Mataupu 3
O Lau Tapuaiga e Tāua Lava
1. O le ā ua talitonu ai ni isi tagata e tusa ai ma tapuaiga?
O LE toatele o tagata ua faapea mai: ‘E lelei lotu uma. E eseese auala a e tau lava i le mea e tasi.’ Afai e moni ia, o le a lē afaina la lau tapuaiga, auā o lona uiga, e talia e le Atua tapuaiga uma lava. Ae pe e faapea moni ea?
2. (a) Sa faapefea ona feagai le au Faresaio ma Iesu? (e) O ai na faapea mai le au Faresaio o lo latou tamā?
2 I le taimi sa feamaliuai ai Iesu i le lalolagi, sa i ai se vaega faalelotu na taʻua o Faresaio. Sa latou fausia se faiga faaletapuaiga ma sa talitonu ua taliaina e le Atua. Ae i lea foi taimi, sa taumafai le au Faresaio e fasiotia Iesu! O lea sa fetalai Iesu i ai latou: “Ua faia lava e outou amio a lo outou tamā.” Ae ua latou tali mai: “E tasi lo matou Tamā, o le Atua lea.”—Ioane 8:41.
3. O le ā sa tulei i ai Iesu e tusa ai ma le tamā o le au Faresaio?
3 Pe na avea moni le Atua ma o latou tamā? Pe na talia e le Atua la latou ituaiga o tapuaiga? E leai! E ui ina sa i ai i le au Faresaio le Tusi Paia ma sa manatu ua mulimuli i ai, ae sa taʻitaʻiseseina i latou e le Tiapolo. Ma na fetalai Iesu i a i latou: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e lei tumau lava ia i le upu moni, . . . auā o le pepelo ia, ma le tamā o le pepelo.”—Ioane 8:44.
4. Sa faapefea ona silasila Iesu i le tapuaiga a le au Faresaio?
4 E mautinoa, sa sese le tapuaiga a le au Faresaio. Sa auauna mo le lelei o le Tiapolo a e lē o le Atua. O lea la, sa le lelei la latou tapuaiga, sa taʻusalaina e Iesu. Sa ia fetalai i na Faresaio mapo lotu: “Ua outou pupuni le malo o le lagi i tagata; auā tou te le ulu atu i ai outou, ua outou vavao foi i e a ulu atu i ai.” (Mataio 23:13) Ona o la latou tapuaiga sese, sa taʻua e Iesu na Faresaio o tagata pepelo ma o gata feai. Ona o la latou ala leaga, sa fetalai ai Iesu, ua agaʻi atu i latou i le ala i le faaumatiaga.—Mataio 23:25-33.
5. Sa faaalia faapefea e Iesu o le tele o tapuaiga ua lē na o ni ala eseese e taʻitaʻiina atu i le nofoaga lava e tasi?
5 Sa leʻi aʻoaʻoina e Iesu o tapuaiga uma ua na o ni magaala eseese e taʻitaʻiina uma i le mea e tasi o le faaolataga. Sa fetalai Iesu i lana Lauga i luga o le Mauga: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.” (Mataio 7:13, 14) Ona ua latou lē taulau ona tapuai i le Atua i le ala saʻo, o le toatele o tagata o loo i le ala mo le faaumatiaga. E na o le toaitiiti i le ala e taʻitaʻiina ai i le ola.
6. O le ā e mafai ona tatou aʻoaʻoina mai i le tagai atu i le tapuaiga a le nuu o Isaraelu?
6 I le tagai i le ala sa feutagai ai le Atua ma le nuu o Isaraelu, ua manino ai le tāua o le tapuaiga i le Atua i se auala ua ia faamaonia. Sa lapataia e le Atua tagata Isaraelu ia taumamao mai i tapuaiga sese o atunuu o siosiomia ai. (Teuteronome 7:25) Sa faia e na tagata a latou fanau i o latou atua, ma sa auai i ni faiga lē mamā faaleituaiga, e aofia ai le tauātane ma le tauāfafine. (Levitiko 18:20-30) Sa poloai le Atua i tagata Isaraelu ia alo ese mai i ia faiga. Ina ua latou lē usiusitai ma tapuai i isi atua, sa ia faasalaina loa i latou. (Iosua 24:20; Isaia 63:10) O lea la, sa afaina moni la latou latou tapuaiga.
