Mataupu 10

O le ā le Tāua o Foliga Vaaia?

PE NA e fai mai e te lē fiafia i ou foliga? E toʻaitiiti i tatou—pe afai e iai—e faamalieina moni i o tatou foliga vaaia. I le lē pei o Nakisō, o lē sa matuā fiafia i ona foliga ina ua na vaaia lona ata i se vai, o nisi o i tatou e toetoe lava oo i mafatiaga o le mafaufau pe a tatou vaai atu i o tatou lava ata.

Ua tagi talatala mai Maria o lē e sefuluono ona tausaga e faapea, ‘O loo ia te aʻu se lagona lē fiafia i loʻu tino. O loʻu manatu ou te lē aulelei.’ E tali faapena foʻi le faanoanoaga o Pati e sefulutolu tausaga le matua: ‘Ou te lē fiafia i loʻu laulu i le auala lea e laulaututū ai i luga le pito i tua.’ Ua atili ai ona lavelave le mataupu, ona e ono mafai ona suia faafuaseʻi foliga vaaia o se talavou, lea e tusa ai ma le faamatalaga a se tagata suʻesuʻe o le mafaufau ma le amio, ua masani ona iai i talavou se “lagona ua pei e ese i latou mai o latou lava tino.” Ua faapea ai ona toʻatele i latou ua soona popole naʻuā i o latou foliga, laulu, fuaitino ma fausaga.

O le mea moni, o le Atua lava ia e na te talisapaia le lalelei. Ua fai mai le Failauga 3:11: “Ua faia e ia [le Atua] mea uma lava e matagofie i o latou lava tausaga.” Ma o le auala o loo e foliga atu ai e mafai ona iai sona aafiaga tele i le auala e manatu ai isi ma feagai ai ma oe. Na faaopoopo mai Dr. James P. Comer e faapea: “O le lelei o le tino o se vaega lea o lou lava tagata. E mafai ona aafia ai le mautinoa o le tagata lava ia ma mea na te faia ma mea na te lē faia i le olaga.” O se mea tatau lou manatu mamafa i ou foliga vaaia. Ae peitaʻi, pe afai e te soona popole naʻuā ia te oe lava ma e ʻalo ai mai isi po o lou lē fiafia ai foʻi ia te oe lava, ona lē lelei ai lea o sea manatu mamafa.

O Ai na Fai Atu E te Lē Aulelei?

O le mea e mālie ai, o mafatiaga ona o foliga vaaia totino e lē māfua uma mai i le iai o se pona i le tino. A o nofo i le vasega se teine paee o loo moomoo i le fia lapoa, ae i le isi itu, o loo faanoanoa ai se teine lapoa ona o lona “puta” tele. O fea e ō mai ai na lagona lē faamalieina? O le ā ua na faapogaia talavou tino lelei e mafaufau faapea o i latou e lē aulelei?

Fai mai le polofesa o le mafaufau ma amioga o Richard M. Sarles: “O le tuputupu aʻe e avea ma tagata matua o se vaitaimi o suiga tetele e toe faafou ai vaega o le tino. . . . Ina ia fesagaʻia lagona lē mautinoa ona o faafouga ma suiga o le tino, ua faalagolago atu ai le toʻatele o talavou i a latou aumea mo lagona mautū.” Ae o le vaaiga a au aumea, o lou umī, puupuu, lapoa, po o lou paee—ae lē taʻua ai le foliga o lou isu po o ou taliga—e mafai ona avea ma pogai o popolega sili. Ma pe a uaʻi tele atu i isi na i lo o oe po o le faifaia foʻi o oe ona o ou foliga vaaia, o le a faigofie ai ona e amataina ni faalogona lē fiafia ia te oe lava.

Ua salalau taaʻiga i televise, tusi, ma ata tifaga. E faataupupula mai ia i tatou tane ma fafine lalelei i televise ma itulau o mekasini, i le faatauina atu o so o se oloa e mai lava i fagu faamanogi e oo atu i ʻiliafi. O ala o fesootaʻiga ua latou faatalitonuina ai oe faapea afai e lē momosi manaia lou tino pe te lē tutuʻa “aulelei,” e sili ai lou lafi—pe sili ai foʻi le aua e te toe mafaufau i le fia taʻutaʻua pe fiafia.

