Le Faapotopotoga Kerisiano o le Uluai Senituri
I le Penetekoso 33 T.A., na liligiina ifo ai le agaga paia i luga o soʻo e toʻa 120 o Iesu, ma na amata ai ona latou tautala i gagana e tele e uiga i vavega a le Atua. O le faavaeina lea o le faapotopotoga Kerisiano. E tusa ma le toʻa 3,000 soʻo fou na papatisoina ai i lena aso.—Galuega, mataupu 2.
Na faatuputeleina le faitau aofai o faapotopotoga i nofoaga eseese a o faaauau e aposetolo ma isi ona tautala atu i le Afioga a le Atua ma le faamalosi. Sa leʻi pine a e salalau atu le talaʻiga i vaega o le Metitirani, mai Papelonia ma Aferika i Matu agaʻi atu i Roma ma atonu i Sepania, e pei ona faamauina ai i le tusi o Galuega.—Roma 15:18-29; Kolose 1:23; 1 Peteru 5:13.
I so o se mea lava sa avea ai tagata ma soʻo, na latou faavaeina ai faapotopotoga. Na tofia ni tane taʻumatuaina agavaa, e fai ma toeaina, po o ovasia, e tausia le tulaga e ao ona ausia o aʻoaʻoga ma amioga saʻo i totonu o faapotopotoga. Ae na leʻi avea i latou ma se vasega o taʻitaʻi lotu; o i latou sa o ni faifeau ma ni uso faigaluega faatasi mo le Malo o le Atua.—Galuega 14:23; 20:28; 1 Korinito 3:5; 5:13; Kolose 4:11; 1 Timoteo 3:1-15; Eperu 13:17; 1 Peteru 5:1-4.
Na avea le au aposetolo ma isi uso faigaluega faatasi vavalalata o se vaega pule. Sa latou taʻimua i le galuega talaʻi. Sa latou foia faafitauli i le faapotopotoga i Ierusalema. Na latou aauina atu uso agavaa i Samaria ma Anetioka ina ia faamalosia uso talitonu fou i inā. Sa latou taulimaina se finauga e uiga i le peritomeina, ma auina atu la latou faaiʻuga i faapotopotoga uma ina ia latou tausia. Peitai o nei tane sa lē avea o ni ē pule i isi, ae sa avea o ni auauna ma ni uso faigaluega faatasi a le faapotopotoga atoa.—Galuega 4:33; 6:1-7; 8:14-25; 11:22-24; 15:1-32; 16:4, 5; 1 Korinito 3:5-9; 4:1, 2; 2 Korinito 1:24.
Sa mataulia soʻo muamua o ni Kerisiano, sa faaigoaina faapena e ala i le taʻiala tauatua. Sa ia i latou foi o aʻoaʻoga na faaese ai i latou; o nei aʻoaʻoga sa taʻua o le mataupu a le ʻau aposetolo, po o matua o upu e ola ai. Sa iloaina foi lenei aʻoaʻoga faale-Tusi Paia o le upu moni.—Ioane 17:17; Galuega 2:42; 11:26; Roma 6:17; 1 Timoteo 4:6; 6:1, 3; 2 Timoteo 1:13; 2 Peteru 2:2; 2 Ioane 1, 4, 9.
O i latou o se aufaatasiga o uso i le lalolagi aoao na autasia i le alofa. Na latou faaalia le naunau i o latou uso talitonu i isi atunuu. Pe a latou faimalaga i isi atunuu, sa talia ma le fiafia i latou e uso talitonu i o latou aiga. Sa latou tausia le tulaga maualuga tau i amioga mamā, i le avea o ni tagata paia ua vavaeeseina mai le lalolagi. Sa teu mau i o latou mafaufau le taimi mo le aso o le faatasi mai o Ieova ma latou taʻutino atu ai ma le maelega lo latou faatuatua i le lautele.—Ioane 13:34, 35; 15:17-19; Galuega 5:42; 11:28, 29; Roma 10:9, 10, 13-15; Tito 2:11-14; Eperu 10:23; 13:15; 1 Peteru 1:14-16; 2:9-12; 5:9; 2 Peteru 3:11-14; 3 Ioane 5-8.
Ae peitai, na amata ona tupu aʻe le aposetasi tele i lona lua ma lona tolu o senituri, e pei ona valoia. O lenei mea na iʻu i ni faiga faalotu aupito tetele ia sa leʻi tausia ai le mamā o le uluai faapotopotoga Kerisiano e tusa ai ma a latou aʻoaʻoga, amioga, faalapotopotoga, ma tulaga e faatatau i le lalolagi.—Mataio 13:24-30, 37-43; 2 Tesalonia, mataupu 2.
E ui i lea, na valoia e Iesu faapea, o le a iai se toe faafoisia o le tapuaiga moni i le faaiʻuga o le faiga o mea. E talitonu Molimau a Ieova e faapea o lenei toe faafoisia o le tapuaiga moni e mafai ona iloa i a latou taualumaga i le lalolagi aoao i lo tatou taimi, ua tusa lea ma le 1,900 tausaga talu le valoaga a Iesu. O le a faamatalaina e itulau o loo mulimuli mai le pogai.
• Na faapefea ona faavaeina le faapotopotoga Kerisiano, ma na faapefea ona tuputupu aʻe?
• Na faapefea ona vaavaaia lena faapotopotoga?
• O ā mea na faaesea ai ma le manino Kerisiano o le uluai senituri?
[Faafanua i le itulau 7]
(Taga‘i i le lomiga mo le ata atoa)
Sami Uliuli
Sami Kasipane
Sami Tele
Faga o Peresia
Sami Ulaula
O oganuu na ausia e le tala lelei i le uluai senituri
ITALIA
Roma
ELENI
MELITA
KERETA
KUPERU
PITUNIA
KALATIA
ASIA
KAPATOKIA
KILIKIA
SURIA
ISARAELU
Ierusalema
MESOPOTAMIA
Papelonia
O nisi mai nei oganuu na avea o ni tagata talitonu
ILURIKO
METAI
PATIA
ELAMA
ARAPI
LIPIA
AIKUPITO
AITIOPE
[Ata i le itulau 7]
Na talaʻia ma le faamalosi e uluai Kerisiano le Afioga a le Atua
Na talileleia Kerisiano i aiga o uso talitonu i so o se mea na latou faimalaga i ai