LOTU SESE I ASO NEI?
7, 8. (a) O le ā le tulaga sa tutū ai tapuaiga i le vaitaimi o taua a le lalolagi? (e) O le ā sou manatu e uiga i le lagona a le Atua e tusa ai ma mea na faia e lotu i le vaitaimi o le taua?
7 A e faapefea le faitau selau o tapuaiga o aso nei? Atonu e te ioe o le tele o mea o faia i le igoa o lotu i aso nei e lē faamaonia e le Atua. I le taimi o taua a le lalolagi ua mavae atu, na faasaoina mai ai le faitau miliona o tagata o loo soifua nei, sa faamalosia e lotu tagata i itu uma e lua, ia fasiotia. “Fasioti i Siamani—ia fasioti i latou,” na faapea atu ai le epikopo i Lonetona. Ma i le isi itu, sa taʻu atu e le atiepikopo o Cologne i Siamani: “Matou te poloaiina outou i le suafa o le Atua ia outou tau i le toe matāua o lo outou toto ma o le mamalu ma le viiga o le atunuu.”
8 O lea, na fasiotia e Katoliko isi Katoliko i le faatagana a o latou taʻitaʻi lotu, ma sa faapea foi Porotesano. Sa fai mai le faifeau o Harry Emerson Fosdick: “E oo foi i totonu o matou falesa, e tuua ai fuʻa o le taua . . . Matou te viia le Perenise o le Filemu i le isi pito o o matou gutu ae o le isi pito, ua matou faamamaluina le taua.” Po o le ā sou manatu i le lagona a le Atua i se lotu o fai mai o faia lona finagalo ae o faamamaluina taua”?
9. (a) O le ā le faalogona ua oo i le toatele o tagata e tusa ai ma solitulafono ua faia e tagata o le tele o ituaiga o tapuaiga? (e) Ina ua faia e le lotu ia lava ma vavega o le lalolagi, o le ā le faaiuga e tatau ona tatou faia?
9 Ona o solitulafono ua faia i le suafa o le Atua e tagata o lotu eseese i le tala faasolopito, ua faitau miliona tagata o aso nei ua liliu i le Atua ma Keriso. Ua latou tuuaia le Atua ona o taua matautia faalelotu, e pei i le va o Katoliko ma Mosalema ua taʻua o le taua mo le toe faafoisiaina o laueleele paia, o taua i le va o Mosalema ma Hinitu, ma i le vao Katoliko ma Porotesano. Latou te faasino i le fasiotia o Siu i le suafa o Keriso, ma le faiga saua o sailiga faale-Katoliko. E tusa la pe faapea mai na taʻitaʻi lotu o ē ua tuuaia ona o na soligatulafono matautia, o lo latou Tamā o le Atua, pe ua le pei ea i latou o fanau a le Tiapolo e pei o Faresaio o ē na taʻusalaina e Iesu? Talu ai o le atua o lenei lalolagi o Satani, pe tatou te le faatalitalia ea lona pulea o lotu o faia e tagata o le lalolagi?—2 Korinito 4:4; Faaaliga 12:9.
10. O ā ni isi o mea o faia i le igoa o tapuaiga e te lē ioe i ai?
10 E aunoa lava la ma se taumasalosalo, e tele naua ni mea o faia i le igoa o lotu i aso nei e te manatu i ai e lē saʻo. E masani ona e faalogo i ni tagata e amio leaga tele o latou ala, ae ua aloaia tele i latou i a latou lotu. Atonu ua e iloaina foi ni taʻitaʻi lotu e leaga tele o latou olaga, ae ua talia pea i latou o ni taʻitaʻi lotu e lē afaina le tauātane ma le tauāfafine ma le feusuaiga faaulugalii a o lei faaipoipoina. Ae atonu ua e iloa e lē o taʻua faapea i le Tusi Paia. O le mea moni na faasalaina e le Atua ona tagata o Isaraelu i le oti ona o le faia o na mea. O mafuaaga foi lava ia na ia faaumatia ai Sotoma ma Komoro. (Iuta 7) Ua toeitiiti nei ona ia faia foi le mea lea e tasi i tapuaiga sese uma i ona po nei. Ua faaatagia i totonu o le Tusi Paia, na tapuaiga i se fafine talitane ona o ana faiga lē mamā ma “tupu o le lalolagi.”—Faaaliga 17:1, 2, 16.
