Mataupu 29
Faia o le Olaga i le Aiga ia Manuia
1. (a) Sa faapefea ona maua e le aiga lona amataga? (e) O le ā le fuafuaga a le Atua e tusa ai ma le aiga?
INA UA foafoaina e Ieova le Atua le uluai tane ma le fafine, sa ia faatasia i laua ina ia maua se aiga. (Kenese 2:21-24; Mataio 19:4-6) Sa fuafua e le Atua mo lenei ulugalii faaipoipo ia faateleina, e ala i le maua mai o ni fanau. Ma a matutua le fanau, sa tatau ona latou faaipoipo ma fai ni o latou foi aiga. Sa fuafua e le Atua faapea, i se taimi o le a faatumulia ai itu uma o le lalolagi i aiga fiafia. Latou te faia le lalolagi ma se parataiso matagofie i soo se mea.—Kenese 1:28.
2, 3. (a) Ai se ā ele mafai ai ona tuuaia le Atua ona o le lē taulau o aiga? (e) O le ā o loo manaomia ina ia olioli ai i se olaga faaleaiga manuia?
2 Peitai i aso nei, ua fevaevaeai aiga, ma o le tele o loo faatasia pea ae e lē o fiafia. Atonu la e fesili se tasi: ‘Afai na faia moni e le Atua aiga, pe e lē ao ona tatou faatalitalia ni iuga lelei?’ E ui i lea, e le mafai ona tuuaia le Atua mo le lē taulau o aiga. Atonu o se tagata gaosi mea na te fausia ma aumaia faatonuga i lona faaaogaina. Ae pe e te tuuaia ea o ia pe afai e leaga le mea na gaosia ona ua le mulimuli lē na faatauina i faatonuga? E leai. O le mea na gaosia, e tusa lava pe atoatoa lona lelei, o le a leaga ona ua le lelei lona faaaogaina. Ua faapea foi la i le aiga.
3 Sa saunia e Ieova le Atua faatonuga i le Tusi Paia mo olaga faaleaiga. Ae afai ua le amanaia nei faatonuga, ona ā lea? E ui lava ina lelei atoatoa fuafuaga mo le aiga ae e mafai ona malepelepe. Ona le fiafia lea o le au aiga. I le isi itu, afai e mulimuli i taʻiala o le Tusi Paia, o le a mafai ona fai ai se aiga fiafia, ma le manuia. O lea, ua tāua tele ona malamalama pe na faapefea ona faia e le Atua tagata eseese o le aiga, ma po o le ā le vaega na ia fuafuaina latou te faatumuina.
E FAAPEFEA ONA FOAFOAINA E LE ATUA LE TAMALOA MA LE FAFINE
4. (a) O ā eseesega o loo i ai i le va o tamaloloa ma fafine? (e) Ai se ā na faapogaia ai e le Atua ia eseesega?
4 E iloa e soo se tasi sa lei tutusa le faiga e Ieova o tane ma fafine. E moni, e tele ala la te foliga tutusa ai. Ae ua i ai eseesega manino i o la foliga ma le gaosiga faaleituaiga. E eseese foi o la faalogona ootia. Ai se ā na eseese ai? Na faia e le Atua ina ia fesoasoani ai le tasi i le tasi i a faataunuuina vaega eseese. Ina ua uma ona faia e le Atua le tamaloa, sa fetalai le Atua: “E le lelei ina toatasi le tagata; ou te faia sona fesoasoani e tatau ma ia.”—Kenese 2:18.
5. (a) Sa faapefea ona faia le fafine o se “fesoasoani” i le tamaloa? (e) O fea na faia ai le uluai faaipoipoga? (i) Ai se ā e mafai ona avea ai le faaipoipoga ma se fuafuaga sili atu ona fiafia?
