le 607 T.L.M. Ma Ioane le Papatiso, o lē na faalogo o faailoa mai e le Atua lava ia e faapea o Iesu o Lona Alo. O le a iai foi ē faamaoni na maliliu i aso mulimuli o le faiga o mea o loo iai.—Epe. 11:4-38; Mata. 11:11.

12. (a) E toafia ē o maliliu i Seoli o le a toe faatutuina? (e) O ai la e aofia ai, ma aisea?

¹² A o faagasolo le taimi, o le a faatutuina foi isi. O le tele o le a faaaogā ai e Iesu le “ki o seoli” mo tagata ua folasia lea i se faaaliga na avatu i le aposetolo o Ioane lea na ia vaaia ai Seoli ua ‘lafoina i le lepa afi.’ O le ā lona uiga? O lona uiga ua faaumatia; ua mou ese e lē toe iai auā ua gaogao atoa. O lea, e faaopoopo i le toe faatutuina o tagata tapuai faamaoni o Ieova, ae o le a toe avae ai foi ma le alofa mutimutivale e Iesu mai seoli po o le tuugamau, e oo lava i tagata amioletonu. E leai se tasi o i latou nā o le a ala ona faatū mai i lea taimi ina ia faasala i le oti. I le siomaga amiotonu i lalo o le Malo o le Atua o le a fesoasoani i a i latou ina ia ogatasi o latou olaga ma ala o Ieova. Ua folasia i le faaaliga le tatalaina o “le tusi lea o le ola,” ma o le a ia i latou le avanoa e faaofi ai o latou igoa i totonu. O le a ‘taitasi foi i latou ma faamasinoina e tusa ma a latou amio’ e faia ina ua mavae lo latou toetutu. (Faaa. 20:12-14; Galu. 24:15) O lea, i le matauina mai le tulaga o le taunuuga faaiu, e mafai ona faamaonia lo latou toetutu o se “toe tutū i le ola” ae o le a lē faapea ai o se “toe tutū i le faasala” e lē maalofia.—Ioa. 5:28, 29.

13. (a) O ai e lē toe faatutuina? (e) E ao faapefea i le iloaina o le upu moni e uiga i le toetu ona aafia ai o tatou olaga?

¹³ O le mea moni, e lē o ē uma na soifua mai o le a toe tutū. O nisi na faia agasala ia e lē mafai i ai se faamagaloga. O i latou e faaumatia i le “puapuaga tele,” ua lalata mai nei, o le a aofia ai i a i latou o ē oo i ai le faaumatiaga e faavavau. (Mata. 12:31, 32; 23:33; 24:21, 22; 25:41, 46; 2 Tesa. 1:6-9) O lea, a o faaalia le alofa mutimutivale uigaese i le tatalaina o ē uma i Seoli, ua lē o saunia e le toetu se faavae mo lo tatou faatalalē e uiga i le auala o loo tatou ola ai nei. Na i lo lea, e ao ona uunaia ai i tatou e faaalia lo tatou talisapaia loloto o lenei alofa tunoa o le Atua.

FAAMALOSIA E ALA I LE FAAMOEMOE O LE TOETU

14. E mafai faapefea ona avea le toetu o se puna o le malosi sili i se tagata ua pulapula la goto lona soifuaga o loo iai?

¹⁴ O ē ua faamoemoe i le toetu ua mafai ona utufia mai ai i lea faamoemoe se malosiaga sili. Pe a oo ina pulapula la goto lo latou soifua, ua latou silafia e lē mafai ona latou tolopoina pea le oti, e ui i feuiuiaiga faafomai o faaaogāina. (Fai. 8:8) Afai o faaauau ona latou toaʻaga i le galuega a le Alii ma auauna faamaoni ma lana faalapotopotoga, e mafai ona latou tagai atu ma le mautinoa atoatoa i le lumanai. Ua latou silafia faapea e ala i le toetu o le a latou toe olioli ai i le ola e tusa ma le taimi atofa a le Atua. Ma maeu se olaga o le a iai! “Le ola moni lava,” e pei ona taʻua e le aposetolo o Paulo.—1 Timo. 6:19, LF; 1 Kori. 15:58; Epe. 6:10-12.

15. Afai e faamatauina i tatou e tagata sauā, o le ā e mafai ona fesoasoani ia i tatou e tumau faamaoni ai ia Ieova?

¹⁵ E lē tau ina iloa faapea e iai se toetu, ae o le iloaina o Ia o le Puna o lena sauniuniga o le a mafai ai ona tatou malolosi. O lea e faamalosia ai i tatou e faamaoni i le Atua e tusa lava pe faamatauina ai i le oti i lima o tagata sauā. Ua loa ona faaaogā e Satani le mataʻu i le oti faafuasei o se auala e faapologaina ai pea tagata. Peitai sa leʻi lolo atu Iesu i sea mataʻu; na ia faamaoni ia Ieova seia oo i le oti. O le mea na faataunuuina i lona maliu na ia saunia ai le auala mo le tuusaolotoina o isi mai sea mataʻu. (Epe. 2:14, 15) O le iuga o lo latou faatuatua i lena sauniuniga, ua fafau aʻe ai e ona soʻo moni se faamaumauga mataina o ē tausisi i le faamaoni. Ina ua fetaiai ma omiga, sa faamaonia ‘latou te leʻi faapelepeleina o latou lava ola’ e sili i lo latou alofa mo Ieova. (Faaa. 12:11) Ma le atamai, latou te leʻi taumafai e faasao lo latou ola o loo iai i le lafoaia o mataupu silisili faa-Kerisiano, e na ona leiloa ai o le faamoemoe o le ola e faavavau. (Luka 9:24, 25) Pe o ia te oe lena ituaiga o faatuatua? O le a e maua pe afai e te alofa moni ia Ieova ma ave i fale i lou loto po o le ā le uiga o le faamoemoe o le toetu ia te oe.

Talanoaga Autalu

● Aisea e manaomia ai ona malamalama se tagata po o le ā le solu ma le tulaga o ē ua oti a o leʻi mafai ona ia talisapaia le toetu?

● O ai e toe foi mai le oti? E tatau faapefea i lenei iloa ona aafia ai i tatou?

● Ua faamalosia faapefea i tatou e le faamoemoe o le toetu?