TAPUAIGA E TALIA E LE ATUA
11. O le ā e manaomia ina ia taliaina e le Atua la tatou tapuaiga?
11 Ona e lē talia e le Atua lotu uma, ua tatau la ona tatou fesili ifo: ‘Po ou tapuai i le Atua i le ala ua ia fiafia i ai?’ Tatou te le iloa faapefea? O le Atua o le faamasino po o le ā le tapuaiga moni. Ina ia talia e le Atua la tatou tapuaiga, e tatau ona tatou pei o se tasi o tusitala o le Tusi Paia o lē na fai mai: “Ia tuu le faamaoni i le Atua, a o le pepelo i tagata uma lava.”—Roma 3:3, 4.
12. Ai se ā na fetalai ai Iesu o le tapuaiga a le au Faresaio sa le taliaina e le Atua?
12 Sa lei faapea Faresaio o le uluai senituri. Sa mulimuli i a latou lava talitonuga ma uputuu na i lo le Afioga a le Atua. O ā iuga? Sa tulei atu Iesu: “Ua faapea ona outou faaleaogaina le poloaiga a le Atua i a outou uputuu. O outou tagata pepelo, e tatau lava ia te outou le valoaga a Isaia, ua faapea mai, Ua faalatalata mai ia te au lenei nuu i o latou gutu, ma vivii mai ia te au i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.” (Mataio 15:1-9; Isaia 29:13) O lea, ina ia talileleia mai e le Atua, e tatau ona faamautinoa mea o tatou talitonu i ai ua talafeagai ma aʻoaʻoga a le Tusi Paia.
13. O le ā sa fetalai i ai Iesu e tatau ona tatou faia ina ia taliaina e le Atua?
13 Ua lē lava le na ona faapea mai tatou te talitonu ia Keriso ma fai le mea tatou te manatu i ai e saʻo. Ua matuā manaomia ona tatou sailia le finagalo o le Atua e tusa ai ma le mataupu. Sa faaalia e Iesu lenei mea i lana Lauga i le Mauga ina ua ia fetalai: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi.”—Mataio 7:21.
14. Ai se ā atonu e faavavega ai i tatou e Iesu o “e fai amio leaga” e ui lava ina tatou faia ni “galuega lelei”?
14 E ono mafai ona tatou faia ni mea e manatu o ni “galuega lelei,” ma faia i le suafa o Keriso. Ae o nei mea uma e le aoga pe a lē taulau ona tatou faia le finagalo o le Atua. O le a pei o ē na fetalai i ai Iesu: “E toatele latou te fai mai ia te au, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou faia ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:22, 23) Ioe, e mafai ona faia mea tatou te manatu e lelei—ma o le a faafetaia ma viia ai i tatou e isi tagata—ae a lē taulau ona faia mea ua tonu i le Atua, o le a faavasega i tatou e Iesu Keriso o “e fai amio leaga.”
15. Ai se ā ua poto ai ona tatou mulimuli i ala o na tagata Perea anamua?
15 Ona e tele lotu i aso nei e lē o faia le finagalo o le Atua, e lē mafai la ona tatou faapea ifo o aʻoaʻoga a le faapotopotoga o lotu o tatou au atu i ai ua talafeagai ma le Afioga a le Atua. O le mea moni ona ua faaaogaina e se lotu le Tusi Paia, e lē faapea ua faamaonia ai i lea o mea uma o ia aʻoaʻoina ma faia ua i totonu o le Tusi Paia. Ua tauā ona tatou suesueina e i tatou lava ia pe o maua ai pe e leai. Sa taʻuleleia tagata i le aai i Perea, talu ai ina ua talaʻi atu le aposetolo o Paulo i a i latou, sa latou suesue i le Tusi Paia ina ia faamautinoa e moni mea sa ia taʻuina atu i a i latou. (Galuega 17:10, 11) O le tapuaiga e taliaina e le Atua e tatau ona ioe i ala uma o le Tusi Paia; e lē tatau ona taliaina nisi vaega o le Tusi Paia ae teena isi o ona vaega.—2 Timoteo 3:16.