5 O se fesoasoani o se mea e fetaui pe ō gatusa ma se isi mea, e faaatoatoaina ai. Na faia e le Atua le fafine o sē e fetaui lelei ma le tamaloa e fesoasoani i a te ia e faataunuu le poloaiga a le Atua ia faatumu ma tausia le lalolagi. O lea ina ua mavae le faia o le fafine mai se vaega o le tane, ona faia lea e le Atua le uluai faaipoipoga e ala i lona ‘aumaia lea o ia i le tane.’ (Kenese 2:22; 1 Korinito 11:8, 9) O le faaipoipoga e mafai ona avea o se fuafuaga fiafia talu ai na faia le tane ma le fafine ia tofu ma manaoga ua i ai i le isi le tomai e faamalieina ai. O la uiga eseese ua faapaleniina lelei e le isi. Pe a femalamalamaai le tane ma le avā ma talisapaia ma galulue faatasi e tusa ai ma o la tiute tofiaina, ona saosaolaumea lea i la laua vaega o le faia o se aiga fiafia.
O LE VAEGA A LE TANE
6. (a) O ai sea faia o le ulu o le aiga? (e) Ai se ā ua tonu ma fetaui ai lenei mea?
6 O se faaipoipoga po o se aiga e manaomia se taʻitaʻiga. Sa faia le tane ma se vaega tele o uiga ma le malosi e manaomia ia saunia ai se taʻitaʻiga. o lea, ua fai mai le Tusi Paia: “Auā o le tane o le ulu ia o le avā, pei o Keriso foi o le ulu ia o le ekalesia.” (Efeso 5:23) Ua aoga tele, auā a leai se taʻitaʻiga, o le a i ai faafitauli ma le fenuminumiai. O se aiga e leai se taʻitaʻiga, o le a pei o le ave o se taavale e leai se foeuli. Pe, afai foi e tauva le avā i lea tulaga ulu, o le a pei o se taavale e lua ave taavale, e tofu ma le foeuli e pulea ai uili taitasi o i luma.
7. (a) Ai se ā ua lē fiafia ai nisi fafine i le manatu o le avea o tamaloloa ma ulu? (e) O ai uma e i ai sē e ulu, ma ai se ā ua poto ai lea fuafuaga a le Atua mo le tulaga ulu?
7 Peitai, o le tele o fafine e le fiafia i le manatu e ao na fai le tane ma ulu i o le aiga. O le tasi pogai autu ona o le toatele o tane ua lē mulimuli i fautuaga a le Atua i le pe faapefea ona faaaoga saʻo le tulaga ulu. Peitai, o le mea moni ua matauina, ina ia solo lelei se faalapotopotoga, e manaomia ona sauina se taʻitaʻiga ma faia iuga mulimuli e se tasi. Ma ua fai mai ma le poto le Tusi Paia: “O le ulu o tane taitasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) Ua fuafua e le Atua, e na o Ia lava le leai se tasi e fai ma lona ona talia taʻitaʻiga ma gauai i faaiuga a isi.
8. (a) O le faaaʻoaʻoga a ai e tatau i tane ona mulimuli i ai mo le faataʻitaʻiga o le tulaga ulu? (e) O ā lesona e ao i tane ona aʻoaʻoina mai lena faaaʻoaʻoga?
8 O le iuga ina ia faataunuu o latou tiute e ao i tane ona talia le tulaga ulu Keriso. E ao foi mulimuli i lana faataʻitaʻiga i le fai ole tulaga ulu i a latou avā e pei ona ia faia i lana faapotopotoga o soo. Sa feagai faapefea Keriso ma ona soo i le lalolagi? Sa faia i se ala agalelei ma le faautauta. Sa ia lei saua pe itagofie, e ui ina sa tuai ona latou talia lana taʻitaʻiga. (Mareko 9:33-37; 10:35-45; Luka 22:24-27; Ioane 13:4-15) O le mea moni sa ia foia ma le loto i ai lona soifua mo i latou. (1 Ioane 3:16) E ao i se tane Kerisiano ona suesue ma le faaeteete le faaaʻoaʻoga a Keriso, ma fai le mea e sili ona lelei pe a feagai ai ma lona aiga. O le iuga, o le a lē pule saua o ia, manatu faapito pe avea ma ulu e lē magafagafa i le aiga.