Aua Neʻi ‘Tosoaʻina i a Latou Taaʻiga’!

A o e leʻi faia se faaiʻuga faapea o oe e te auleaga, fesili ifo ia te oe lava po o le ā le tele o moni ai pona o lou tino—po ua na o ni mafaufauga. Po o ou foliga vaaia ea ia e te lē fiafia i ai (po ua tauemua) e matagā moni lava? Po ua uunaʻia ea oe e isi e mafaufau faapena? Ua fautua mai le Tusi Paia: “Aua le faatagaina le lalolagi o siʻomia ai oe e tosoaʻina oe i a latou taaʻiga.”—Roma 12:2, Phillips.

Seʻi mafaufau: O ai o uunaʻia le manatu faapea e te manaʻomia se foliga faapitoa pe a e fia taʻutaʻua, taulau manuia, pe fiafia foʻi? Pe lē o tagata gaosi oloa ea ma tagata faasalalau o ē o mauaina polofiti e ala i le uunaʻia o oe i auala fou e faaaogā ai meaʻai talafeagai po o le faatauina o mea taugatā e faalalelei ai? Aiseā e faataga ai i latou e tosoaʻina ou mafaufauga? Ma afai o faitio mai au aumea i ou foliga, po o latou faia ea ina ia fesoasoani mai ai—pe ina ia ki ai oe i lalo? Afai ina ia ki ai oe i lalo, o ai la e manaʻo i ni “uō” faapena?

Ua fautua atili le Tusi Paia ia te oe ina ia “faasaga atu lou loto i le faautauta.” (Faataoto 2:2) O le a fesoasoani le faautauta ia te oe e tagaʻi totoʻa ai i ou lava foliga faaletino ae lē ona o manatu mai isi ma ia aua neʻi talitonugofie i ala o fesootaʻiga o faasalalauga faatosina. E toʻaitiiti tagata e talitutusa foliga ma tagata taʻutaʻua. Ma “o le mea faatauvaa le lalelei.” (Faataoto 31:30) O tagata o loo totogia tupe mo o latou foliga vaaia e na o sina taimi puupuu ona mou atu lea ma toe manaʻomia ai se isi foliga lelei ma fou. E masani foʻi ona matuā matagofie o latou foliga vaaia pe a uma ona faaaogāina valimata, o malamalama mai molī faapitoa ma le fetuutuunaʻiga o mea puʻeata ina ia faalalelei atili ai. (E matuā faateʻia lava nisi i foliga o tagata lauiloa pe a aunoa ma le fesoasoani a mea ua latou faaaogā e faalalelei ai!)

O lea la, e matuā leai se māfuaaga e te lagona ai le mafatia o le mafaufau ona e te lē o foliga e pei o tagata taʻutaʻua o le televise po o ni mekasini. E lē o au aumea foʻi e faia se faaiʻuga mulimuli i le umī, puupuu, po o le paee, e tatau ona e foliga atu ai ina ia avea ma sē e lalelei. Afai o loo lelei ou faalogona i le auala o e foliga atu ai, aua la le soona faalogo atu i mea o fai mai ai au aumea. O le mea e mālie ai, o se mea lea e te lē o fiafia ai i ou foliga atonu o le mea tonu lena o loo moomoo mai i ai se isi tagata.

Teuteu Lelei!

O nisi taimi e iai i foliga vaaia o talavou faafitauli na fananau mai ma i latou: e leaga le paʻu o le tino, e puta tele, e piʻo le isu, e failā taliga, e matuā puupuu lona tino. E moni, o le avea ma talavou tuputupu aʻe e faasolosolo lava suiga i ou foliga vaaia. O fuafua, fesuiaʻiga faifai pea o le mamafa, ma le vave tele (po o le tuai tele foʻi) o le tupu aʻe ua avea ma toʻatugā i tausaga talavou. A o faagasolo mai taimi o le a faaleleia ai na ituaiga o faafitauli.