E LE LAVA NA O LE FAAMAONI
16. O le ā sa taʻua e Iesu e faaalia ai e lē lava na o le faamaoni o se tagata e talileleia ai e le Atua?
16 Atonu e fesili mai se isi: ‘Ae afai e faamaoni se tagata i ana talitonuga, pe e lē fiafia le Atua i a te ia e tusa lava pe e ese lana lotu?’ Ia, sa tulei Iesu o le a lē taliaina e ia “e fai amio leaga” e tusa lava pe sa talitonu na latou faia mea ua tonu. (Mataio 7:22, 23) O le faamaoni na o ia ua lē talia foi e le Atua. Na tulei foi Iesu i ona soo: “A e oo lava i le aso e manatu ai se na te fasioti ia te outou, ua na faia le taulaga i le Atua.” (Ioane 16:2) O tagata ia na fasiotia Kerisiano, atonu na talitonu ma le faamaoni sa latou auauna i le Atua, a e manino lava e leai. E lē taliaina e le Atua mea na latou faia.
17. E ui lava ina sa faamaoni Paulo, o le ā sa ia faia a o lei avea o ia ma Kerisiano?
17 Sa fesoasoani le aposetolo o Paulo i le fasiotia o Setefano a o lei avea o ia ma Kerisiano. Mulimuli ane, na ia sailia ni ala e fasiotia ai le toatele o Kerisiano. (Galuega 8:1; 9:1, 2) Sa faamatala faapea e Paulo: “Sa ou matuā saua lava i le ekalesia a le Atua, ma faatauga i ai. E sili foi loʻu alualu i le lotu a Iutaia i nisi e toatele o loʻu nuu na matou tupulaga faatasi, ma aʻu matuā naunau i uputuu o ou tamā.” (Kalatia 1:13, 14) Ioe, sa faamaoni Paulo, ae sa lei moni ai lana lotu.
18. (a) O le ā le lotu sa i ai Paulo ina o sauaina e ia Kerisiano? (e) Ai se ā na manaomia ai ona suia e Paulo ma isi tagata a latou tapuaiga i ona aso?
18 I le taimi, sa avea ai Paulo ma se tasi o faiga faalelotu faa-Iutaia, na teena Iesu Keriso, ma i lea lava tulaga na teteeina ai foi i latou e le Atua. (Galuega 2:36, 40; Faataoto 14:12) O lea, ina ia mauaina le talileleia mai i le Atua sa moomia e Paulo le suia o lana tapuaiga. Sa ia tusi foi i isi o ē sa “maelega i la le Atua.”—o ē na faamaoni a e lei fiafia i ai le Atua, auā o la latou tapuaiga sa le tusa ma le poto saʻo i fuafuaga a le Atua.—Roma 10:2, 3.
19. O le ā ua faaalia ai e lē faatagaina e le upu moni ituaiga o talitonuga eseese faaletapuaiga?
19 E lē faatagaina e le upu moni talitonuga eseese o tapuaiga uma o le lalolagi. Mo ni faaaʻoaʻoga, e i ai pe e lē o i ai le solu o le tagata e ola pea pe a oti le tino. O le a tumau pe e lē tumau e faavavau le lalolagi. O le a aumaia pe o le a lē aumaia e le Atua se iuga i amio leaga. O nei mea faatasi ai ma le tele o isi talitonuga ua saʻo pe sese. E le mafai ona saʻo uma ni mea se lua pe afai e le ioe le tasi i le isi. E na o le tasi e saʻo. O le talitonuga ma le faamaoni i se mea ma le faia, o le a lē saʻo ai pe afai o loo sese moni lava.