9. (a) O le ā le faitioga ua faia e le toatele o avā? (e) O le ā e ao i tane ona taofia ma le poto a o faia lo latou tulaga ulu?
9 Tane, ia manatunatu i lenei: Pe o faitio ea lau avā e te le o gaoioi moni i se ulu o le aiga? Pe o fai ma i o ia e te lē taʻimua i le aiga, fuafua gaoioiga a le aiga ma faia le tiute tauave o faaiuga mulimuli? Ae o le mea lenei o loo manaomia e le Atua mai i a te oe, se tane e fai. O le mea moni, o le a lelei mo oe ona faaavanoa mo fautuaga ma manaoga o isi tagata o le aiga ma ia mafaufau i ia fautuaga a o faatinoina lou tulaga ulu. Ona o se tane, ua mautinoa le faigata o lou tiute i le aiga. Ae e faia se taumafaiga faamaoni e faataunuu ai o le a sili ona lagona e lau avā le faalogona o le tuuina atu o se fesoasoani ia te oe ma le lagolagosua.—Faataoto 13:10; 15:22.
FAATAUNUUINA O LE VAEGA A LE AVĀ
10. (a) O le ā le ala ua uunaia e le Tusi Paia mo avā? (e) O le ā e tupu pe a lē taulau i avā ona mulimuli atu i fautuaga a le Tusi Paia?
10 E pei ona fai mai le Tusi Paia, sa faia le fafine o se fesoasoani i lana tane. (Kenese 2:18) I le faia o lea tiute, ua augani mai le Tusi Paia: “O outou fafine, ia outou usiusitai i a outou lava tane.” (Efeso 5:22) Ua taatele i aso nei i fafine uiga tauva ma le faafiufiu i tane. Ae afai o le fia sili avā, taumafai e faoa le tulaga ulu, o a latou faiga o le a tutupu moni ai faalavelave. O le toatele o tane ua fai mai: ‘Afai e fia pulea e ia le aiga, ia tuu atu lava la i ai na te faia.’
11. (a) E mafai faapefea i se avā ona fesoasoani lana tane mo le faia o le taʻitaʻiga? (e) Afai o le a faataunuuina e le avā lana tiute tofia mai le Atua, o le ā le auga e ono oo i lana tane?
11 Peitai, atonu o le a e lagona ua faamalosia oe e fai ma taʻitaʻi, ona e le o faia e lau tane. Ae pe e mafai ona e faia se mea e sili atu e fesoasoani ai i a te ia e fai ona tiute o le ulu o le aiga? Pe e te faaalia o loo e tagai i a te ia mo le taʻitaʻiga? Pe e te faatalosaga ana fautuaga ma taʻiala? Pe e te alofia mea e taʻu faatauvaa ai mea na te faia? Afai e te galue moni e faataunuu lau vaega ua tofia e le Atua i le aiga, e foliga mai la o le a faaauau e lau tane lana vaega.—Kolose 3:18, 19.
12. O le ā ua faaalia ai e mafai e avā ona taʻuina atu ma le tonu a latou manatu, e tusa lava pe ua le fiafia i ai a latou tane?
12 Ua le faapea ua lē tatau i le avā ona taʻu atu ona manatu pe afai ua ese i lo lana tane. Atonu o i a te ia ni manatu saʻo, ma o le a aoga mo le aiga pe a faalogo i ai le tane. Ua aumaia le avā a Aperaamo o Sara e fai ma faaaʻoaʻoga mo avā Kerisiano ona o lona usiusitai i lana tane. (1 Peteru 3:1, 5, 6) Ae sa ia fautuaina se vaifofo mo se faafitauli i le aiga, ma ina ua le malie i ai Aperaamo, sa fetalai atu le Atua i a te ia: “Ia e usiusitai i ai i lana upu.” (Kenese 21:9-12) O le mea moni, a faia e le tane le faaiuga mulimuli, e ao i le avā ona lagolagoina pe afai e le solia ai le tulafono a le Atua.—Galuega 5:29.