E lē faapena isi. Ma o le toʻatele o talavou e tatau ona ola ma le mea moni faapea, e lē aulelei. Na faapea mai se tusitala o John Killinger: “Mo le toʻatele o tagata o le auleaga o se tasi lena o mea pito i tigā i tulaga moni o le olaga, o se mea latou te vave ona iloaina ma e seāseā lava ona mou ese atu i o latou olaga atoa.” Ae peitaʻi e mafai ona e teuteu lelei i ou foliga atu!

O taotoga, e taugatā ma atonu e lamatia se auala e faaleleia ai vaega e lē o atoatoa ona lelei o le tino.a Ae faigofie le tumamā, e lē alu ai se tupe ma e tele mea na te mafaia e faaaulelei ai. Atonu e lē iila lou laulu e pei o se tama po o se teine e autū i ai se ata tifaga, ae mafai ona mamā; e faapena foʻi i ou foliga, lima, ma ou atigilima. O nifo e papaʻe ma mamā, o tainifo piniki e faamanaia atili ai si au ʻataʻata. Pe iai ea sou faafitauli i le lapoa tele? O se faasologa o meaʻai talafeagai ma faamalositino (atonu i lalo o le vaaiga a se fomaʻi) e mafai ona tele sana vaega e faia mo le pulea lelei o lou mamafa.

Faatasi ai ma le ioega mai mātua, atonu e te taumafai foʻi e faataʻitaʻi ofu ma le ituaiga o teuga o laulu ia e iloa ai vaega lelei o lou tino ma punitia ai ou pona. Mo se faaaʻoaʻoga, e tusa ai ma le tusitala o Sharon Faelten, o se isu lapoa e mafai ona faalaiti pe a “faafetefete le laulu po o le faia o se faapatu i le tumuaʻi” o se teine. O foliga mimiti ma ivia e mafai foʻi ona faamanaiaina pe afai “e faamigimigi lou laulu,” ma o valimata ua filifilia lelei e mafai ona punitia ai pona o i foliga o se teine. Po o se tama po o se teine, e mafai foʻi ona e faaleleia atili i le filifilia lelei o lavalava. Ia filifili lanu e faaleleia ai le lanu o lou paʻu ma teuga e onomea ai. Ia uaʻi atu i tosi o ie: O tosi e faasasaʻo i lalo e faapaee ai; o tosi e faalalava o le tuufaafeagai lena!

Ioe, faatasi ai ma taumafaiga ma mafaufauga lelei, e mafai ona e faaali atu ai ni foliga vaaia e tausaafia—e tusa lava pe na e fanau mai e te lē aulelei.

Se Manaʻoga mo le Paleni

A o tāua le uaʻi atu i le auala e te foliga atu ai, ia faaeteete ia aua neʻi avea ou foliga vaaia o se mea e sili ona tāua i lou olaga. Po o e mātaulia ea e seāseā tautala le Tusi Paia i le auala o loo foliga mai ai tagata? Aiseā ua lē taʻu mai ai ia i tatou pe faapeī foliga o Aperaamo, Maria, po o Iesu foʻi? O le mea moni lava, sa leʻi faatāuaina i le silafaga a le Atua.

O le mea e lelei ona mātauina, sa teena e le Atua le avea o se tane talavou e igoa ia Eliapo o se tupu, lea sa avea lona fuaitino o se mea sa sili ona maofa ai! Na fetalai atu Ieova le Atua i le perofeta o Samuelu: “Auā e te vaai i lona tino, po o le maualuga o lona tino . . . auā e le vaai Ieova pei o le vaai o tagata, auā e vaai tagata i le tino, a e vaai Ieova i le loto.” (1 Samuelu 16:6, 7) Maʻeu se faamāfanafanaga i le iloaina o le Atua, o ia Lē sili ona faitaulia, e lē o se mea e sili ona tāua ia te ia o tatou foliga vaaia! ‘E silasila o ia i le loto.’