20. E tusa ai i tapuaiga, atonu o le a faapefea ona tatou mulimuli atu i le “faafanua o le ala” saʻo?
20 O ā ou faalogona pe a tuuina atu faamaoniga o mea o e talitonu i ai e sese? Mo se faaaʻoaʻoga, e faapea o loo e i se taavale, o le uluai taimi lea ua e malaga ai i lea nofoaga. E te maua se faafanua o ala, ae ua e lē suesue ma le faaeteete. Ua taʻu atu ese tasi i a te oe le ala e ui ai. Ua e faalagolago ia te ia, talitonu faamaoni o le ala ua ia faasino atu e saʻo. Ae sei faapea e sese. E faapefea pe a faasino atu e se tasi le mea sese. E faapefea pe a ia faasino atu mai i lau lava faafanua e sese lou auala? Pe o le a avea ea le faamaualuga ma le loto maaa ma mea e taofia oe i le talitonu i ai? O lea, afai ua e iloa mai i lau Tusi Paia o loo e malaga i se ala sese faaletapuaiga, ia e naunau e fai se suiga. Alo ese i le ala vatele i le faaumatiaga; ia e ui i le ala vaapiapi i le ola!
E TATAU ONA FAIA LE FINAGALO O LE ATUA
21. (a) E faaopoopo atu i le iloaina o le upu moni, o le ā ua manaomia? (e) O le ā o le a e faia pe afai ua e aʻoaʻoina e lē fiafia le Atua i ni isi o mea o loo e faia?
21 E tāua le iloa o le upu moni mai i le Tusi Paia. A e lē aoga lea poto pe a e lē tapuai i le Atua i le upu moni. (Ioane 4:24) O le faia o le upu moni, le finagalo o le Atua e talia. ‘O le faatuatua e leai ni galuega e mate.’ o le tala lea a le Tusi Paia. (Iakopo 2:26) Ina ia faafiafia le Atua, e lē gata ina tatau ona ioe lau tapuaiga i le Tusi Paia atoa, a e ao ona faatatauina i matata uma o le olaga. O lea, afai e te aʻoaʻoina o e faia le mea o fai mai ai le Atua e sese, pe e te naunau ea e sui?
22. O ā ni aogā atonu tatou te olioli ai i le taimi nei ma le lumanai, pe afai tatou te faia le tapuaiga moni?
22 E tele faamanuiaga o loo taofia mo oe pe a e faia le finagalo o le Atua. E aoga foi i le taimi nei. I le faia o le lotu moni o le a avea ai oe ma se tamaloa, tane po o se tamā, se fafine, se avā po o se tinā, po o se tama itiiti e sili atu ona lelei. O le a ia oe ni uiga faaleatua o le a mafua ai ona iloa oe mai i le toatele o isi auā ua e faia le mea tonu. A e sili atu, ua e i ai i se tulaga e maua ai le ola e faavavau i le fiafia ma le soifua maloloina atoatoa i le parataiso a le Atua i le lalolagi fou. (2 Peteru 3:13) E leai se fesili e uiga i ai—e tāua moni lava lau tapuaiga!
[Ata i le itulau 25]
Pe na auauna ea i le Atua taʻitaʻi lotu o ē na taumafai e fasioti Iesu?
[Ata i le itulau 26, 27]
O le toatele o tagata o loo i le ala vatele e tau atu i le faaumatiaga, o le fetalaiga lea a Iesu. E na o le toaitiiti lava o loo i le ala vaapiapi e tau atu i le ola.
[Ata i le itulau 28, 29]
“Ua latou taʻu ane ua latou iloa le Atua, a e faafiti ia te ia i a latou galuega.”—Tito 1:16.
I Upu
I Gaoioiga
[Ata i le itulau 30]
Ona o le feeseeseaiga i lotu, sa faia ai se vaega a Paulo i le fetogia o le soo o Keriso o Setefano
[Ata i le itulau 33]
Pe afai e te i ai i le auala sese, pe o le a taofia oe e lou faamaualuga ma le loto maaa mai le ioe i ai?