13. O le ā o le a faia e se avā lelei, ma o le ā le auga o le a i ai i lona aiga?
13 I le faia lelei o lona tiute, e tele mea e mafai e le avā ona faia mo le tausia o lona aiga. Mo se faaaʻoaʻoga, e mafai ona ia saunia mea e ʻai lelei ma tausi mamā le fale ma faia sana vaega i le faatonuina o le fanau. Ua uunaia e le Tusi Paia avā ia “alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, neʻi upuleagaina le afioga a le Atua.” (Tito 2:4, 5) O le avā ma le tinā e faia nei tiute, o le a alofagia ma faaaloalogia tumau e lona aiga.—Faataoto 31:10-11, 26-28.
TULAGA O FANAU I LE AIGA
14. (a) O le ā le tulaga tonu o tamaiti i le aiga? (e) O le ā e mafai i fanau ona aʻoaʻoina mai le faaaʻoaʻoga a Iesu?
14 Na faatonu e Ieova le uluai ulugalii: “Ia fanafanau ia, ma ia uluola,” ioe, ia fai ni fanau. (Kenese 1:28) O fanau sa fuafuaina o se faamanuiaga i le aiga. (Salamo 127:3-5) Talu ai o loo i lalo o le tulafono ma poloaiga a matua, ua faatusaina e le Tusi Paia le tulaga o se tama itiiti i se pologa. (Faataoto 1:8; 6:20-23; Kalatia 4:1) E oo foi i a Iesu sa usiusitai o ia i a i laua, ma faia mea sa la faatonuina. A faia faapea e tamaiti uma, o le a saosaolaumea moni i le fiafiaga o le aiga.
15. Ai se ā ua masani ona avea ai fanau ma faatiga loto i o latou matua?
15 Peitai, na i lo le avea o se faamanuiaga i se aiga, o fanau i aso nei, ua masani ona avea o se puna o le faatiga loto i matua. Ai se ā? Ona ua le taulau i fanau ma matua ona faatatauina faatonuga a le Tusi Paia i le olaga i le aiga. O ā ni isi o nei tulafono ma mataupu silisili a le Atua? Seia tatou suesueina i latou i itulau o sosoo mai. Ia tagai i ai pe e te le ioe i ai e mafai ona fesoasoani i le fiafiaga o lou aiga pe afai e te faia.
ALOFA MA IA AVA I LAU AVĀ
16. O ā ua poloaiina ai tane e fai, ma ua faapefea ona faataunuuina ma le tonu nei poloaiga?
16 Faatasi ai ma le poto mai le Atua, ua faapea mai le Tusi Paia: “O loo faapea ona tatau ona alolofa atu o tane i a latou lava avā, faapei o latou lava tino.’ (Efeso 5:28-30) I le tele o taimi, ua faamaonia e mea ua tutupu, ina ia fiafia avā, e manaomia ona latou lagona ua alofagia i latou. O le uiga, e ao i le tane ona uai atu lana tausiga faapitoa i lana avā, e aofia ai le lē gaoiā, magafagafa ma le faamautinoa. E ao ona ‘ia ava i le avā,’ e pei o a fa a le Tusi Paia. Na te faia faapea i lona manatua o lana avā i mea uma na te faia. O le a ia maua ai foi le ava mai lana avā.—1 Peteru 3:7.
AVA I LAU TANE
17. O le ā ua poloaiina avā e fai, ma e faapefea ona latou faia lenei mea?
17 Ae ā le avā? “O le fafine foi ia ava o ia i lana tane,” o upu ia a le Tusi Paia. (Efeso 5:33) O le lē taulau ona usitai i lenei fautuaga o se pogai autu lea ua le fiafia ai tane ia latou avā. E faaalia e se avā le faaaloalo i lona lagolagoina o faaiuga a lana tane, ma galulue faatasi ma ia ma le loto atoa o le faataunuuina o sini faaleaiga. I lona faataunuuina o lana vaega tofiaina e le Tusi Paia o se ‘lagolago ma se fesoasoani’ i lana tane, o le a faafaigofie ai mo lana tane ona alofagia i a te ia.—Kenese 2:18.