O se isi manatu e mafaufau i ai: Pe lē o le toʻatele ea o au uō e lē matuā aulelei uma? Pe faamata e taulia se ata o se tasi o ou mātua e tuu i le faavaa o se mekasini o iai āʻega? Atonu e leai. Ae ui i lea, o le iloaina o o la uiga lelei, e seāseā ai lava ona e mafaufau i o la foliga vaaia! E faapena foʻi ona ia te oe uiga lelei faaletagata e sili atu ona tāua i so o se vaega e lē o aulelei moni o le tino—pe moni po o ni mafaufauga.

Peitaʻi, o foliga vaaia e tāua lea i au aumea, ma atonu e omia ai oe ina ia faataʻitaʻi atu i a latou tifiga o lavalava ma teuga. E ao faapefea ona e tali atu i na omiga?

[Faaopoopoga i lalo]

Fesili mo Talanoaga

◻ Aiseā e popole tele ai talavou i o latou foliga vaaia? O le ā sou lagona e uiga i ou lava foliga?

◻ O le ā le vaaiga tāua o foliga vaaia e faasilisilia e ala i faasalalauga ma au aumea? E tatau faapefea ona e tali atu i na taaʻiga?

◻ O ā nisi o auala e foʻia ai faafitauli i fuafua?

◻ E mafai faapefea ona e faaauleleiina ou foliga atu? Aiseā e manaʻomia ai le paleni i lenei tulaga?

[Faamatalaga faaopoopo i le itulau 82]

‘O loo ia te aʻu se lagona lē fiafia i loʻu tino. O loʻu manatu ou te lē aulelei’

[Faamatalaga faaopoopo i le itulau 88]

Ua ia te oe uiga lelei e sili atu ona tāua i so o se vaega e lē o aulelei moni o le tino

[Pusa i le itulau 84, 85]

‘Pe Iai se Mea e Mafai Ona Ou Faia i Oʻu Fuafua?’

O fuafua o se faalētonu i le gasologa o le paʻu lea e faapogaia ai mātogitogi po o maʻilaʻila ona o fuafua, o mātogitogi uli, o fuafua mūmū ua fufula, po o fuafua ua malō. Mo le toʻatele o talavou, o se faalētonu i le gasologa o le paʻu ua sili ona tugā tele ia i latou, na i lo na o se mea e vave mavae atu i ni nai masina. E mafai ona aafia ai tagata e eseese o latou matutua, ae pito sili ona mafatia ai talavou. Fai mai nisi tagata popoto, pe ā ma le 80 pasene o talavou e aafia i fuafua i ni vala eseese.

E lē o se mea la e ofo ai, ina ua fesiligia talavou e 2,000 e taʻu mai tulaga e pito sili ona latou lē fiafia ai ia i latou lava, o faafitauli i paʻu o le tino na sili ona tele na i lo isi faitioga. E pei ona taʻua e se tasi talavou o Sandra, o lē sa mafatia i tulaga leaga o fuafua a o iai i le aʻoga maualuga e faapea: “Sa leaga tele oʻu fuafua, e masani lava ona faalafi oʻu foliga mai isi tagata. Na ou matuā matamuli ona na ou masiasi i oʻu foliga. . . . Sa matagā tele oʻu foliga.”—Mekasini o le Co-Ed.

Aiseā ua oso aʻe ai lenei mea ua fai ma sasa i tausaga o lou talavou—i le taimi tonu o loo e manaʻo ia sili ai ona lelei ou foliga? Ona o lena e te tuputupu aʻe pea. A o faasolosolo aʻe e avea ma tagata matua, o le a faateleina foʻi galuega a fatu puipui (skin glands) o le paʻu.

O le ā e tupu? Ua faamatala mai e le World Book Encyclopedia i faaupuga faigofie e faapea: E faatafe atu e fatu puipui taʻitasi uu i pu o loo tutupu aʻe ai fulufulu—o se tamaʻi taga lea o loo siʻomia ai fulufulu taʻitasi. E masani ona tafe ese lena uu e ala i pu ninii o le paʻu, ae o nisi taimi e punitia ai lena pu ma lē mafai ona tafe ese mai ai le uu i le vave e mafai ai. O le pu lea ua punitia e tupu aʻe ai se mātogi lea ua taʻua o mātogitogi uli ninii ona o le uu lea ua toʻa ai i totonu ua fefiloi ma le okesene, ua mago, ma ua lanu uliuli ai. E tupu aʻe se fuafua pe a oo ina aloua. E tupu se fuafua malō pe a fanafanau siama i le uu lea ua toʻa i totonu. O le fuafua malō e tuua ai ni maʻilaʻila tumau. E lē tumau ni māʻila mai i fuafua seʻi vaganā ua amata ona ʻona, o iʻuga e masani ona maua pe a oomi pe ini—o lea la, ia aua neʻi oomia pe inia!