IA FAAMAONI LE TASI I LE TASI
18. Ai se ā e tatau ai i paaga faaipoipo ona faamaoni le tasi i le tasi?
18 Ua fai mai le Tusi Paia: “E ao i tane ma avā ona faamaoni le tasi i le tasi.” I le tane: “Ia e fiafia i lau avā ma olioli i le teine na e faaipoipo i ai . . . ai se ā e te avatu ai lou alofa mo se isi fafine? Ai se ā e te manao ai fua i le lalelei o le avā a le isi tamaloa?” (Eperu 13:4; Faataoto 5:18-20, Today’s English Version) Ioe, o le mulilua e le tusa ai ma le tulafono a le Atua; e oo mai ai faafitauli i se faaipoipoga. Ua matau e se fafine suesue i faaipoipoga: “O le toatele o tagata ua manatu o se faiga mulilua atonu e faaleleia ai se faaipoipoga,” ae ua ia faaopoopo mai o se faiga faapea e oo atu ai i “faafitauli moni.”—Faataoto 6:27-29, 32.
SAILI E FAAFIAFIA MANAOGA O LAU PAAGA
19. E mafai faapefea e paaga faaipoipo ona mauaina le fiafiaga silisili mai feusuaiga faaleituaiga?
19 E le mafai ona fiafia pe afai e sailia e se tasi ona lava fiafiaga faaleituaiga. Peitai, e maua i le faamalieina o manaoga o le paaga a se tasi. Fai mai le Tusi Paia: “Ia avatu le tane i le avā le agalelei e tatau ai, ia faapea foi le avā i le tane.” (1 Korinito 7:3) O loo tuu ai le faamamafaga i le avatu. E mafai ona maua le fiafiaga moni i le foai atu. E pei ona sa fetalai Iesu Keriso: “E sili le manuia o le na te foai atu, i le manuia o le na te talia mai.”—Galuega 20:35.
IA TUUINA ATU OE LAVA I LAU FANAU
20. Ai se ā e tāua ai le faifai mea faatasi o se tasi ma lana fanau?
20 O se tama itiiti e tusa ma le valu tausaga fai mai: “E faigaluega loʻu tamā i taimi uma. E lē i ai lava o ia i le aiga. Na te aumaia aʻu tupe ma le tele o mea taalo, ae seāseā lava oʻu vaai i a te ia. Ou te alofa i a te ia maimau pe ana le faigaluega o ia i taimi uma e mafai ai ona ou vaai pea i a te ia.” Maeu le lelei o tulaga i le aiga pe a mulimuli matua i le faatonuga a le Tusi Paia ia aʻoaʻo i a latou fanau ‘pe a latou nonofo i le fale, pe a savavali i le ala, pe a taooto ma pe a tulai’! O le tuuina atu o oe i lau fanau, faaalu se taimi aoga ma i latou, ua mautinoa e fesoasoani i le fiafiaga o le aiga.—Teuteronome 11:19; Faataoto 22:6.
IA SAUNIUNI LE AOAIGA E MANAOMIA
21. O le ā ua fai mai ai le Tusi Paia e faatatau i le tuuina atu o le aoaiga i fanau?
21 Ua faataatia e lo tatou Tamā faalelagi se faaaʻoaʻoga tatau mo matua i le saunia mo ona tagata o faatonuga e faasaʻo ai, po o aoaiga. E manaomia e fanau aoaiga. (Eperu 12:6; Faataoto 29:15) I le iloaina o lea, ua augani mai le Tusi Paia: “O outou tamā . . . ia tausi atu i ai [i a outou fanau] i aoaiga ma apoapoaiga a [Ieova].” O le tuuina atu o le aoaiga, e tusa lava pe aofia ai le sasa po o le aveesea o ni faaeaga, ua o se faamaoniga e iloa ai e alolofa matua i a latou fanau. Ua fai mai le Tusi Paia: “O le ua alofa ia te ia [lona atalii], ua saili le aoaiga mo ia.”—Efeso 6:4; Faataoto 13:24; 23:13, 14.
TALAVOU—TETEE ATU I ALA O LE LALOLAGI
22. O le ā le tiute tauave ua i le au talavou, ma o le ā ua aofia ai i le faataunuuina?
22 Ua faia e le lalolagi se taumafaiga ia solia ai e le au talavou tulafono a le Atua. E le gata i lea, ua fai mai foi le Tusi Paia: “Ua fusifusia le valea i le loto o le tama.” (Faataoto 22:15) O lea ua o se taua le faia o le mea ua tonu. Peitai, ua fai mai le Tusi Paia: “Le fanau, ua o se tiute tauave faa-Kerisiano mo oe le usiusitai i matua, auā o le mea tonu lava lea e ao ona fai.” O le a aumaia ai ni taui lelei. O lea, le fanau, ia outou atamamai. Usitai i le fautuaga: “Ia e manatua le na faia oe i ona po o lou taulealea.” Tetee i faaosoosoga ia faaaoga vailaau faasaina, le onā, le faitaaga ma le faia o isi mea e lē tusa ma tulafono a le Atua.—Efeso 6:1-4; Failauga 12:1; Faataoto 1:10-19, Today’s English Version.
SUESUE FAATASI LE TUSI PAIA
23. O ā aoaiga o le a olioli ai aiga e ala i le suesueina faatasi o le Tusi Paia?
23 Afai o le toatasi o le au aiga o le a suesue ma faatatau mataupu silisili ma aʻoaʻoga a le Tusi Paia, o le a fesoasoani i le fiafiaga o le aiga. Ae afai o le a faia e tagata uma—le tane, avā ma fanau—maeu se faamanuiaina o lea aiga! O le a mafana, lalata le faiā, faatasi ma se fesootaiga saoloto, a o taumafai tagata taitoatasi o le aiga e fesoasoani i isi ia auauna i a Ieova le Atua. O lea ia fai ma masani faaleaiga le suesue o le Tusi Paia!—Teuteronome 6:4-9; Ioane 17:3.
TAUAAOINA MA LE MANUIA O FAAFITAULI I LE AIGA
24. Ai se ā e ao ai i paaga faaipoipo ona faapalepale i masei o le tasi i le isi?
24 E oo foi i aiga e masani ona fiafia, e tulai mai faafitauli. Ua mafua ona o i tatou uma e lē lelei atoatoa ma e faia mea e sese. “Auā o mea e tele e sese ai i tatou uma,” fai mai le Tusi Paia. (Iakopo 3:2) O lea o paaga faaipoipo e lē tatau ona faamalosia le lelei atoatoa mai i le tasi. Na i lo lena, e ao ona faapalepale i masei o le tasi i le isi. E le tatau la i paaga taitoatasi ona faatalitalia se faaipoipoga fiafia lelei atoatoa, ona e le mafai e tagata le lelei atoatoa ona ausia lea tulaga.
25. E ao faapefea ona faaleleia faafitauli o faaipoipoga i le alofa?
25 E moni, e ao ona galulue se tane ma se avā e alofia mea e faatiga ai i le tasi. Peitai, e tusa pe la te taumafai, e i ai lava taimi e faia ai mea e faatiga ai i le isi. E faapefea ona foia ia faafitauli? Ua fautua mai le Tusi Paia: “O le alofa e ufiufi ai agasala e tele.” (1 Peteru 4:8) O lona uiga o paaga e faaalia le alofa o le a lē faamanatuina atu pea mea sese a le isi. O le alofa, e fai atu ai, ‘Ioe sa e faia se mea sese. Ae ou te faia foi i isi taimi. O lea, o le a ou faagalo au mea sese ma e mafai foi ona e faia faapea mo au.’—Faataoto 10:12;19:11.