O le mea e maofa ai, o popolega ma ootiaga tau faalogona e mafai ona lē sologa lelei ai fatu puipui o le paʻu. O nisi e fotu aʻe se fuafua telē a o lumanaʻi se mataupu tāua pe a o leʻi faia suʻega po o le taimi foʻi o faagasolo ai suʻega. Ua talafeagai ai la le fetalaiga a Iesu: “Aua tou te popole i le aso a taeao; auā e popole le aso a taeao i ana lava mea.”—Mataio 6:34.

E faanoanoa e taʻu atu, e leai se fofō faavavega o loo iai. Ae peitaʻi, e iai vailaau faafomaʻi ua saʻoloto lona faatauina o loo maua, e pei o gels, kulimi, vai nini, o vailaau e fufulu ai le paʻu, fasimoli, o vailaau e pei o se ufimata e faaleleia ai paʻu o foliga, lea ua aofia ai se vailaau ua taʻua o le benzoyl peroxide (o se vailaau e tetee atu i paketeri) lea e mafai ona fesoasoani e faaitiitia ai le tutupu o fuafua. (E mafai ona logo le fomaʻi a le aiga pe a manaʻomia ni vailaau e malolosi.) Ua iloa e le toʻatele o le fufuluina māeʻaeʻa o o latou tino e lē aunoa i se fasimoli po o le fufulu foʻi i le benzoyl peroxide e aogā lea. Ae peitaʻi, ia ʻalofia fasimoli e iai le uu po o vali ma vailaau mo foliga e iai le uu.

O nisi talavou ua latou iloaina foʻi o le tausia lelei o lo latou soifua mālōlōina—ia lava se taimi e faamalosi ai le tino, o le iai i se mea e maua ai le ea fou i le tele e mafai ai, ma ia lava le moe—e faaleleia ai le tulaga o o latou fuafua. Ma a o talanoaina e nisi aogā tumau e maua mai i polokalame o meaʻai ua fuafua lelei e lē gaʻoa, ua foliga mai e talafeagai ma aogā le ʻalofia o meaʻai e lē tele sona aogā (junk food), ae tāua le tausami i meaʻai ua fuafua lelei ma paleni.

Po o le ā lava le tulaga, e tatau ona onosai. Ia manatua: Na amata iai le faafitauli mo se vaitaimi umi, o lea e lē faaleleia i le na o se po e tasi. Na fai mai Sandra lea na taʻua muamua e faapea: “E masalo na atoa lelei le tausaga na ou faatalia ai le molemole atoa o le paʻu o loʻu tino, ae na ou mātaulia ni suiga o loʻu paʻu i totonu o le ono vaiaso.” E ala i le pipiimau atu i au togafitiga mo se vaitaimi, atonu e te lagonaina ai sina toʻafimālie.

Ae mo le taimi nei, aua neʻi faatagaina ni nai tamaʻi maʻilaʻila e aveesea ai lou matamuli ia te oe lava po o le faavaivaia ai foʻi o oe mai le talanoa atu i isi. Ma atonu o e matuā popole i le tulaga o iai lou tino, ae masalo e lē o mātaulia tele e isi e pei ona e manatu i ai. O lea, ia taumafai e tausia se agaga mautinoa ma le fiafia. Ma ia fai le mea e te mafaia mo ou fuafua i le taimi nei!

[Ata i le itulau 83]

O se mea e te lē o fiafia ai i ou foliga atonu o loo moomoo mai i ai isi tagata

[Ata i le itulau 86]

E masani lava ona lē iloa e talavou faapea o tagata taʻutaʻua o loo iai i mekasini ua teuteuina e se vaega o tagata e faaauleleiina foliga