26. Pe a tulai ma ise mea faigata, o le ā o le a fesoasoani i le faaleleia o le mataupu?
26 A naunau ulugalii e fefaaaliai sese ma faaleleia, e tele finauga ma faatiga loto e mafai ona alofia. O lo la sini o le taumafai e foia faafitauli, a e lē o le mālo i le finauga. E tusa pe o lau paaga ua sese, ae ia e agalelei e faigofie ai ona foia le faafitauli. Afai ua sese, talosaga ma le loto maulalo le faamagaloga. Aua le fai mea tuu; tagofia loa le faafitauli. “Aua neʻi goto le la o ita pea outou.”—Efeso 4:26.
27. O le mulimuli atu i ā fautuaga a le Tusi Paia o le a fesoasoani ai i paaga faaipoipo e faaleleia o latou faafitauli?
27 Ae maise pe afai ua e faaipoipo, e ao ona e mulimuli i le tulafono o le “aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:4) E manaomia ona e usitai i le poloaiga a le Tusi Paia: “Ia oofu outou i le alofa mutimutivale, ma le agalelei, ma le loto maulalo, ma le agamalu, ma le onosai. Ia fefaapalepaleai, ina ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso ia te outou, ia faapea foi outou. Ao le alofa, e lautua lea i nei mea uma, o le fusi lea e atoatoa ona lelei ai.”—Kolose 3:12-14.
28. (a) Pe o le tatalaina ea o faaipoipoga o le ala lea e faaleleia ai faafitauli o faaipoipoga? (e) O le ā ua fai mai ai le Tusi Paia ua na o lea le mafuaaga e tatala ai faaipoipoga ma saoloto ai se tasi e toe faaipoipo?
28 I aso nei e tele ulugalii ua lē faaaogaina fautuaga a le Tusi Paia e fesoasoani e faaleleia ai o latou faafitauli, ma latou sailia talaga faaipoipoga. Pe faamaonia e le Atua le alei o se auala e faaleleia ai faafitauli? E leai. (Malaki 2:15, 16) Na fuafua e ia faaipoipoga e tumau e oo i le oti. (Roma 7:2) E na o le tasi le pogai e faataga e le Tusi Paia e tatala ai faaipoipoga ma saoloto ai se tasi e toe faaipoipo, o le faitaaga lea (faa-Eleni, porneia, amioga e lē tatau e sili ona leaga faaleituaiga). Afai ua faia le faitaaga, ona filifili lea o le paaga mamā pe faia se talaga faaipoipo pe leai.—Mataio 5:32; 19:9,NW.
29. (a) Pe afai e lē faatasi atu lau paaga faaipoipo ma oe i le tapuaiga Kerisiano, o le ā e ao ona e faia? (e) O le ā se iuga e ono mafai ona tupu?
29 E ā pe a lē fia suesue lau paaga faaipoipo ma oe i le Afioga a le Atua, po o le tetee atu foi i au galuega Kerisiano? Ua uunaia pea oe e le Tusi Paia e nonofo ma lau paaga ae aua le faapea o le nonofo eseese e faigofie ai ona sola ese mai i ou faafitauli. Faia mea e te mafaia e faaleleia ai le tulaga i lou aiga i le faatatauina o mea ua fai mai le Tusi Paia e tusa ma lau amio. I se taimi, atonu ona o lau amio Kerisiano o le a e faatalitonuina ai lau paaga. (1 Korinito 7:10-16; 1 Peteru 3:1, 2) Ma maeu se faamanuiaga o le afai mo oe pe afai ua tauia lou onosai alofa i lenei auala!
30. Ai se ā ua tāua tele ai o matua ona faataatia se faaaʻoaʻoga lelei mo a latou fanau?
30 O le tele o faafitauli i aiga i aso nei e aafia ai fanau. O le ā e mafai ona fai pe a faapena lou aiga? Muamua lava, e ao ia te oulua o matua ona fai se faaaʻoaʻoga lelei. Auā o fanau ua sili ona faanaunau e mulimuli i mea e te faia na i lo o au upu e fai. Ma afai e ese au gaoioiga ma au upu, o le a vave ona pue e tamaiti laiti. Afai la e te manao e ola lau fanau i olaga lelei faa-Kerisiano, e ao ona e fai le faaaʻoaʻoga.—Roma 2:21, 22.
31. (a) O le ā le mafuaaga e sili ona tāua ua manaomia ina ia usiusitai ai fanau i fautuaga a o latou matua? (e) Atonu e mafai faapefea ona e faaalia i lau fanau talavou le poto o le usiusitai i le tulafono a le Atua ua faasaina ai le faitaaga?
31 E manaomia foi ona e fefulisai manatu ia faatalitonuina le fanau. E lē lava le na ona faapea atu i tamaiti: ‘Ou te lē manao e te faia se faitaaga ona e sese.’ E manaomia ona faailoa ia i latou e faapea ua fetalai Lē na Foafoaina i latou, o Ieova le Atua, o mea e pei o le faitaaga ua sese. (Efeso 5:3-5; 1 Tesalonia 4:3-7) Peitai, ua lē lava foi lea. E manaomia foi ona fesoasoani i fanau ia iloa le pogai e tatau ai ona usiusitai i tulafono a le Atua, ma pe faapefea ona aogā mo i latou. O se faaaʻoaʻoga, e mafai ona e faatepa sau tama talavou i le auala matagofie ua fausia ai se pepe faaletagata e ala i le faatasia o le sela fanautama o le tane ma se fuā sela o le fafine, ma fesili i ai: ‘Pe e te lē manatu ea o Lē na faapogaia lea vavega o le fanau mai ua sili lona silafia i le auala e tatau ai i tagata ona faaaogaina lo latou malosi fanau tama ua foaiina mai e le Atua?’ (Salamo 139:13-17) Pe e mafai foi ona e fesili: ‘Pe e te manatu o Lē Silisili na Foafoaina i tatou o le a na faia se tulafono e aveesea ai lo tatou fiafia i le olaga? Na i lo lea, e lē sili ea lo tatou fiafia pe a tatou usiusitai i ana tulafono?’
32. (a) O le ā lau vaaiga e ao na i ai pe afai e lē talafeagai i manatu o lau tamaitiiti ma le silafaga a le Atua? (e) E mafai faapefea ona e fesoasoani i lau tamaitiiti ia iloa le atamai o le mea ua fai mai ai le Tusi Paia?
32 O fesili faapea e mafai ai ona amata ona manatu lau tamaitiiti i le tulafono a le Atua i le faaaogaina o totoga fanau tama. Ia talia ona manatu. Afai e lē o manatu ia o loo e faanaunau na te faia, aua e te ita. Taumafai e malamalama o le tupulaga a lau tamaitiiti ua see ese i ala o aʻoaʻoga amiotonu o le Tusi Paia, ma taumafai e faaali i ai le pogai ua lē atamai ai ia amioga lē mamā lana tupulaga. Atonu e te faatepa lau tamaitiiti i ni faaaʻoaʻoga patino o faiga lē mamā faaleituaiga ua iu ai i le fananau mai o tamaiti o le po, maʻi afi, po o isi faalavelave. I lenei ala ua fesoasoani ai ia ona iloa le talafeagai ma le saʻo o mea ua fai mai ai le Tusi Paia.
33. E mafai faapefea e le faamoemoe ua faavae ae i le Tusi Paia o le ola e faavavau i Parataiso i le lalolagi ona fesoasoani i a i tatou ina ia manuia le olaga faaleaiga?
33 Ae maise le faamoemoe i le Tusi Paia o le ola e faavavau i Parataiso i le lalolagi e mafai ona fesoasoani i a i tatou e faia se olaga manuia faaleaiga. Ai se ā ua faapea ai? Auā afai tatou te mananao moni e ola i le faiga fou a le Atua, o le a tatou filiga la e ola nei e pei ona faamoemoe e ola ai i lena taimi. O lona uiga o lo tatou mulimuli i faatonuga ma taʻitaʻiga a Ieova le Atua. E iu i le faapaleina e le Atua o lo tatou fiafiaga nei i le olioli i le ola e faavavau ma le matuā fiafia tele e faavavau i le lumanai.—Faataoto 3:11-18.